Монголын аялал жуулчлалын салбарын компаниуд болон Монголын аялал жуулчлалын холбоо, тус холбооны зөвлөлүүдээс өнөөдөр хэвлэлийн хурал зарлаж, аялал жуулчалын салбар, Засгийн газраас тавьж байгаа зорилго, үйлчилгээний бодит байдал, түүний хүртээмжийн асуудлыг удахгүй болох гэж байгаа наадмын суудал, үйл ажиллагаатай холбож тайлбар мэдээлэл хүргэлээ.
Жуулчдад олгогддог наадмын билет буюу Төв цэнгэлдэхэд 1500 суудал /нэмэлтээр +1000 цагаан сандал/ оногддог байна. Энэ билетийн тоог нээлт үзэх жуулчдынхаа тоотой харьцуулбал ердөө 20 хувьд нь л оногдож байгаа юм байна.
Энэ талаар Аялал жуулчлалын холбооны ерөнхийлөгч Д.Гантөмөр “…10 жуулчин авчраад хоёрт нь наадмын нээлт үзүүлээд найман жуулчнаа гадна үлдээх болдог. Маш олон дарга нар, албан тушаалтнууд наадмын нээлт үздэг. Тасалбарын хуваарилалт яаж явдаг талаар тодорхой мэдээлэл алга байна.
Энэ жил Монголд ирж буй жуулчдын тоо дунджаар 15-20 хувиар нэмэгдэж байна. Жил бүр 10 мянга орчим жуулчин наадмын нээлт үзэхээр захиалгаа өгдөг. Энэ онд 110 компанийн захиалга бүхий 12 мянга орчим жуулчид наадмын нээлтийг үзэх эрэлттэй байна.
Сүүлийн 10 гаруй жилийн хугацаанд энэ байдал яригдаж байгаа ч жил бүр асуудал гарсаар байна. Тиймээс холбогдох албан тушаалтнууд, Үндэсний их баяр наадмын зохион байгуулах хороо, Засгийн газар, Нийслэлийн Засаг дарга тэргүүтэй энэ асуудлыг хариуцаж байгаа албан тушаалтнуудад аялал жуулчлалын салбарынханд ахиж 1000 суудлыг 25 ам.доллароороо борлуулж, бидэнд хуваарилж өгөөч ээ гэж хүсье. Гэхдээ энэ нь хүлээлттэй байгаа эрэлтийг бүрэн хангаж чадахгүй. Тэгэхээр цаашид 2500, 3500 суудал болгож нэмэгдүүлж өгөөч ээ гэсэн хүсэлт, гуйлтыг тавьж байгаа юм. Жуулчид мөнгө оруулж ирнэ. Ажлын байр нэмэгдэнэ. Та бүхний үр хүүхэд жолооч, хэлмэрч, хөтөч хийнэ. Аялал жуулчлалыг хөгжүүлэхийн тулд биднийг дэмжээч ээ гэж хүсье. Наадамчин олон минь бас ойлгож, дэмжээч ээ гэж хүсье.” хэмээн учирлан гуйж байлаа.
Аялал жуулчлалын компаниудын зүгээс цагаан суудлыг өөрсдөө тохижуулъя гэсэн санал тавьсан ч наадам зохион байгуулах комиссоос 360 сая төгрөг шаарджээ. Харин тэдний туршлагаар бол 50 сая төгрөгт багтаан цагаан суудлуудыг тохижуулах бүрэн боломжтой аж.
Мөн мэдээллийн үеэр тэд наадмын комисс дээрх асуудлыг хүлээж авахгүй байгаа тохиолдолд ард түмнээсээ тусламж хүсч “Ард түмэн минь аялал жуулчлалыг дэмжиж, улс орноо сурталчлахад туслаач ээ гэж хүсмээр байна” гэлээ.
