Налайх дүүргийн Сайн номуун хийдээс жил бүр сүсэгтэн олонд зориулж “Бумбаны их тахилга”-ыг зохион байгуулдаг уламжлалтай. Энэ жилийн “Бумбаны их тахилга” энэ сарын 10-12 өдрүүдэд болж байгаа бөгөөд нээлтийн үйл ажиллагаа өнөөдөр боллоо. Нээлтийн үйл ажиллагаа “Цам харайх” ёслолоор эхэлсэн юм. “Цам харайх” ёслолын дараа уртын дуучин н.Мөнхбаатар сүсэгтэн олонд зориулж “Үлэмжийн чанар” дууг дуулж сонирхуулж цугласан олны сонорыг мялаалаа. “Бумбаны их тахилга”-ын нээлтийн ажиллагаанд “Сайн номуун” хийдийн Хамба лам, Доктор С.Нэргүй, Налайх дүүргийн Засаг дарга Ч.Раднаабазар болон сүсэгтэн олон оролцов.
Бумбаны тахилгаар зургаан төрлийн бурхадын Их бумбыг нэг дор гурван хоногийн турш тахидаг уламжлалтай
“Сайн номуун” хийдийн Хамба лам Доктор С.Нэргүй “Бумбаны их тахилга”-ыг нээж үг хэллээ. Тэрээр “Энд хуран цугларсан сүсэгтэн олон ард иргэдийнхээ амар мэндийг айлтган мэндчилж байна. Бурхан шашны Сайн номуун хийдээс жил бүр уламжлал болгон зохион байгуулдаг “Бумбаны их тахилга” зургаа дахь жилдээ зохион байгуулагдаж байгаа. Жил бүрийн бумбаны тахилгаар зургаан төрлийн бурхадын Их бумбыг нэг дор гурван хоногийн турш тахидаг уламжлалтай. Дарь эхийн бумба, Гонгор, Намсрай, Замбала, Лус, Эдийн бумба гэсэн зургаан төрлийн бумбыг тахидаг уламжлал болсон энэ тахилга өнөөдөр эхэлж байна.
Эдгээр зургаан төрлийн бумба нь голлох ахуйн шүтээнтэй холбогдолтой байдаг учраас айл өрхүүд гэр орондоо голчлон тахиж шүтдэг. Иймээс эдгээр зургаан бумбаны тахилгыг гурван хоногийн турш гаргасан хуваарийн дагуу уншиж, зан үйлийг хийдэг. Уншлага номын явцын дунд бумбаныхаа тайлбарыг тухай бүрд нь тайлбарлаад явна. Энэ бэлгэ дэмбэрэлтэй өдөр хамтын буян хураахаар хуран цугласан сүсэгтэн олон та бүхнийг хишиг буян хуурайлж, хүсэл зорилго нь үргэлж мандан бадарч дээшилж байхын өлзийтэй ерөөлийг дэвшүүлж, бумбаны тахилгын ёслолын арга хэмжээг эхлүүлж байна”. хэмээн айлдлаа.
Сайн номуун хийд иргэдийнхээ тав тухтай байх нөхцөлийг маш сайн бүрдүүлсэн байна
Үүний дараа Налайх дүүргийн Засаг дарга Ч.Рандаабазар үг хэлсэн юм. Тэрээр хэлсэн үгэндээ “Сайн номуун хийдээс жил бүр уламжлал болгон зохион байгуулдаг “Бумбаны их тахилга”-ын арга хэмжээ зургаа дахь жилдээ явагдаж байгаа. Энд сүсэгтэн олны буян хишиг болон эрүүл энх байхыг уламжилж гурван өдөр хуран цугладаг. Сүсэгтэн олон үр хүүхэд, ач зээ нартайгаа бүгдээрээ бумбаны тахилгад ач холбогдол өгч хүрэлцэн ирсэн та бүхэндээ талархал илэрхийлж байна. Сайн номуун хийдийн зүгээс зохион байгуулалт сайтай, иргэдийнхээ тав тухтай байх нөхцөлийг маш сайн бүрдүүлсэн байна. Иймээс Сайн номуун хийдийн хамт олонд нийт сүсэгтэн олон түмнийхээ өмнөөс баярлаж, талархаж байгаагаа илэрхийлж байна” гэв.
Ингээд Бумбаны их тахилгын уншлагыг Дарь эx, Лус, Замбала бурхадын тахилгаар эхлүүллээ. Бумбаны их тахилгад оролцож байгаа сүсэгтэн олон сэтгэл хангуулан байгаагаа илэрхийлж байв.
Учир нь Сайн номуун хийдийн зүгээс сүсэгтэн олонд зориулж том асар барьж, сүсэгтэн олны тав тухтай байдлыг хангаж өгсөн байлаа. Энэ үеэр тахилгад оролцож байгаа иргэдийн сэтгэгдлийг сонссон юм.
Бумбаны тахилга жил бүр их сайхан болдог
Налайх дүүргийн 1 дүгээр хорооны иргэн Б.Наранцэцэг:
-Налайх дүүргийн Сайн номуун хийдээс жил бүр Бумбаны их тахилга зохион байгуулдаг. Миний хувьд их тахилгад дөрөв дэх жилдээ оролцож байгаа. Бумбаны тахилга жил бүр их сайхан болдог. Энэ жилийн хувьд ч гэсэн гоё болж байна. Өнгөрсөн жилүүдэд Сайн номуун хийдийн урд талбайд болдог байсан. Энэ жил маш том асар барьсан байна. Иргэдийн хувьд ч гэсэн их ирсэн байна. Аймаг орон нутгаас хүмүүс ч их ирсэн байна. Манай хүүхэд уул уурхайд ажилладаг болохоор манайх Лусын бумба тахидаг. Нээлт, хаалт ч гэсэн их өвөрмөц болдог. Миний хувьд их сэтгэл хангуулан оролцож байна.
Сайн номуун хийдээс зохион байгуулж байгаа Бумбаны их тахилгад анх удаа оролцож байна
Сонгинохайрхан дүүргийн иргэн Ш.Дуламсүрэн:
-Миний хувьд Налайх дүүргийн Сайн номуун хийдээс зохион байгуулж байгаа Бумбаны их тахилгад анх удаа оролцож байна. Өмнө нь Амарбясгалант хийдийн бумбаны тахилгад явдаг байсан. Энэ жилээс энд ирж байна. Энэ их гоё, зохион байгуулалт сайтай, иргэд болон сүсэгтэн олныхоо тав тухтай байдлыг сайн хангаж өгдөг юм байна. Гурван өдөр Бумбаны их тахилгад оролцоно доо”.
Энэ жилийн хувьд сүсэгтэн олныхоо ая тухтай байдлыг сайн хангасан байна
Налайх дүүргийн тавдугаар хорооны иргэн Д.Мөнхдорж Бумбаны их тахилгад дөрөв дэх жилдээ оролцож байгаа аж. Тэрээр Монголын ард түмнийг сайн сайхан байлгах талаас бүх зүйлийг хийдэг учраас энэ тахилгад байнга оролцдог юм байна. Жил ирэх тусам өргөжөөд их гоё болдог хэмээн сэтгэгдлээ бидэнтэй хуваалцаад, энэ жилийн хувьд сүсэгтэн олныхоо ая тухтай байдлыг сайн хангасан байна гэдгийг онцлон хэлсэн юм.
