МАН-ын Хяналтын Хорооны дарга Д.Батбаатар хэвлэлийн бага хурал зарлаж, тус хорооны хурлаар хэлэлцсэн асуудлын талаар мэдээлэл өгч, “60 тэрбум”-ын асуудлаар МАН-ын байр суурийг илэрхийллээ. Тэрээр уг асуудалд МАН оролцоогүй гэдгээ хариуцлагатайгаар мэдэгдэв.
МАН-ын Хяналтын хорооны хурал хоёр өдөр хуралдсан байна. Тус хурлаар МАН-ын ёс зүйн хорооноос оруулж ирсэн 60 тэрбумын бичлэгтэй нэр холбогдсон Ц.Сандуй, М.Энхболд, А.Ганбаатар нарт хариуцлага тооцох эсэх асуудлыг хэлэлцжээ.
Энэ талаар Д.Батбаатар “Өнөөдөр МАН-ын Хяналтын ерөнхий хорооны хуралдаанаар Ц.Сандуй, Ганбаатар, М.Энхболд нарын ёс зүйн алдаа гаргасан гэж үзэж, ёс зүйн хариуцлага хүлээх ёстой гэсэн дүгнэлт гаргалаа. А.Ганбаатар, Ц.Сандуй нар хууль бус асуудлыг судалж, ийм зүйл хийснээ хүлээн зөвшөөрсөн. Иймд намын Бага хурлын гишүүнээс хасах хүртэл арга хэмжээ авч болно. Үүнийг харьяа намын хорооны байгууллагад нь тавихаар болсон. Харин УИХ-ын дарга М.Энхболдод ёс зүйн хариуцлага тооцох асуудлыг Удирдах зөвлөлд танилцуулна.” гэлээ.
Г.Доржзодов МАН-ын ёс зүйн хороонд хандсан байгаа. Түүний гомдол нь 60 тэрбумын бичлэгт нэр холбогдсон хүмүүст хариуцлага тооцох тухай байв. Энэ хүсэлтийг хэлэлцээд, 60 тэрбумаар албан тушаал үнэлэх ажил хийгдээгүй, түүнчлэн Ёс зүйн хорооны саналаар дээрх гурван гишүүнд хариуцлага тооцохоор болсон тул Г.Доржзодовын хүсэлтийг хэлэлцэх шаардлагагүй гэж үзсэн байна.
Хурлаар хэлэлцсэн бас нэг асуудал бол Д.Гантулга МАН-аас УИХ-д сонгогдоод гэмт хэрэгт холбогдсон тухай байлаа. Хяналтын ерөнхий хороо Д.Гантулгатай уулзаж, гэмт хэрэгт нэр холбогдсон нь намын нэр хүндэд халдаж байгааг анхааруулсан байна. Д.Гантулга ёс зүйн хариуцлага хүлээж, УИХ-аас татгалзсан гэдгийг Д.Батбаатар хэвлэлийн хурлын үеэр тодотгосон юм.
Мөн Хяналтын хорооны хурлаар Ховд аймгийн Засаг даргын орлогч Ш.Батсүхийн нэр дээр ирсэн гомдлыг хэлэлцжээ. Ховд аймгийн намын хорооны 38 дугаар Бага хурал дээр Ш.Батсүх хэлэлцэж буй асуудлыг өөрт ашигтайгаар шийдүүлэхийн тулд намын гишүүдэд шан харамж амласан нь илчлэгджээ. Иймд Ш.Батсүхэд ёс зүйн хариуцлага тооцох, цаашид улс төрийн дэмжлэг үзүүлэхгүй байх, улс төрийн дэмжлэгээр олсон ажил албатай нь хариуцлага тооцох ёстой гэж үзсэн байна.
Ингээд намын нийт гишүүдийн ёс зүй, сахилга хариуцлагыг дээшлүүлэх, нийслэлийн намын хорооны гишүүд эвтэй байх, хурлаа товлосон хугацаанд хийх гэх мэт заалтуудыг тусгасан тогтоолыг МАН-ын Хяналтын хорооны хурлаас гаргажээ.
