УДБЭТ-ын хамт олон дэлхийн шилдэг хөгжмийн зохиолч Ж.Пуччинийн мэндэлсний 160 жилийн ойд зориулан “Олон улсын дуурийн өдрүүд”-ийг энэ сарын 28, 29, 30-нд зохион байгуулна.
Ойн хүрээнд түүний сор болсон бүтээлүүд болох “Чио Чио Сан”, “Богема” дуурь болон “Олон улсын дуурийн гала тоглолт”-ыг толилуулах юм.
УДБЭТ-ын хамт олон тус арга хэмжээнд БНСУ, ОХУ-ын шилдэг уран бүтээлчдийг урин хамтран ажиллаж байна. “Сонгодог дуурийн өдрүүд”-ийн тоглолтод УДБЭТ-ын гоцлол дуучид, БНСУ-ын удирдаач Ки Сун Ли, дуучин Ким Нам Юүн, И Ёон Сук, Лю Хён Сунг, ОХУ-ын Буриадын театрын гоцлол дуучин Ардын жүжигчин Н.Мөнхзул, УДБЭТ-ын Симфони найрал хөгжим, найрал дуучид үзэгчдэд дэлхийн шилдэг дууриудыг тоглоно.
“Чио Чио Сан” буюу “Эрвээхэй хатагтай” дуурийг анх УДБЭТ-ын тайзнаа тоглоход тус бүтээлийн цомнолыг орчуулсан зохиолч, найруулагч, урлаг судлаач, Монгол Улсын ардын жүжигчин Э.Оюуны мэндэлсний 100 жилийн ойн хүрээнд энэхүү дуурийг тоглох юм.
“Италийн хөгжмийн зохиолч Ж.Пуччини хүний дотоод сэтгэлийг чөлөөтэй илэрхийлдэг. Түүний аялгуу маш төгс учраас бүтээлүүд нь дэлхийн соёлын үнэт өв болсон. Ж.Пуччинийн аялгуу нь дэлхийн бусад хөгжмийн зохиолчдоос дээгүүрт ордог. Дуурь сонирхдог болон огт мэддэгүй хүн ч гэсэн түүний аялгууг сонсоод сэтгэлийн хувьд өөр ертөнцөд шилжиж чаддаг. Тиймээс түүний мэндэлсний 160 жилийн ойд зориулан театрын уран бүтээлчид энэхүү гайхамшигт дууриудаар үзэгчдэд бэлэг барьж байна” хэмээн УДБЭТ-ын ерөнхий найруулагч Г.Эрдэнэбаатар ярилаа.
“Чио Чио Сан” дуурьд Дорнын үзэсгэлэнт бүсгүйн хашийн тунгалаг царай эрвээхэй хоёр нүдэнд сэтгэл алдан хөтлөгдөх Америкийн тэнгисийн цэргийн флотын дэслэгч хоёрын хайр дурлалын гунигт бөгөөд хатан зоригт бүсгүйн түүхийг, “Богема” дуурьд залуу, бүсгүй хоёр танилцан дурлалцаад, амьдралын эрхээр түр салж байснаа үүрд ахин уулзаж байгаа тухай өгүүлдэг. Парисын Богемын гудамжны байшингийн дээврийн хөндийгөөс эхэлсэн үлгэрийн мэт мөртлөө бодит эмгэнэлт хайр сэтгэлийн түүх юм.
“Олон улсын дуурийн өдрүүд”-ийн хүрээнд энэ сарын 28-нд Ж.Пуччини “Чио Чио Сан”, 29-нд “Богема” дуурь, 30-нд “Олон улсын дуурийн гала тоглолт”, ирэх сарын 01-нд “Best of classics open air”тоглолтыг Д.Сүхбаатарын талбайд тус тус толилуулах юм. Тасалбар нь 10, 20, 30 мянган төгрөгийн үнэтэй байх аж.
