Монголын бурхан шашинтны төв Гандантэгчинлэн хийдийн хамба лам Д.Чойжамцын нарийн бичгийн дарга Б.Бүрнээг яллагдагчаар татсан тухай эх сурвалж мэдээллээ. Эх сурвалжийн мэдээлж байгаагаар Хамба лам Д.Чойжамцын нарийн бичгийн дарга Б.Бүрнээ нь 2017 оны наймдугаар сард Их Хүрээ хийдийн хамба лам З.Санждоржийн биед халдан зодож танхайрсан хэргээр холбогдох байгууллагуудад шалгагдаж байсан бөгөөд тухайн үед “Даншиг наадам-Хүрээ цам 2017” шашин, соёлын наадмын тусгай хөтөлбөр авах, өгөх асуудлаас үүдэн тэдний хооронд маргаан гарсан талаар Их Хүрээ хийдийн зүгээс хэвлэлийн хурал зарлан мэдэгдэл хийж байв. Тухайн үед З.Санждорж хамба лам Д.Чойжамцын туслах Б.Бүрнээд гомдолтой байгаагаа илэрхийлж байсан бөгөөд тэрээр “Даншиг наадамд оръё, хөтөлбөр авъя гэсэн, өгөөгүй. Гадныханд хөл алддаг мөртлөө өөрсдийн лам нараа алчих гээд байдаг. Ийм байдлыг би үнэхээр жигшиж байна. Бурхны шашин ийм хэмжээнд хөгжиж байгаад би үнэхээр их ичиж байна. Үнэхээр итгэл алга.
Намайг олон удаагийн үйлдлээр зодож байгаа. Жанрайсэгийн урд, сүсэгтэн олны өмнө нам цохиод, хэдэн жилийн өмнө ухаан алдуулаад унагаж л байсан. Тэрний өмнө арваад жилийн өмнө болж байна, Далай ламыг ирэх үеэр бас зодуулж тархиндаа гэмтэл аваад гурван жил эмчлүүлсэн. Би нуугаад л явдаг байсан. Шашны нэр хүнд, нэр төрөө бодоод за яршиг даа гээд яваад байсан. Одоо хэрээс хэтэрч байна. Цагдаад гомдол гаргахаар хэрэг үүсгэсэн болоод, эд нар удахгүй хаалгачихдаг. Бүр сурчихсан улс. Би эрүүгийн цагдаа дуудъя гэсэн. Эд нар дээрээ Ерөнхийлөгч гээд хамаг том хүмүүсээр хамгаалуулдаг. Ерөөсөө даварчихсан. Бид зодож болно, бидний муу үйлдлийг хамба бүгдийг хаадаг, хамгаалдаг. Бид яасан ч хамаагүй гээд ойлгочихсон. Хамбын нарийн бичиг Бүрнээ бол ерөөсөө тэгээд ойлгочихсон. Манай хамба Ерөнхийлөгч, Ерөнхий сайдыг танина. Цагдаагийн бүх даргыг танина. Баянголын бүх даргыг танина. Та нарыг яасан ч хамаагүй гэсэн бодолтой биднийг олон жил биднийг дээрэлхэж дарамталж байна” гэж байв. Тэгвэл уг асуудалд холбогдох эрүүгийн хэргийг хянасан Баянгол дүүргийн прокурор түүнийг яллагдагчаар татах хэвээр шийдвэрийг хэвээр үлдээсэн байна.
