“Гэрэлт гудамж”-ны замыг хоёр хоногийн өмнө шатрын хөлөг мэт алаглуулан будаж өгсөн билээ. Тэгвэл өчигдрийн усархаг борооны уршгаар цагаан будаг нь урсчихсан байдалтай байна. Харин энэхүү замыг будаж өгсөн “Жоби” компанийнхан өнөөдөр хэвлэлийнхэнд товчхон мэдээлэл хийлээ.
“Жоби” төвийн ерөнхий менежер Б.Чингис “Жоби төвөөс 10 гаруй сая төгрөг зарцуулж энэ замыг будаж өгсөн. Будаг гүйцэт бэхжихийн тулд 4-5 хоног болох ёстой. Гэтэл тэр хугацаанд хүрч чадсангүй.
Мөн будгийг хоёр үе будах ёстой. Гэтэл зам нээх шаардлага тулгарсан тул хоёр үе явж чадаагүй. Бид цаг агаарын нөхцөл байдлыг харзнаж байсан ч ийм ширүүн бороо орно гэж тооцоолсонгүй. Бид улсаас болон нийслэлээс нэг ч төгрөг гаргаагүй, өөрсдөө замыг гоё болгоё гэж санаачлаад хийсэн ажил юм шүү. Тиймээс замыг дахиж будаж өгнө.
Худалдаа аж үйлдвэрийн танхимд С.Батболд даргыг хурал хийх үед манай компаниас “Бид замыг гоё болгоё өгье, зөвшөөрөл өгөөч” гэж хүсэхэд С.Батболд дарга зөвшөөрсөн. Манайх Герман технологийн будаг гаргадаг. Герман руу болсон үйл явдлыг баримтжуулаад явуулсан. Хариу хүлээж байна. Энэ замыг будахын тулд зам хаасан тул нийт иргэдээсээ уучлалт гуймаар байна. Бид Замын цагдаагийн газраас зөвшөөрөл авсан. Зөвшөөрөл авахын тулд будгаа лабораториор шинжлүүлж, үнэлэлт хийлгэсэн” гэв.
Энэ замыг будах ажил гүйцэтгэлийг нь Улаанбаатар зам засвар арчлалтын компаниас 15 хүний бүрэлдэхүүнтэй баг гарч хоёр өдрийн турш будаж өгчээ.
