Төмөр замтай холбоотой дахин нэг осол гарлаа. Он гарсаар бүртгэгдэж буй тав дахь осол нь энэ юм. Төмөр замынхны хувьд тавдахь осол гэдэг бол маш их тоо. Гэтэл энгийн л нэг болж байдаг үзэгдэл шиг УБТЗ-ын удирдлагууд “нүдэн балай, чихэн дүлий” суусаар л байна.
Өнгөрсөн амралтын өдөр буюу энэ сарын 15-ны өдөр Агуйт-Маань хоорондын төмөр замын 003 галт тэргэнд гал гарсан байна. Эх сурвалжийн мэдээлж буйгаар, галыг унтрааж чадаагүй тул Багахангай дүүргийн гал унтраах анги нэмэлт хүчээр ирж галыг унтраажээ. Түүнчлэн шатсан галт тэргийг дахин ашиглах боломжгүй болсон гэх ба галын шалтгааныг тогтоохоор шинжээчдийн баг ажиллаж эхэлсэн аж.
Гэтэл үүнээс гуравхан хоногийн дараа буюу 18-ны шөнө 2653 дугаар галт тэрэг 596-р гарам дээр “32-66 УНЗ” улсын дугаартай KHINO маркийн ачааны автомашинтай мөргөлдсөн ноцтой осол гарсан байна. Галт тэрэг гармаар дайран өнгөрөх үед ачааны автомашины жолооч хурдаа нэмж, галт тэрэгний хөдөлгөөнөөс өрсөхийг оролдсон нь ослын шалтгаан болжээ. Дээрх ослын улмаас хүний амь нас хохироогүй бөгөөд хэргийг харъяа цагдаагийн газарт үргэлжлүүлэн шалгаж эхэлсэн байна.
Ердөө гуравхан хоногийн зайтай л ийм ноцтой ослууд гарч байна. Гэтэл энэ мэт асуудалд хариуцлага хүлээх учиртай УБТЗ-ын дарга Д.Жигжиднямаад хэн ч хариуцлага тооцож чадахгүй байна. Ажлаа авсан цагаасаа УБТЗ-д ийм шинэчлэл авчирлаа, тийм ажил хийлээ гэж түүний талаар сайн мэдээ дуулдсангүй. Харин ч эсрэгээрээ худалдан авах ажиллагаанаас тэрбум төгрөг завчуулсан байж болзошгүй баримт байна, Өмнө нь гэмт хэрэг ял шийтгэл авч байсан этгээдүүдийг Төмөр замын удирдах шатны даргаар тавилаа, Хуучирч муудсан мянган вагон оруулж ирлээ гэх мэдээллүүдийг нь АТГ-ын дэргэдэх Олон нийтийн зөвлөлөөс мэдээлсээр байна.
Хамгийн сүүлд гэхэд, төрийн мөнгийг гэрээ, хэлцэл хийсэн нэрийдлээр халхавчлан өөрийн хүүхдийн сургалтын төлбөрт зарцуулсан баримт нь сошиалаар цацагдав. Энэ мэт мэдээлэлд холбогдож, АТГ-ын үүд сахиж суух зуур УБТЗ сүйрч байна. Байсхийгээд л осол, аваарын тухай таагүй мэдээлэл дуулддаг боллоо. Салбарын сайд нь эзгүй байлаа гээд энэ мэт ажлын хариуцлага алдаж буй хүмүүстэй хариуцлага тооцохгүй яваад байвал төмөр замтай холбоотой осол өдөр бүр шахуу гарч, эцэс сүүлдээ эрдэнэт хүмүүсийн амь насны асуудал ч яригдаж мэдэхээр байдалтай байна.
Б.Анир
Эх сурвалж: zaluu.com
