Оросын Хэтийн төлвийн судалгааны сангийн мэргэжилтнүүд янз бүрийн байгууллагуудын захиалгаар дөрвөн хөлт роботуудын цувралыг зохион бүтээх санаачлагын хүрээнд роботуудыг хөгжүүлж эхэлжээ. Тус улсын Хэтийн төлөв судалгааны сангийн робот техникийн үндсэн элементүүд болон технологийг хөгжүүлэх үндэсний төвийн захирал Сергей Хурс оросын мэргэжилтнүүд америкийн Boston Dynamics-той адил төстэй “Федор” загварын роботыг бүтээж буй эсэх талаарх асуултад хариулахдаа “Одоогоор хэд хэдэн байгууллагын захиалгаар дөрвөн хөлт роботуудыг бүтээгээд байгаа бөгөөд энэ ажил одоогоор зөвхөн санаачлагын төвшинд явагдаж байгаа” хэмээн хариулжээ. Гэхдээ тэрээр яг ямар зориулалтаар эдгээр роботуудыг хөгжүүлж байгааг дурдаагүй байна.
Чулуурхаг, бартаат замыг саад бэршхшээлгүй даван туулах, шатаар өгсөх чадварууд нь дөрвөн хөлт роботны үндсэн давуу талууд юм. Цэргийн зориулалттай тагнуулч роботууд болон ачаа ачих зориулалттай иймэрхүү төрлийн роботуудыг дэлхийн олон улс зохион бүтээдэг аж.
Өнөөгийн байдлаар дэлхийн хамгийн алдартай дөрвөн хөлт роботууд бол Boston Dynamics компанид үйлдвэрлэгдсэн 150 кг-ын ачаа зөөх чадвартай “BigDog” робот болон 45 км цагийн хурдтай гүйж чаддаг “Cheetah” мөн янз бүрийн судалгаа шинжилгээ хийхэд зориулагдсан “LittleDog” роботууд юм. “BigDog” роботыг АНУ-ын Зэвсэгт хүчний захиалгад нийцүүлэн зохион бүтээсэн бөгөөд уг робот нь зэвсэгт хүчнийхний эд зүйлийг зөөх зориулалттай юм байна.
