Маргаашаас нутгийн ихэнх хэсгээр эхлэн цочир хүйтэрч, удахгүй нойтон цас орно гэж Ус цаг уур орчны шинжилгээний газраас анхааруулсан билээ. Хүйтний эрч чангарахтай зэрэгцэн жолооч нар өвлийн бэлтгэлээ базаадаг. Тиймээс автомашины өвлийн дугуй, тос, масло, тосоол ямар үнэтэй байгааг бид сурвалжилхаар техникийн худалдаагаар томоохонд тооцогдох “Өгөөмөр” захыг зорьлоо.
Автомашины өвлийн тос 6 литр нь 38000 төгрөг
Манай сурвалжлах багийнхан хамгийн эхлээд “Өгөөмөр” захын автомашины тос, масло, тосоол борлуулж буй хэсэгт очив. Худалдаа эрхлэгч Ж.Оюунцэцэг “Манайх голдуу Солонгосоос орж ирсэн бүтээгдэхүүн худалдаалдаг. Одоо яг өдийд өвлийн тосны эрэлт хэрэгцээ эхэлж байна. Өвлийн тос нь илүү шингэн, царцалт багатай байдаг. Өвлийн тос нэг литр нь 8000-9000 төгрөг байдаг ч зургаан литртэйг нь 38 мянган төгрөгөөр зардаг. Дөрвөн литртэй нь 25-27 мянган төгрөг байгаа. Манай жолооч нар өвлийн бэлтгэлд бас тосоол авдаг. Тосоол нь гурав, тав, 10 литрээр савлагдсан байгаа. Үнэ ханшийн хувьд гурван литр нь 9000, дөрвөн литр нь 14 мянга, 10 литр нь 27 мянган төгрөг байна. Дунд оврын машинд 5-10 литр тосол ашигладаг” гэв.
Худалдан авагчид ихэвчлэн “Prius-20”-ийн дугуй авч байна
Үүний дараа автомашины дугуй борлуулж буй контейнер дээр очиж, худалдаа эрхлэгч Д.Батболдоос автомашины дугуйн үнэ ханшийн талаар тодрууллаа.
-Иргэд худалдан авагчид ихэвчлэн ямар төрлийн дугуй авч байна вэ? Үнэ ханшийн хувьд ямар үнэтэй байгаа вэ?
– Ерөнхийдөө бол бүхий л төрлийн дугуй авдаг. Гэхдээ одоо бол иргэд ихэвчлэн “Prius-20”-ийн дугуй авч байна. Яг одоогоор энэ дугуйны эрэлт хэрэгцээ маш их байна. “Prius-20” -ийн дугуй дөрвөн ширхэг нь 140000-235000 төгрөгийн үнэтэй байгаа. Одоогоор шинэ дугуйг 150 мянга, хуучин дугуйг 50 мянган төгрөгөөр зарж байна. Манайд ихэвчлэн 90, 80, 70 хувийн хээтэй дугуй орж ирдэг. Дугуйны хээ 50 хувиас доош бол үнэ хямдарч, түүнээс дээш хувьтай бол үнэ нэмэгддэг.
– Худалдаа наймаа ямархуу байна. Хүмүүс хэр их ирж дугуй авч байна?
– Манайх гол төлөв Японы өвлийн дугуйг худалдаалдаг. Одоогоор ид сезон нь эхэлсэн байгаа болохоор худалдан авалт сайтай байна. Яг 10-р сард хүмүүс автомашиныхаа дугуйг авч өвлийн бэлтгэлээ базаадаг. Дүн өвлөөр бол худалдаа наймаа тийм сайн биш.
Та шинэ дугуй бас зарж байгаа юм уу? Шинэ дугуй ямар үнэтэй вэ?
-Өө тийм. Дунд оврын жийп машины ориг япон дугуй 4 ширхэг нь 1 сая 200 мянгаар зарж байна. Үүнээс арай том машиных нь бүр үнэтэй байдаг” гэлээ.
500 гаруй мянган төгрөгөнд өвлийн бэлтгэлээ базаадаг
Бид мөн тус захаар үйлчлүүлж байгаа жолооч нараас автомашины үнэ ханш болон тэдний өвлийн бэлтгэлийнх нь талаар тодруулав. Жолооч Б.Зоригтоос өвлийн бэлтгэлд хэд орчим төгрөг зарцуулдаг, яг ямар зүйлд хэрэглэдэг талаар лавлав. Тэрээр “Би Өгөөмөр захаас байнга дугуй авдаг. Энэ удаад 235000 төгрөгөнд “Prius-20”машиндаа дөрвөн дугуй авлаа. Үнийн хувьд харьцангуй гайгүй үнэтэй байна. Миний хувьд 500 орчим мянган төгрөгөнд өвлийн бэлтгэлээ хангадаг” гэв.
Шинэ дугуй авах мөнгө даанч алга
Жолооч Д.Батдэлгэрээс ямар дугуй сонирхож байгааг тодруулхад тэрээр мөнгө муутай байгаагаа хэлж, хуучин дугуй авах гэж байгаагаа бидэнд ярьсан юм.
-Та хуучин дугуй сонирхож яваа юм байна, шинэ дугуй авсан нь дээргүй юу?
-Шинэ дугуйны үнийг төлж дийлэхгүй болоод л ийшээ ирлээ. Өөр бусад газруудаар явж үзсэн. Аймаар үнэтэй юм байна лээ.
-Хэд гэж байх юм, эндээс хямд олдох нь уу?
– Энд арай гайгүй хямд дугуйнууд байна. Гэхдээ үнэ нь бас янз янз болохоор ямар байдаг юм бол гэж бодоод эргэлзээд л явж байна.
-Гайгүй мөнгөтэй болж байгаад дараа нь шинэ дугуй авсан нь дээр биш үү?
– Хүмүүсийн ярих нь “ялгаагүй, хуучин дугуй тавьчих” гэх юм байна шүү дээ. Гэхдээ хамгийн гол нь мөнгөний бололцооноос болоод ингээд явж байна” гэлээ.
Шинэ дугуй өндөр үнэтэй учраас “Өгөөмөр” зах дээрх худалдаачдын барааны ихэнх хувийг хуучин дугуй эзэлдэг аж. Гэхдээ японд үйлдвэрлэсэн хээ нь арилаагүй хуучин дугуйнууд хятад шинэ дугуйнаас дутахааргүй чанартай гэдгийг дугуйны наймаачид хэлж байлаа.
