Жижиг талбайтай боловч оновчтой зохион байгуулалттай, нэг гэр бүлийн хэрэгцээнд нийцсэн амины орон сууцны төсөв өртгийг тооцсон зөвлөмжийг хүргэе. Сууцны төсвийг гаргахдаа ашиглагдах гол материалуудын зах зээл дээрх бодит үнэ ханшийг үндэслэн энэхүү зөвлөгөөг БАРИЛГАЧИН ГРУПП-ээс бэлтгэлээ.
Объектын товч тодорхойлолт
Энэхүү барилга нь 67 ам метр талбайтай нэг давхар шувуу нуруун дээвэртэй амины орон сууц юм. Залуу гэр бүлд зориулан жижиг талбайтайгаар төлөвлөсөн ч зочны өрөө, гал тогоо, үүдний өрөө, унтлагын өрөө, хүүхдийн өрөө болон ариун цэврийн өрөөнүүдийг бүгдийг нь багтаасан байна.
Барилгын хэмжээ нь тэнхлэгээрээ 8,5х7,9м харьцаатай ба шугаман суурьтай, шувуун нуруун дээвэртэй бетон шалтай, евроблокон хана дүүргэлттэй. Нягтрал сайтай 10 см дулаалгатай, дээврийн дулаалгыг мөн сайн нягтралтай 10 см зузаан эрдэст хөвөн хавтангаар тооцож, барилгын төсөвт өртгийг зах зээлийн бодит үнэ ханшаар тооцож гаргалаа.
Барилгын төсвийн тайлбар
Төсөвт өртгийг 67 ам метр талбайтай, Европ хэв маягийн амины орон сууцны гүйцэтгэлийн зураг дахь тоо хэмжээг үндэслэн тооцов. /Төсөвт өртөг 43,477,900 төг/
Тухайн сууцны төсвийг зохиохдоо төсвийн үндсэн зардлуудыг зургийн дагуу ажлын тоо хэмжээг тооцож, ажлын нэр болон хэмжих нэгжид тохируулан үе шатны ажлын жагсаалтыг гаргаж, төсвийн суурь нормын үндэслэлүүд (шифр) болон жишиг үнэ, машины цагийн үнэ, тарифыг үндэслэхгүйгээр зах зээлийн бодит үнэ ханшаар тооцоолохыг эрмэлзэв.
Барилга угсралтын ажилд ажиллах хүчний зардлыг ажлын үе шат тус бүр дээр 2018 оны гүйцэтгэлийн бригадуудын нэгж ажил гүйцэтгэлийн үнэлгээг ажлын тоо хэмжээгээр үржүүлэн тооцов.
Тус төсөвт захиалагчийн хяналтын зардал, зохиогчийн хяналтын зардал, норм нормативын сан, магадлашгүй ажлын зардлуудыг тусгаагүй болно.
Материалын зардлыг барилгын материалын зах, дэлгүүрийн болон үйлдвэр, ханган нийлүүлэгч компаниудын 2018 оны 5,6 сарын байдлаар тооцож, ажлын тоо хэмжээнд үндэслэж гаргав. Материалын зардалд НӨАТ-ыг багтаан тооцсон.
Төсөвт тээврийн зардлыг автомашинаар хот доторх ачаа тээвэрлэгч хувь хүн, албан байгууллагын 2018 оны жишиг үнийг үндэслэн тооцож, нийт материалын тээврийн зайг 20 км-ээр тооцов.
Зарим үе шатны ажлуудын материалын жин, овор хэмжээ бага тул тээврийн зардлыг тооцоогүй. Мөн бетон зуурмагийн үндсэн үнэд тээврийн зардал багтсан учир тооцоогүй болно.
Амины орон сууцтай болохоор төлөвлөсөн уншигч та юун түрүүнд барилгын инженер, мэргэжилтнүүдээс зөвлөгөө авч, анхнаас нь төлөвлөлтөө сайн гаргуулж, барилгын материалаа ч зөв сонгох нь чухал шүү. Ингэснээр хойшид ашиглалтын явцад элдэв хүндрэл учрахгүй, сууцны тань ашиглалтын хугацаа ч урт байх давуу талтай.
Эх сурвалж: “Барилга.МН” сэтгүүл /Линк: http://news.barilga.mn/r/73683 /
