Нийслэлийн нийтийн тээврээр зорчигчид хөлс төлөлт цахим төлбөрийн хэрэглээнд шилжээд багагүй хугацаа өнгөрсөн хэдий ч иргэд бэлэн мөнгөөр зорчих асуудал гарсаар байгаа билээ. Иргэдийн зүгээс энэ нь карт цэнэглэх газар хомс байдагтай холбон тайлбарладаг.
Тэгвэл Нийслэлийн Тээврийн газрын Автотээврийн хяналтын улсын байцаагч нар, “Улаанбаатар смарт карт” ХХК-ийн мэргэжилтнүүд, Зорчигч тээврийн нэгтгэл ОНӨААТҮГ болон Сити баз консалтинг ХХК-ийн шалгагч нар хамтран нийтийн зорчигч тээврийн үйлчилгээний хөлс төлөлтийн байдалд хяналт тавих нэгдсэн удирдамжтай шалгалт явуулж байна.
Шалгалтаар:
- Тухайн чиглэлийн дагуух бүх автобусны зогсоолуудад зорчигчдод зориулсан мэдээлэл, санамж тараах
- Зөрчил гаргахаас урьдчилан сэргийлэх зөвлөгөө өгөх
- Автобус бүрт тухайн өдрийн турш шалгагч нар хяналт тавих
- U money карт цэнэглэх гэрээт цэгүүдийн байнгын бэлэн байдлыг хангуулах, үйл ажиллагаанд хяналт тавих
- Зөрчил гаргасан зорчигчид арга хэмжээ тооцох ажлыг зохион байгуулж ажиллаж байгаа аж.
Мөн иргэд, зорчигчдыг бэлэн мөнгөөр зорчуулсан жолоочид “Зөрчлийн тухай” хуулиар хариуцлага тооцож байгаа юм байна.
Энэ сарын 20-ны өдрөөс 25-ны өдөр хүртэл 5 хоногийн туршид зохион байгуулсан шалгалтын явцад нийтийн тээврээр зорчиж буй 11 481 зөрчилтэй иргэнийг тээврийн хэрэгслээс буулган, ухаалаг картаар зорчихыг зөвлөж, үлдэгдэл хүрэлцэхгүй байсан смарт картанд 9820 удаа цэнэглэлт хийж, 9700 хүнд мэдээлэл өгч, 10 998 хүнд санамж тарааж ажиллажээ.
Есдүгээр сарын 1-н хаяанд ирж хөл хөдөлгөөн их байгаа тул бэлэн мөнгөөр зорчих иргэд ихэссэн. Иймд “Улаанбаатар смарт карт” ХХК, “Сити Баз Консалтинг” ХХК-ийн ажилтнууд хамтран карт цэнэглэхгүй байгаа автобусны буудлуудад зөөврийн машинаар иргэдийн картыг цэнэглэж эхлээд байна.
Мөн смарт картын цэнэглэлтийн үйлчилгээг сайжруулах зорилгоор 24 цагаар ажилладаг Circle K, CU сүлжээ дэлгүүрүүдтэй гэрээ байгуулан ажиллаж байгаа аж. Ингэснээр зорчигчид 24 цагийн турш картаа цэнэглүүлэх боломжтой болжээ.
