БНХАУ байгуулагдсаны 69 жилийн ойн баяр өчигдөр буюу аравдугаар сарын 1-ний өдөр боллоо. Энэ өдөр төрийн далбаа мандуулж, төрийн дуулал эгшиглүүлэн, урлаг соёлын тоглолт болж, ургацын баяраа тэмдэглэн эх орныхоо төрсөн өдрийн баярыг тэмдэглэцгээв.
Үүрийн 06:00 цагийн үед Хятадын ардын чөлөөлөх армийн ёслолын цэрэг Жин Шүйчяо төрийн далбааг хамгаалан Тянь Ань Мэн талбайд төрийн далбааг мандуулсан юм.
Хятадын ардын чөлөөлөх армийн ёслолын 30 цэрэг Тянь Ань Мэний хаалгаар гарч ирэн Жин Шүйчяо гүүрийн хоёр хажуугаар зогсож, Тянь Ань Мэн асар дээр Хятадын чөлөөлөх цэргийн найрал хөгжмийн ангийн найман бүрээчин төрийн далбаа мандуулах бүрээн дууг эгшиглүүлсэн юм. Дараа нь Хятадын ардын чөлөөлөх армийн ёслолын 96 цэрэг Тянь Ань Мэн асраас гарч, төрийн далбааг хамгаалан Тянь Ань Мэний талбайд хүрч ирлээ. Ингээд 06:10 цагийн үед БНХАУ-ын төрийн дуулал эгшиглэж, төрийн далбаа алгуур мандлаа. Төрийн далбааг мандуулах хугацааг одон орон судлаачдын тооцоо, Бээжинд нар мандах хугацааны дагуу тогтоосон аж.
Энэхүү ёслолыг 110 мянган иргэд үзэж сонирхжээ.
Үргэлжлүүлэн Бээжингийн олон улсын аялал жуулчлалын XX наадам албан ёсоор нээлтээ хийж, гадаад, дотоодын 30 гаруй урлагийн чуулга Бээжингийн олимпын паркт үзэгчдэд тоглолтоо өргөн барив.
Үндэсний баярын үеэр Хятадын олон хотод баярын уур амьсгалаар дүүрэн байлаа. Бээжин, Шэньжэнь, Ханжөү, Харбин, Шямэнь зэрэг хот “Эх орон тандаа хайртай” гэсэн сэдэвт гэрлийн цэнгүүн зохион байгуулж, хотын шөнө олон өнгийн гэрлээр гялалзан гэрэлтжээ.
Хятадын хөдөө тосгодод ч үндэсний баярын энэ үеэр арвин ургац хурааж буй баярт мөч тохиожээ. Тухайлбал, Жянши мужийн Лүши саяны Иньхэ суурины тариачид спортын наадам зохион байгуулж үндэсний баяраа тэмдэглэсэн байна. Тэд 4 дэх жилдээ энэ наадмыг зохион байгуулсан бөгөөд 12 спортын төрлийн наадамд нийт 1000 гаруй тариачид оролцжээ.
Ийнхүү Хятадын өнцөг булан бүрт ард иргэд нь үндэсний баяраа дуу хуур, баяр цэнгэл дүүрэн тэмдэглэн өнгөрүүлж байлаа.
