УИХ-ыг тараах гарын үсэг цуглуулах ажиллагааг өнөөдөр албан ёсоор эхлүүлж байгаа талаар иргэний нийгмийн хөдөлгөөнүүд мэдээллээ. УИХ-ыг тараах ямар боломж байгаа вэ гэдэг дээр тэд Үндсэн хуулийн 3.1-д заасан “Монгол Улсад засгийн бүх эрх ард түмний мэдэлд байна” гэсэн заалтын дагуу ард түмэн энэхүү эрх мэдлээ эдэлж, төрийг удирдах үйл хэрэгт шууд болон төлөөллийн байгууллагуудаараа дамжуулан оролцож болно хэмээн тайлбарлалаа. Тиймээс өнөөдрийн амьдралдаа сэтгэл дундуур байгаа иргэд энэ нийгмийг өөрчлөгдөх ёстой гэж үзэж байгаа бол томилсон хүмүүсээ буцаагаад эгүүлэн татах бололцоо бидэнд байх ёстой хэмээн хэвлэлийн хурлын агуулгаа танилцуулсан юм.
Хэвлэлийн хуралд “Эргэн мандуулах хүчин”-ий УЗ-ийн дарга Б.Батсайхан, “Босоо хөх Монгол” ТББ-ын тэргүүн П.Шинжээравдан, “Гал үндэстэн холбоо”-ны тэргүүн Ц.Мөнхбаяр, “Их цааз-Их эргэлт“ хөдөлгөөний идэвхтэн гишүүд, дэмжигчид болон тус хөдөлгөөнийг дэмжиж буй иргэний хөдөлгөөний удирдлагууд, гишүүд, дэмжигчид оролцлоо.
Мэдээллийн үеэр “Эргэн мандуулах хүчин”-ий УЗ-ийн дарга Б.Батсайхан “1990 онд гарсан Ардчиллаар бидний олж авсан ганц том эрх бий. Энэ нь үндсэн хуулийн 3.1-т заасны дагуу улс орноо удирдах эрх мэдлийг бүрэн олж авсан. Уг эрхийг хэрэгжүүлэх талаар хоёр заалт байдаг. Үүнд, улсаа удирдах ажилд шууд оролцох, мөн нөгөөдөх нь сонгуулиар дамжуулж оролцох. Харамсалтай нь долоон удаагийн сонгуулийн дараа ийм байдлаар улс орноо хөгжүүлж, шинэчлэх боломжгүй юм байна гэдгээ ойлголоо. Өнгөрсөн хугацаанд ард иргэдийн амьжиргаа, газар нутаг, төрийн залгамж халаа, эдийн засаг, соёл, хэл ямар болж өөрчлөгдөв? Тиймээс бид цааш явахын тулд УИХ гэж нам дамжиж гарч ирсэн хүмүүсийг тараахыг хүсч байна.
Монголын хамаг баялаг, өв соёлын бүтээлүүдийг энэ нөхөд л гадаадад гаргаж байна. Бид цаашид хөгжихийн тулд энэ хүмүүсээс нэн түрүүнд салах шаардлага үүслээ. Ийнхүү бид өнөөдөр эрхийнхээ дагуу УИХ-ыг тараах гарын үсэг зуруулах ажлыг албан ёсоор эхлүүллээ. Энэ ажлыг иргэд өөрсдөө санаачлаад тус тусдаа гарын үсэг цуглуулаад явсан. Одоогийн байдлаар нэг нь гэхэд 500 хүний гарын үсэг цуглуулсан байгаа. ” гэсэн юм.
Үндсэн хуулийн 2.16.9-д зааснаар Монгол Улсын иргэн төрийг удирдахад оролцох эрхээ баталгаатай эдэлнэ гэсэн заалтыг мөн энэ үеэр цохон тэмдэглэж байлаа. Ийнхүү иргэний хөдөлгөөний байгууллагууд нэгдэж УИХ-ыг тараах санал асуулга авах бүх ард түмний хөдөлгөөнийг эхлүүлж байгаагаа албан ёсоор өнөөдөр мэдэгдлээ.
