2018 оны 11 дүгээр сарын 18-ны өдөр Төв аймгийн Хөшигтийн хөндийн баруун талд болсон уралдаан автомашины “Speed Cup 2018” улсын аварга шалгаруулах тэмцээнийг сонирхож үзлээ. Өмнө нь хаяа нэг зурагтаар гадаадын автомашины уралдаан, тэмцээн үзэж байсан надад энэ тэмцээнийг өөрийн нүдээр харахад манай автомашин болон мотоцикль сонирхогчид боломжийн түвшинд хүрч хөгжөөд байна гэсэн сайхан сэтгэгдэл төрөв.
“Subaru” загварын япон автомашинаар уралддаг 4 дэх удаагийн энэхүү тэмцээнийг Монголын автомашин, мотоциклийн спортын холбоо, Монголын уралдааны автомашины клуб, Морины хүч-уралдааны багтай хамтран зохион байгуулж байгаа ба монголд үйл ажиллагаа явуулдаг авто, мото клубын 17 тамирчид оролцлоо.
Тэмцээний бэлтгэл ажил, зохион байгуулалт нь энгийн бөгөөд тодорхой, ямар ч хүнд ойлгомжтой байсан нь тун таалагдав. Тэмцээн болох газрын байрлалын “GPS”-ийн координатыг бичиж, зургаар тодорхой заасан тул төвөггүй олоод очиж байна. Уралдааны трасс/замыг тэмдэглэж туг, далбаа тойруулж хатгасан байх ба тэндээ бяцхан тайз засаад, хөгжим тавьжээ.
Хөтлөгч залуу нь “Тамирчид тайзны өмнө цуглараарай” гэж зарлахаар бүгд даруй цуглах юм. Тэмцээний нээлтийг хийж, оноолтыг тайлбарлаад саяхан болсон “УАЗ-469” автомашины уралдааны үеэр осолдож нас барсан тамирчинг хүндэтгэж 1 минут дуугүй зогсов. Ингээд тэмцээний удирдлага, спонсор үг хэлсний дараа Монгол Улсын Төрийн дуулал эгшиглэж, тэмцээн албан ёсоор эхлэж байна.
Тэмцээн эхлээс өмнө тамирчид бүгд Улаанбаатар хотод гэмтэл, согогийн чиглэлээр үйл ажиллагаа явуулдаг “MBG” эмнэлгийн эмч нарт эрүүл мэндээ үзүүлээд гараандаа гарлаа.
Тамирчид тав 5-аараа 3 этап болж уралдсан ба тэндээс шалгарсан 9 тамирчин финалын тэмцээнд уралдсан. Хөдөлгүүрийн хүчийг нь нэмэгдүүлж, тусгай тоноглол, дугуй, хамгаалалт суулгасан автомашины хурдтай эргэлдэх дугуйнаас боссон маш их тоосонд заримдаа уралдаж яваа машин харагдахгүй алга болох жишээтэй. Ямартай ч уралдаан сайхан болж, дүнгээ гарган эхний гурван байранд орсон тамирчдад шагнал, цол, медаль гардуулснаар тэмцээнд өндөрлөв.
Эндээс цэргийн хүний нүдээр юу ажиглав гэхээр цаашид Зэвсэгт хүчний тусгай үүрэг гүйцэтгэх жижиг бүлгүүд хөдөлгөөн үйлдэхдээ иймэрхүү өндөр маневрлаг, хурдны автомашин, мотоцикль ашиглах ёстой гэж бодогдов. Мөнгө нь байвал манай авто, мото спортын клубын тамирчид, засварчид, инженер залуус цэргийн тусгай хэрэгцээнд зориулж туулц сайтай том, жижиг автомашиныг яаж бол яаж тоноглож, сайжруулж, хүчжүүлж, нэмэлт хамгаалалт суулгаж, зориулалтыг нь хүссэн хэлбэрээр өөрчлөх боломжтой болжээ.
Р.Энхболд
