МАН-ын Хяналтын хорооны дарга Д.Батбаатар нарын гишүүд, албан тушаалтнуудын сахилга, хариуцлагын талаар мэдээлэл хийлээ.
Энэ талаар Хяналтын хорооны дарга Д.Батбаатар “Намын боловсон хүчний бодлого алдагдаж, намын нэр хүндэд нөлөөлж байна. Иймд намын боловсон хүчинд анхаарах хэрэгтэй.
Гишүүдээс гарч байгаа түгээмэл саналыг багцлаад хэлэхэд, сүүлийн хоёр сонгууль дамнан яригдаж байгаа 60 тэрбумын гэх асуудалд их эмзэг хандаж байна. Мөн төрийн тодорхой албан тушаалд томилогдсон хүмүүс намын нэр хүндийг унагааж байна гэх шүүмжлэл гарч байлаа. Гуравдугаарт оффшор дансны асуудалд манай намын гишүүд холбогдвол хууль хяналтын байгууллагаар шалгуулж, эцсийн байдлаар тэр асуудалдаа холбогдолтой эсэхийг тодруулмаар байна гэсэн санал гарсан.
Түүнчлэн тодорхой хэвлэл мэдээллийн хэрэгслээр зарим гишүүдийн талаар гүтгэлэгийн шинжтэй мэдээлэл гарч байгаагаас гишүүдээ хамгаалах асуудал бас яригдсан. Хяналтын хорооны зүгээс үйл ажиллагаагаа эрчимжүүлж гишүүдийн сахилга хариуцлагыг нэмэгдүүлэх чиглэлээр, ялангуяа УИХ-ын гишүүдийн сахилга хариуцлагыг нэмэгдүүлэх, эв нэгдлийг бэхжүүлэх асуудлаар намын дарга, УИХ дахь намын бүлэгт шаардлага тавина.
Нийслэлийн МАН-ын хороо хурлаа хуралдуулж чадахгүй байгаа. Үүн дээр бидний зүгээс онцгой анхаарал хандуулж байгаа. Ер нь бол намын гишүүдийг намынхаа нэр хүндийг хамгаалах тал дээр идэвх санаачлагатай ажиллахыг зөвлөнө. Үүний хажуугаар намын нэр хүндэд сэв суулгаж байгаа зарим сонгуульт ажилтнуудад хатуу хариуцлага тооцно.” гэлээ.
Тус намын Хяналтын Ерөнхий хороо нийт 21 аймаг, есөн дүүргийн гишүүдээ сургалтад хамруулж, тэдний санаа бодлыг сонсох арга хэмжээг зохион байгуулжээ.
Хууль хяналтын байгууллагад шалгагдаж байгаа гишүүдийн тухайд хууль хяналтын байгууллага, төрийн ажил явдгаараа явна. Харин бид нам дүрмийнхээ хүрээнд хариуцлагын арга хэмжээг дотооддоо хэрэгжүүлнэ гэсэн байр суурийг Хяналтын хорооноос илэрхийллээ. Харин 60 тэрбумын асуудалд нэр холбогдсон хүмүүст өөрсдийнхөө байр суурийг намын гишүүд болон нийт ард түмэнд үнэн бол үнэн, худлаа бол худлаа гээд илэрхийлэх нь зүйтэй гэсэн шаардлагыг хүргүүлээд байгаа юм байна.
Намын хяналтын хорооны ээлжит хурлыг ирэх пүрэв гаригт хуралдуулахаар болсон аж. Үүнтэй холбоотойгоор МАН-ын гишүүд дэмжигчдэд хандаж “Бидний итгэлийг даасан, аймаг нийслэлийн бүх төвшинд төрийн албанд ажиллаж байгаа албан тушаалтнуудын ёс зүйтэй холбоотой баримттай асуудал байх юм бол Намын хяналтын хороо, аймаг нийслэлийн хяналтын хороонд ойрын өдрүүдэд мэдэгдэхийг хүсч байна.” хэмээн мэдэгдлээ.
