УИХ-ын чуулганы нэгдсэн хуралдаан хуваарийн дагуу энэ баасан гарагт хаалтаа хийнэ. Харин өчигдөр АН-ын бүлэг хоёр хуулийн төслүүдээр завсарлага авлаа. Тодруулбал,
УИХ-ын чуулганы өчигдрийн нэгдсэн хуралдааны эхэнд хэлэлцэх асуудлын дарааллыг батлах үеэр УИХ дахь АН-ын бүлэг Захиргааны ерөнхий хуульд өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төслүүдийн үзэл баримтлалыг хэлэлцэх эсэх асуудлаар тав хоногийн завсарлага авч буйгаа мэдэгдсэн юм.
Ингээд хуралдаанаар хэд хэдэн хууль, тогтоолын төслүүдийг хэлэлцэж баталсаны дараа “Таван толгойн ордыг эдийн засгийн эргэлтэд оруулах ажлыг эрчимжүүлэх тухай” УИХ-ын тогтоолын төслийн анхны хэлэлцүүлгийг явуулав. Улмаар гишүүд асуулт, тодруулга хийж хариулт авсны дараа зарчмын зөрүүтэй саналын томъёоллуудаар санал хураалт явуулсан. Энэ үеэр УИХ дахь АН-ын бүлэг хоёр өдрийн завсарлага авч, “Эрдэнэс Монгол” компанийн 49 хувийг иргэдэд эзэмшүүлэхтэй холбоотой асуудлыг нягтлах шаардлагатай гэсэн юм. Ийнхүү тус бүлгийн хүсэлтийг хүлээн авч ажлын хоёр өдрийн завсарлага өгөхөөр УИХ-ын дарга шийдвэрлэв.
Тэгэхээр АН-ын бүлэг дээрх хуулийн төслүүдээр завсарлага авсан тул УИХ-ын чуулганы хуралдаан хаалтаа хийгээд ээлжит бус чуулган зарлах, хугацаа сунгаж хуралдах эсэхийг мөн шийдвэрлэх учиртай. Мөн шаардлагагүй гэж үзвэл чуулганыг баасан гарагт хаагаад амрах зам байгаа.
УИХ-ын тухай хуулийн “16.2-т зааснаар ээлжит бус чуулганыг нийт гишүүний гуравны нэгээс дээшхийн шаардсанаар, эсхүл Ерөнхийлөгч, Улсын Их Хурлын даргын санаачилгаар хуралдуулна.
16.3-т Ерөнхийлөгч болон Улсын Их Хурлын гишүүд нь ээлжит бус чуулган хуралдуулах санал, хэлэлцэх асуудлыг Улсын Их Хурлын даргад өргөн мэдүүлнэ.
16.4. Улсын Их Хурлын дарга ээлжит бус чуулганы хэлэлцэх асуудал, хуралдах өдөр, цаг, үргэлжлэх хугацааг товлон захирамж гаргана.” гэж заажээ.
АН-ын бүлэг завсарлага авсан Таван толгойн асуудлын тухайд, төслийн анхны хэлэлцүүлгийг Байнгын хорооны хуралдаанаар хэлэлцэх үеэр УИХ-ын гишүүн З.Нарантуяа, Д.Эрдэнэбат нар “Эрдэнэс Монгол” компанийн 49 хувийг ард иргэдэд эзэмшүүлэх, УИХ-ын 2010 оны 39 дэх тогтоолын 1 дэх заалтын 1 дэх дэд заалтын “охин” гэснийг, мөн “орд ашиглалтын тусгай зөвшөөрлийг хуваахгүйгээр шилжүүлэх, түүнтэй хөрөнгө оруулалтын гэрээ байгуулах” гэснийг хасах санал гаргасныг Эдийн засгийн байнгын хороо дэмжсэн аж.
Байнгын хорооны санал дүгнэлттэй холбогдуулан УИХ-ын гишүүн Л.Болд, А.Сүхбат, Н.Тэмүүлэн нар ард түмнээс “Эрдэнэс Тавантолгой” компанийн 30 хувийг хувьчлахтай холбоотойгоор хувьцаа эзэмшигчдийг оролцуулахгүй байгааг, уурхайн ус ашиглалтын талаарх судалгаа, төлөвлөлт, боломжийн талаар, “Эрдэнэс Монгол” компанийг хувьчлахтай холбоотой гишүүдийн саналын талаар тодруулан Д.Сумъяабазар сайд болон Ажлын хэсгээс хариулт авав. УИХ-ын гишүүн Т.Аюурсайхан IPO гаргахтай холбоотой тооцоо, судалгааны талаар тодруулахын зэрэгцээ эхний ээлжинд бэлтгэл ажлыг хангаад энэ талаар УИХ-д танилцуулсны дараа шийдвэр гаргах тухайд Ажлын хэсэг ямар байр суурьтай байсныг асуун хариулт авсан юм. Мөн Х.Болорчулуун гишүүн үнэлгээтэй холбоотой асуудлаарх байр сууриа илэрхийлсэн бол Л.Энх-Амгалан гишүүн хувьцаа эзэмшигчдийн эрх ашгийг хангах, шийдвэр гаргахад оролцоог хангахтай холбоотой асуудал болон IPO гаргахтай холбоотойгоор компанийн засаглалыг сайжруулах шаардлагын талаар санал хэлж байлаа. Түүнчлэн компанийн үнэ цэнийг нэмэгдүүлэх зорилгоор IPO гаргахыг хүлээлгүй дэд бүтцийн асуудлуудыг шийдвэрлэх нь зүйтэй гэв.
Ийнхүү АН-ын бүлгийн завсарлага авсан Захиргааны хэргийн хууль болон Тавантолгойн асуудлууд хойшлогдож, хэзээ хэлэлцэгдэх нь тодорхойгүй боллоо. Захиргааны ерөнхий хуульд өөрчлөлт оруулах тухай хуулийн төсөл олон нийтийн дунд шүүмжлэлд өртөөд буй бол “Таван толгойн ордыг эдийн засгийн эргэлтэд оруулах ажлыг эрчимжүүлэх тухай” УИХ-ын тогтоолын төсөл хүлээлттэй байгаа юм.
