Монголын багш нарын үйлдвэрчний эвлэлийн холбооны дарга Д.Мөнхбаатар хэвлэлд өгсөн ярилцлагадаа БСШУС-ын сайд Ц.Цогзолмааг огцруулах хүртэл тэмцлийн арга хэмжээ авахаар болсон тухай ярьжээ. Үүний шалтгааныг олон талаар тайлбарлаж байна. Тухайлбал, Багшийн мэргэжил дээшлүүлэх институтийн ажилтнуудыг хомроголон халах тухай шийдвэр гарчээ. Энэ шийдвэр хүчин төгөлдөр биш гэдэг үндэслэлээр Захиргаа, иргэний шүүхээр Багш нарын үйлдвэрчний эвлэлийн холбоотой хамтран институтийн ажилтнууд тэмцэхээр болжээ. Ирэх долоо хоногт тэд БСШУС-ын сайдыг энэ үйлдлээ зогсоох, албан тушаалаасаа огцрох шаардлага тавих гэнэ.
Тодруулбал, Багшийн мэргэжил дээшлүүлэх институт нь Монголын багш нарын үйлдвэрчний холбооны гишүүн байгууллага юм. Багшийн мэргэжил дээшлүүлэх институтийн 70 ажилтны 68-ыг нь ажлаас чөлөөлөх мэдэгдэл өгсөн байна.
Зургадугаар сард батлагдсан Багшийн хөгжлийг дэмжих тухай хуулиас улбаалан тус институт бүтцийн өөр хэлбэрээр ажиллах шаардлагатай болсон гэж үзээд, салбарын сайд 2018 оны наймдугаар сарын 1-нд А482 тоот тушаал гаргасан аж. Үүний дагуу Багшийн мэргэжил дээшлүүлэх институтийн захирлын үүрэг гүйцэтгэгч н.Сүрэнчимэг шинэ хүмүүс авна гэж орон тооны бүтцийг задлахдаа ажлаас чөлөөлөх мэдэгдлийг өгчээ. 
Харин үүнийг институтийн ажилтнууд хууль бус шийдвэр гэж үзэх болсон шалтгаанаа тайлбарлахдаа, үүрэг гүйцэтгэгч хариуцлага хүлээхгүй учраас бүтцийн өөрчлөлт нэрээр, ямар нэгэн судалгаа дүгнэлтгүй, төрийн албаны тогтвортой байдлыг хадгалж чадаагүй, боловсролын салбарын өнөөгийн бүтэцтэй уялдуулж чадаагүй хууль бус шийдвэр гаргаж, энэ олон ажилтныг хомроглон халж байна гэж байгаа юм.
Тиймээс тэд Багшийн мэргэжил дээшлүүлэх институт дээр үйлдвэрчний эвлэлийн холбоогоо албан ёсоор байгуулж, бичиг баримтаа авсны дараа хөдөлмөрийн хамтын маргаан үүсгэж, улмаар тэмцлийн бүх арга хэмжээг авахаар болсон байна. Ер нь Багшийн мэргэжил дээшлүүлэх институтэд хэн ажиллаж энэ шударга бус байдал бий болоод байна вэ гэдэг асуудлыг гаргаж тавих аж. Ц.Цогзолмаа сайд боловсролын энэ том бүтцийг мэргэжлийн ур чадвартай удирдаж чадахгүй байгаагийн зэрэгцээ хувийн ааш араншингаар зохицуулж байна гэж мөн нэмж тайлбарласан байна. Энэ талаар жишээ дурьдахдаа тэрээр “Багшийн мэргэжил дээшлүүлэх институт дээр Ц.Цогзолмаа сайд өчигдөр ажилласан. Хичээл эхлэх гээд сургалтууд явагдаад, ачаалалтай ажиллаж байгаа дөрвөн мэргэжилтнийг “Босож мэндэлсэнгүй” гэдэг шалтгаанаар “Энэ нөхдийг ажлаас нь хал” гэж хэлээд гараад явсан.” гэжээ.
Ийнхүү ирэх долоо хоногоос БСШУС-ын сайд Ц.Цогзолмааг албан тушаалаасаа өөрөө огцрох шаардлага хүргүүлж, тэмцлийн үйл ажиллагаагаа эхлүүлэхээр болсныг Багш нарын ҮЭХ-ны дарга Д.Мөнхбаатар хэллээ. Боловсролын салбар улс төрийн бохир тоглоомд орсон гэдгийг тэрээр дурьдаад үүнээс гаргахын төлөө Монголын багш нарын цалин нэмүүлэх хөдөлгөөн, Багшин цалин нэмүүлэх түр хороо, Монголын багш нарын үйлдвэрчний эвлэл тэмцлийн үйл ажиллагаа явуулж байгаагаа мэдэгдээд байна.
БСШУС-ын салбарт нийт 70 гаруй мянган хүн ажиллаж байгаагийн 90 гаруй хувийг нь цэцэрлэг, ерөнхий боловсролын сургуулийн багш, ажилтан эзэлдэг байна.
