Ерөнхий сайд У.Хүрэлсүх УИХ-ын чуулганы нэгдсэн танхимын индэр дээрээс “Жижиг дунд үйлдвэрлэлийг дэмжих сангаас зээл авсан гишүүд ард түмнээсээ уучлалт гуйж, зээлээ төлөхөөс нааш дахин нэр дэвшихгүй, улс төрд МАН-ын өмнөө барилдахгүй шүү” гэдэг үгийг хэлсэн. Үүний дараа зээл авсан гишүүд дуртай дургүй уучлалт гуйж байгаа харагдав. Зарим нь ээжээсээ уучлалт гуйж, зарим хүний өмнөөс уучлалт гуйв.
Одоо гишүүд уучлалт гуйчихсан учраас тэдэнд ямар ч хариуцлага тооцохгүйгээр өнгөрүүлэх гэж байгаа хэрэг үү? Ийм зүйл байж болох уу.
Жижиг дунд үйлдвэрлэлээ хөгжүүлэхээр өчнөөн бичиг, цаас, ажил явдал болсон ч зээл авч чадаагүй үлдсэн жирийн иргэдийн өмнүүр эдгээр УИХ-ын гишүүд орж, тэрбум тэрбумаар нь жилийн гуравхан хувийн хүүтэй зээл авчихсан байхад зүгээр толгойг нь илээд өнгөрүүлж болмооргүй байна.
УИХ-ын гишүүн, сайд, дарга гэсэн эрх мэдлээ урвуулан ашиглаж, өөрт хамаарал бүхий компанид зээл авсан байгаа нь өөрөө гэмт хэрэг. Тиймээс энэ зээлтэй холбоотой хүмүүс эхнээсээ цагдан хоригдож, шалгагдаж эхлээд байна.
Гэвч УИХ-ын гишүүд болохоор уучлалт гуйгаад л асуудлаас мултрах шинжтэй. Тэгвэл аливаа гэмт үйлдэл хийсэн этгээд бүр уучлалт гуйгаад л асуудлыг шийдчихдэг байя л даа. Угаасаа Монгол Улсын Үндсэн хуульд “Хүн бүр тэгш эрхтэй” гээд заачихсан байдаг. Тиймээс УИХ-ын гишүүд нь уучлалт гуйгаад асуудлаас мултарчихаж байгаа юм чинь иргэд ч бас гэмт үйлдлийнхээ нөхөн төлбөрт “уучлаарай” гэдэг үгийг тушаагаад байж болох нь байна шүү дээ.
Хүний машин мөргөж гэмтээчихээд “уучлаарай” гээд л болоо. Бүр амьтны нялх үрийг хүчирхийлсэн бол эцэг, эхээс нь уучлалт гуйчихад л асуудал шийдэгдэх юм байна.
Цаашлаад олон мянган хүнийг гэмт хэрэгтэн, ялтан гэж шоронд хориод байх шаардлага ч алга. Тэд бүгдээрээ уучлалт гуйг. Тэгээд л бүгдийг нь шоронгоос сулалчихъя. Бүгд л тэгш эрхтэй юм хойно, УИХ-ын гишүүдтэйгээ адил эрх эдэлмээр байна.
Жижиг дунд үйлдвэрлэлээ хөгжүүлье гээд төсөвлөчихсөн ард түмний татварын мөнгөнөөс 100 орчим тэрбум төгрөгийг албан тушаалаа ашиглан халаасласан хүмүүсийг гэм буруугүй гээд өнгөрүүлэх ямар ч боломжгүй.
Жишээ нь зээл авсан гишүүдийн ихэнх нь энэ мөнгийг зориулалтын бусаар буюу мөнгө хүүлэх зорилгоор ашигласан гэдгийг эх сурвалжууд мэдээлж байна. Жилийн гуравхан хувийн хүүтэй мөнгийг бусдад сарын таван хувь буюу жилийн 50-60 хувийн хүүтэй зээлдүүлэхээр дундаас нь маш их ашиг олохоор байгаа биз.
Ингэж зээлсэн мөнгөнөөсөө өм, цөм ашиг олсон хүмүүст буцаагаад өрөө төлөхөд асуудал юу байх вэ. Инээж байгаад өрөө төлчихөөд, хүүлсэн мөнгөө дахиад эргэлдүүлээд явж байж ч мэднэ. Гэтэл эх орон, ард түмнээ басамжилж байгаа мэт уучлалт гуйхгүй бол нэр дэвшүүлэхгүй гэх утгатай зүйл ярьж байгаа Ерөнхий сайдын үйлдлийг үнэхээр ойлгохгүй байна.
Юун нэр дэвшүүлэх вэ. Эдгээр хүмүүсийн бүрэн эрхийг цуцалж, шаардлагатай бол цагдан хорьж, олсон ашгийг нь хураан авч, дахин албан тушаал, эрх мэдлээ ашиглаж, нийтийн өмчид гар дүрэхгүй болтол нь хариуцлага тооцох учиртай биз дээ.
Өөрөөр хэлбэл тэд бол гэмтнүүд. Зөвхөн жижиг дунд үйлдвэрлэлийг дэмжих сангаар хязгаарлаж болохгүй. Энэ сан бол мөсөн уулын орой гэж учир мэдэх хүмүүс тайлбарлаж байгаа. Тиймээс цааш нь лавшруулан шалгаж, иргэд, аж ахуйн нэгжүүдийг дэмжих зорилготой нийтийн хөрөнгө гар дүрсэн, мөнгө угаасан, өөрийн гэр бүл, танил талаа дэмжсэн, албан тушаалаа урвуулан ашиглаж шийдвэр гаргасан бүх төрийн бүхий л албан тушаалтанд хариуцлага тооцож ажиллах хэрэгтэй. Шударга ёс одоо л маш ихээр үгүйлэгдэж байна.
Зарим нь жилийн гурван хувийн хүүтэй зээл авчихаад таахалзаж байхад нийт Монголчууд өндөр хүүтэй банкны зээлд дарлуулж, насаараа өр төлж амьдарч байна. Үүнийг шийдвэрлэж, бүгдэд тэгш эрх олгох учиртай. Хэрэв чадахгүй гэж байгаа бол бүгд л “уучлалт” гуйгаад үүссэн асуудлаас мултарцгаая.
Уучлалт гуйгаад цалин тэтгэврийн зээлээ тэглэе. Уучлалт гуйгаад үйлдсэн гэмт хэргээ цайруулъя. Цаашлаад уучлалт гуйгаад дүрэм журам, хууль ёсыг мөрдөхөө больцгооё. Уучлалт гуйсан хүн бүрийг цагаатгаж, шоронгийн хаалгыг нээе. Үнэндээ Ерөнхий сайдын хэлсэн үг, бусдаас давуу эрх эдэлж, зээл авчихаад дараа нь гэмшсэн шинжгүй таахалзаж байгаа гишүүдийн үйлдэл нийт Монголчуудыг ийм л үйлдэлд уриалж байгаа мэт харагдлаа. Хэрвээ ийм зүйл хүсээгүй бол цаг алдалгүй алдаагаа засч, яаралтай гэмтэнд хариуцлага тооцно уу.
