УИХ-ын дарга М.Энхболдийн тухайд хэлэхэд энэ хүн хар багаасаа улс төрийн тогоонд чанагдаж явсан хүн байдаг. Тэрээр хамгийн анх намын анхан шатны байгууллагаас ажлын гараагаа эхэлсэн хүн юм билээ. Тэгж явсаар намын удирдах албан тушаалд очиж, яваандаа хотын дарга, УИХ-ын гишүүн, Ерөнхий сайдын албан тушаал хашиж байсан. Өдгөө Монгол улсын УИХ-ын даргын албыг хашиж байгаа. М.Энхболдын хувьд хэдийгээр албан тушаалд дуртай хүн мэт боловч улс төрийн амьдралыг нэлээдгүй сайн мэддэг хүн. Зарим хүмүүс энэ хүнийг нэг их сайн хүн гэж үздэггүйг бид бүхэн мэднэ. Газрын наймаагаар баяжсан хүн гэх нь их байдаг. Намынхан нь болохоор итгэл даах ухаантай хүн гэж магтацгаадаг юм билээ.
Тэрээр өнгөрсөн 2017 оны наймдугаар сарын 30-нд захирамж гаргаж ээлжит бус чуулган зарлаж байсныг хэн хүнгүй санаж байгаа байх. Энэхүү чуулганаар хэлэлцсэн гол асуудал нь Ерөнхий сайд Ж.Эрдэнэбат, түүний тэргүүлсэн Засгийн газрыг огцруулах эсэх асуудал байлаа. Чуулганы сүүлчийн өдөр МАН сонгуулийн үр дүнд байгуулсан Засгийн газраа бүрэн бүрэлдэхүүнээр нь огцруулаад тарж байсан бөгөөд огцруулах шалтгийг МАН дотроосоо гаргаж,байсан нь үнэн юм.
Харин одоо өнөөх 60 тэрбумын гэх дуулиант бичлэгээс болж УИХ-ын дарга М.Энхболд дахин ээлжит бус чуулган зарлах шахалтад ороод байна. Энэхүү шахалтыг Ерөнхийлөгчөөс гадна МАН-ын дарга У.Хүрэлсүхийн байгуулсан “Дэвшилтэт холбоо”-ын гишүүд үзүүлж байгаа бөгөөд хэрвээ ээлжит бусаар хуралдахдаа хүрвэл УИХ-ын дарга М.Энхболдыг огцруулах эсэхийг хэлэлцэж магадгүйг эх сурвалжууд хэлж байгаа. Өнөөдөр М.Энхболд гэдэг хүн МАН-ын дарга биш болсон. Нэг үгээр хэлбэл намын дарга биш болохоор түүний хүчин чадал бага гэсэн үг. Бас түүнийг одоо хэн ч өмөөрч чадахгүй.
Ямартай ч тэдний оролцсон алдарт 60 тэрбумын бичлэг нь олон хүний дургүйцлийг төрүүлсэн учраас М.Энхболд Ерөнхийлөгчийн сонгуулийн үеэр өвдөг шороодсон нь яахийн аргагүй үнэн бөгөөд тэрээр өөрөө ч үүнийгээ сайн мэдэж байгаа. 60 тэрбумынхан өөрсдөө болохоор уг бичлэгийг өмнөх хурлуудын яриануудыг нийлүүлж эвлүүлсэн бичлэг гэж ярьдаг ч өдгөө түүнд нь итгэх хүн тийм ч их олдохгүй л болов уу. Харин АТГ болон прокурорынхон болохоор уг бичлэгийг нотлох баримтын шаардлага хангахгүй гэдэг үгээр хаацайлж даарин дээр нь давс нэмж ард түмний уур бухимдлыг маш ихээр төрүүлсэн.
Саяхан хэд хоногийн өмнө УИХ-ын гишүүн Л.Оюун-Эрдэнэ УИХ-ын даргыг огцруулах талаар албан бичгийг М.Энхболдод өөрт нь өгч, АТГ-т өргөдөл гаргасан бөгөөд тэрээр ээлжит бус чуулганыг зарлан хуралдуулах шаардлагад 27 гишүүний гарын үсэг цуглуулсан гэдгээ наадмын өмнө мэдэгдсэн. Хуульд зааснаар УИХ-ын гишүүдийн гуравны нэгээс дээшхийн саналаар ээлжит бус чуулганыг хуралдуулж болдог ба энэ тоонд ердөө л 27 гишүүний санал хангалттай байдаг. Магадгүй МАН-ынхний хувьд 60 тэрбумын бичлэгт нэр дурдагдсан хүмүүст хариуцлага тооцох, эсвэл тэр хүмүүсийнхээ нэрийг цэвэрлэж авах нь ирэх 2020 оны сонгууль болоход жил хагасын хугацаа үлдсэн энэ үед чухал байж ч мэдэх юм.
Энэ бүхний эцэст дүгнээд хэлэхэд М.Энхболд болон түүний багийнхан өөрсдийгөө ингэж их өмөөрч хамаалах нь өөрт нь болоод намынх нь журмын нөхдөд нь асар их хортой бөгөөд тэд хэчнээн өөрсдийгөө өмөөрөөд тэд нарын үгэнд итгэх масс өдгөө хангалттай биш гэдгийг эртхэн ухаарч ойлгох нь юу юунаас чухал. Тэрэнд орвол М.Энхболд намынхаа зарим гишүүдийн шаардлагыг үг дуугүй хүлээж аваад УИХ дээр нээлттэй сонсгол хийж, хуулийн байгууллагуудын дүгнэлтийг сонсвол хамаагүй эрүүл харагдах бөгөөд хэрвээ бахь байдгаараа байгаад байвал намын гишүүдийнх нь итгэл ийм сул байгаа өнөөгийн нөхцөлд МАН 2020 оны сонгуульд ялалт байгуулна гэдэг тун бэрх байх болов уу гэсэн л нэг л таамаглал эндээс харагдаж байна.
