“Дэлхийн Автомашингүй өдөр” буюу 9 дүгээр сарын 22-нд Улаанбаатар хотын хэмжээнд ч машингүй өдөр болгох шийдвэр гарсан билээ. Энэ өдөр Монгол Улсаа олон улсад сурталчлах зорилгоор “Үзэсгэлэнт Улаанбаатарын цом” нэг бүс нэг зам Монгол-Хятадын өртөөт марафоныг дөрвөн ангиллаар зохион байгуулах гэж байна. Марафонд нэг баг 2 хүнээс бүрдэх юм.
Ангиллын хувьд “Сурагчид” ангилалд:14-17 насны 2 сурагчдаас (эрэгтэй 1, эмэгтэй 1) бүрдсэн холимог баг, “Залуучууд” ангилалд:18-34 насны 2 иргэдээс (эрэгтэй 1, эмэгтэй 1) бүрдсэн оюутан, залуучууд, ажилтан, албан хаагчид, гадаад иргэдээс бүрдсэн холимог баг, “Ахмадууд” ангилалд:55 наснаас дээш насны иргэдээс (эрэгтэй 1, эмэгтэй 1) бүрдсэн холимог баг, “Нээлттэй” ангилалд: 35-54 насны ангилалд гэр бүл (эхнэр, нөхөр), гадаадын иргэдээс бүрдсэн (эрэгтэй 1, эмэгтэй 1) холимог баг оролцох аж.
Багийн бүртгэлийг burtgel.sport.gov.mn сайтаар болон Спортын төв ордны I давхрын хурлын танхимд 2018 оны 9 дүгээр сарын 20-ны өдрийн 17.00 цаг хүртэл бүртгэнэ. Багийн гишүүд нь өөрийн биеэр ирж бүртгүүлэх бөгөөд үнэ төлбөргүй. Оролцогчдын энгэрийн дугаарыг 2018 оны 9 дүгээр сарын 19, 20-ны өдрийн 08.30-17.30 цагт Спортын төв ордны 4 давхрын хурлын танхим, IY давхрын 403 тоот өрөөнөөс тус тус олгох юм байна. Бүртгүүлсэн багийн гишүүд 9 дүгээр сарын 22-ны өдрийн 07.00-09.00 цагт Сүхбаатарын талбайд байрласан бүртгэлийн асраас өртөөний маршрут, чипийг хүлээн авснаар бүртгэлээ баталгаажуулна.
Шагнал урамшуулал: Ангилал тус бүрт эхний 3-н байрыг шалгаруулан медаль, өргөмжлөлийг I байрт Гадаадад аялах эрхийн бичиг, II байрт Бэлтгэлийн хослол, III байрт Тэмцээний хослол.
Тусгай шагнал: “Шилдэг дэмжигч байгууллага”-2, “Шилдэг хандивлагч байгууллага”-1, “Шилдэг зохион байгуулагч байгууллага”-1, тус тус шалгаруулан урамшуулах юм байна.
