Баянхонгор аймгаас УИХ-д сонгогдон төр түшилцэж яваа М.Билэгт гишүүний эргэн тойронд сүүлийн хэдэн өдөр тасралтгүй шүүмжлэл, шог гараа өрнөж сүүлдээ “бакал” Билэгт гэх нэрийг хүртэл зүүх дээрээ тулсан. Тэрээр тойрогтоо очиж ажиллах үеэрээ нутгийн иргэдэд данх, бакал, хивс гэх мэт эд зүйлс бэлэглэж, сугалаа явуулжээ. Үүнийг зарим хүн хууль зөрчсөн үйлдэл гэж үзэж байгаа бол М.Билэгт гишүүн олон нийтийн сүлжээгээр дамжуулан дараах тайлбарыг өгсөн байна.
Тэрээр “Олон нийтийн сүлжээгээр над руу дайрч, доромжилсон янз бүрийн пост хийж, зарим нэг нь зориудаар хуурамч хаягуудаас дураараа л муулж, намайг муухай харагдуулах бүхий л оролдлогыг хийж байх шиг байна. Сонгогчдынхоо хүүхдүүдэд жил бүр хувийн зүгээс хичээлийн хэрэглэл гардуулдаг юм. Энэ нь ч уламжлал болчихсон. Нөгөөтэйгүүр малчдад хамгийн их хэрэгцээтэй байдаг бакал гутлыг цөөхөн ч гэсэн хүнд “өгчих юмсан” гэж ямар нэгэн атгаг санаа агуулахгүйгээр өгчихсөн минь буруудаад байх зүйл биш гэж бодож байна. Цайгаа уудлаад уух, дэвсээд суух хивс, данх өгчихье гэж бодсон.
20 гаруй жил халуунд халж, хүйтэнд хөрч бий болгосон зүйлээсээ хэдэн хүүхдүүдэд хичээлийн хэрэглэл, цөөхөн малчинд гутал өгөхөд надаас нэг их юм уначихгүй байх.
Намайг “Билэгт авгай, арчаагүй, новш…” гэх мэтээр, бүр данхан дээр зохион байгуулалттайгаар фотошопдож миний зургийг хүртэл зурж нийтэлсэн байна билээ. Яах вэ. Та бүхэн намайг юу ч гэж хэлж болно.
Олон хүнийг уулзалтад урьж, сонирхолтой байлгах үүднээс уулзалт зохион байгуулж байгаа хүмүүс маань сугалаа маягаар явуулсанг нь буруутгаад байх шиг байна. Сугалааны хувьд хаа сайгүй л явагддаг зүйл. Залуус өөрийнхөө азыг сорьж үзье гээд идэвхтэй оролцдог. Ингэснээрээ буруудна гэж юу байх вэ дээ л гэж бодож байна. Шүүмжлэлд эмзэглээд байх юм алга.” гэжээ.
Мөн түүний өмссөн цоохор хөх дээл Ерөнхийлөгч Х.Баттулгын цоохор дээлтэй адилхан гэж бас нэлээд шоглосон. Тэгвэл тэр цоохор хөх дээлийг тэрээр Ерөнхийлөгчийн сонгуулиас ч өмнө хийлгэсэн гэж хэлж байна. Биед нь эвтэйхэн, гарын ая даадаг, материал нь таалагддаг, зөөлөн, дулаахан учраас хөдөө гадаа өмсөж явах дуртай юм гэнэ. Харин баяр ёслолын арга хэмжээнд ягаан дээлээрээ гангардаг юм байна шүү.
