Аадар бороо энэ сард бараг өдөр дараалан орж, үерийн аюул хаа сайгүй нүүрлээд буй. Үүнтэй холбоотойгоор маш олон эрсдэл, тэр дундаа хүний амь эрсдэх явдал гарсаар байна. Хамгийн сүүлд гэхэд Нийслэлийн Хан-Уул дүүргийн 11 дүгээр хороо, 81 дүгээр “В” байрны суурийн давхарт борооны ус соруулж байсан 43 настай иргэн Т /эрэгтэй/ цахилгаанд цохиулж унажээ. Энэ ослын тухай дуудлагыг авсан даруйдаа Нийслэлийн Аврах ангийн алба хаагчид 00:53 цагт очсон байна. Улмаар иргэн Т цахилгаанд цохиулан нас барсан байсныг гарган Цагдаагийн байгууллагад шилжүүлэн өгчээ.
Борооны улмаас гол усны түвшин эрс нэмэгдэж, үерлэсэн энэ үед гол нуурын усанд амиа алдах харамсалтай явдал ч гарсаар байна. Тухайлбал, Өвөрхангай аймгийн Бүрд сумын Ар хөшөөт багийн ‘’Олон нуурын гол’’ гэдэг газар тус аймгийн Хайрхандулаан сумын 17 настай иргэн Х /эрэгтэй/ нуурын усанд живж амиа алдсан байна. Энэ ослын талаар өчигдөр 18:10 цагт мэдэгдсэн бөгөөд тус аймгийн Онцгой байдлын газрын алба хаагчид орон нутгийнхны хамт хол замыг туулан 22:20 цагт очжээ. Гэвч тухайн үед үзэгдэх орчин хязгаарлагдсан тул өнөөдөр үүрийн 05:20 цагт эрэн хайх ажиллагааг эхлүүлж, улмаар “Олоннуур”-ын нуураас цогцсыг гаргаж, цагдаагийн байгууллагад шилжүүлэн өгөөд байна.
Баян-Өлгий аймгийн Өлгий сумын Хөх хад багийн “Найрамдал-Уул” гэдэг газар өнгөрсөн зургадугаар сарын 24-ний өдөр Ховд голд живсэн гэх 10 настай Ж /эрэгтэй/, 13 настай А /эмэгтэй/ нарыг эрэн хайх ажиллагааг зургадугаар сарын 25-ны өдрөөс энэ сарын 9-ний өдрийг хүртэл зохион байгуулсан боловч үр дүнд хүрээгүй юм. Тиймээс Баян-Өлгий аймгийн Онцгой байдлын газрын дарга, хурандаа С.Пүрэвсамдангийн шийдвэрээр 9-ний өдрийн 10:00 цагт эрлийг түр зогсоосон байв. Харин энэ сарын 21-ний өдрийн 09:00 цагт эрлийг дахин үргэлжлүүлэх хүсэлтийг ар гэрээс нь гаргасны дагуу Ховд, Баян-Өлгий, Увс, Говь-Алтай аймгийн Онцгой байдлын газрын алба хаагчид ажиллаж, 22-ны өдрийн байдлаар Бугат сумын Бугат багийн нутаг Хасбаатарын хөшөөнөөс Ногооннуур сумын Бахлаг багийн “Тавалтайн хавцал” гэдэг газар хүртэл “Ховд” голын усаар нийт 25 км-т эрэн хайх ажиллагааг зохион байгуулжээ. Энэ хугацаанд 9 удаа гүний шумбалт хийсэн боловч үр дүнд хүрээгүй тул 21:00 цагт мөн эрлийг зогсоов.
