Шатахууны үнийн өсөлтийг хэзээ тогтворжуулах вэ?

Ам.долларын ханш чангарч өнөөдрийн байдлаар 2,568 төгрөгт хүрэв. Үүнийг даган өнгөрөгч амралтын өдрүүдэд шатахууны үнэ нэмэгджээ. Тодруулбал, бензиний үнэ 60-80 төгрөгөөр, дизелийн үнэ 90-100 төгрөгөөр нэмэгдсэн байна.Энэ удаагийн үнийн өсөлт нь ам. долларын ханш өссөнтэй холбоотой гэж шатахуун импортлогчид тайлбарлаж буй юм.
Өнөөдрийн байдлаар:
Петровис компанийн шатахуун түгээх станцууд АИ-92-ыг 1,885, АИ-95-ыг 2,215, Дизель түлшийг 2,245 төгрөгөөр;
ТЭС Петролиум ХХК АИ-92-ыг 1,890, АИ-95-ыг 2,150, Дизель түлшийг 2,250 төгрөгөөр;
Шунхлай ХХК АИ-92-ыг 1,885, АИ-95 шатахууныг 2,220, Дизель түлшийг -2,245 төгрөгөөр;
Магнай Трэйд ХХК АИ 92-ыг 1,890, АИ-95-ыг 2,150, Дизель түлшийг 2,250 төгрөгөөр тус тус худалдаалж байна. Харин зарим шатахуун импортлогчид, тухайлбал Содмонгол, Синчи Ойл зэрэг компаниуд одоогоор үнээ нэмээгүй байгаа байна. Шатахууны үнэ нэмэгдсэнээр өргөн хэрэглээний бараа бүтээгдэхүүн болон бусад зүйлийн үнэ нэмэгдэж эхэлжээ. Энэ үнийн өсөлтийн асуудал дээр төр засгаас ямар арга хэмжээ авах нь тодорхой бус. Өчигдөр намыг бүлгүүдийн хуралдаанаар шатахууны үнийн өсөлтийн асуудал хөндөгдсөн. УИХ дахь МАН-ын бүлэг өнөөдөр хуралдаж, хурлын дараа МАН-ын бүлгийн дарга Д.Хаянхярваа “Шатахууны үнийг НӨАТ, Онцгой албан татвараар зохицуулаад ирсэн. Одоо энэ боломж бий эсэхийг судалж үзэхийг гишүүд санал болгож байна. Гадны томоохон компаниудтай гэрээ байгуулж, тэдэнд тодорхой хэмжээний төлбөр төлж өөрийнхөө нутагтаа тохирсон хугацаанд үнийн хэлбэлзлээс үл хамаарч шатахууны үнийг тогтвортой байлгах арга зам, туршлага байна. Засгийн газарт энэ асуудлыг нарийн судлах үүрэг, чиглэл өгсөн. Засгийн газраас ОХУ-ын компаниудтай уулзалт, хэлцэл хийж байгаа. Одоогоор эцсийн шийдэлд хүрээгүй байгаа тул мэдээлэл өгөх боломжгүй” гэсэн тайлбарыг өгсөн. Харин ИХ дахь бүлгийн дарга Д.Эрдэнэбат “Үнэ ханшны тухай асуудлаар Засгийн газрын гишүүнээс асуусан боловч “Монгол банк үүнийг хариуцна” гэсэн битүү хариулт өгсөнд эмзэглэж байгаа. Өнөөдөр Засгийн газар, Монголбанкны хооронд уялдаа холбоогүй байгаагаас бол эдийн засагт үл ойлгогдох байдал үүссэн. Ганцхан сарын дотор ам.долларын ханш 2,568 хүрч хэлбэлзлээ. Дизель түлшний үнэ нэр сарын өмнө 2125 байсан бол өнөөдөр 2245, АИ92 бензиний үнэ сарын өмнө 1820 байсан бол өнөөдөр 1885 бол 65 төгрөгөөр, АИ95 бензиний үнэ 2160-аас 2215 болж 55 төгрөгөөр тус тус нэмэгдсэн байна. Үнийн энэ огцом хөөрөгдөлд ард түмний нуруун дээр ачаа болж очиж байна. Үнийг дагаад хэрэглээний үнэ улам бүр өсч байхад Засгийн газар нь үүнд хариулт өгч чадахгүй сууж байгаа нь дэндүү хариуцлагагүй, бодлогогүй байгаагийн илрэл гэж харж байна” гэлээ. Төр засгийнхан нэгнээсээ буруугаа хайж, хэрэлдэж байх хооронд бүх шатахуун болон өргөн хэрэглээний бараа бүтээгдэхүүн үнэ гэрлийн хурдаар нэмэгдэж эхэлээ. Энэ үнийн хөөрөгдөлд ямар нэгэн арга хэмжээ авч тогтворжуулах вэ?  Төрийн түшээ дээ.