Халуун бүлээн усанд орж заншсан бидэнд “хүйтэн ус” гэсэн үг “аймшигт явдал” мэт санагдана. Гэхдээ хүйтэн усанд давуу тал, ач тус их бий. Бид дадал болсон зуршлаасаа татгалзаж, хааяа ч болов хүйтэн усанд орж байвал дараах гайхамшгуудыг мэдрэх боломжтой. Өвөл харзны усанд орно гэдэг шүү дээ. Энэ бол угтаа хүйтэн ус л юм. Тэгвэл “халуун ус” тасарснаар таны гэрт “харзны ус” гоожиж байна гээд өөдрөгөөр төсөөлөх хэрэгтэй. Хүйтэн усны 10 гайхамшгаас танд хүргэж байна.
1. Сэтгэл санааны гутралтай тэмцэнэ
Сэтгэл санаагаар унасан, гутралтай байгаа үед яах вэ, эмчид хандах уу, эсвэл …? гэсэн олон асуудал тулгардаг. Тэгвэл гунигт автсан, санаагаар унасан үед хүйтэн усанд орвол эерэг өөрчлөлт бий болдог байна. Хүйтэн ус мэдрэлийн систем болон арьсны мэдрэг эсүүдэд нөлөөлж сэтгэл санааг сэргээж өгдөг ажээ.
2. Булчингийн өвчин намдаана
Булчингийн далд өвдөлт хүнийг зовоох нь бий. Тэгвэл хүйтэн усанд орох нь булчингийн өвдөлтийг намдаах хамгийн шилдэг арга аж. Хүйтэн ус цочирсон болон өвдөж байгаа булчинг суллах хамгийн шилдэг арга гэдгийг нотолж, эрүүл мэндийн байгууллагууд эмчилгээндээ өргөнөөр ашиглаж байна.
3. Үс тань гялалзана
Хүйтэн усаар үсээ угааж, гялалзуулж болно. Шүршүүрт ороод гарахынхаа өмнө үсээ хүйтэн усаар зайлахад үс зөөлөрч гялалздаг байна. Мөн хүйтэн агаарын урсгалд үсээ хатаавал сайн гэж зөвлөдөг байна.
4. Дархлаа сэргээнэ
Халуун усанд ороод амрахыг жаргал гэж боддог. Харин таны дархлаа өөр зүйлийг хүснэ. Тэд хүйтэн усанд орохыг хүсдэг аж. Хүйтэн усанд орсноор дархлааг дэмжигч цитокон илүү их ялгардаг байна.
5. Эрүүл арьс
Таны арьсны уян хатан чанар алдагдаад байна уу? Тэгвэл хүйтэн усанд ор. Халуун ус арьс хуурайшуулдаг бол хүйтэн ус эсрэгээрээ арьсыг сэргээж өгдөг.
6. Цусны эргэлт сайжирна
Хүйтэн усанд орж, эсвэл хөлөө хүйтэн усанд дүрснээр цусны эргэлт сайжирдаг. Энэ аргыг эрүүл мэндийн байгууллагууд өргөнөөр ашигладаг.
7. Сексийн амьдрал сайжирна
Гормоны идэвхжилийг бууруулахын тулд хүйтэн усанд ор гэж тайлбарладаг цаг үе өнгөрсөн. Харин ч хүйтэн ус гормоны идэвхжилийг нэмэгдүүлдэг болохыг судалгаагаар тогтоожээ. Хүйтэн ус тестостерон болон эстрогений ялгарлыг нэмэгдүүлдэг байна. Энэ ялгарал нь сексийн амьдралыг идэвхтэй, сонирхолтой болгодог аж.
8. Түлэгдэлтийг анагаана
Бага байхад ээж нар түлэгдсэн хэсгийг “хүйтэн ус”-нд барьдаг байсныг санах хэрэгтэй. Бидний ээж нарын зөв байжээ. Өвчин намдтал 10-15 минут хүйтэн усанд барихад түлэгдэлтийн эдгэрэлт хурдан явагдана. Хүйтэн устай алчуураар жин тавьсан ч болно.
9. Жин хасна
Сонсоход тэнэг байж болох ч судалгаагаар нотолсон гэнэ. Хүйтэн шүршүүрт ороход бодисын солилцоо хэвийнээс 550 хувиар хурдасдаг. Өөрөөр хэлбэл, калори шаталт явагдаж байгаа хэрэг юм. Энэ үр дүн мөн хүйтэн ус уухад мэдэгддэг байна.
10. Амьсгал сайжирна
Гүн амьсгаа авах шаардлагатай бол хүйтэн ус тусална. Хүйтэн усанд хүрэхэд таны бие хүйтний шоконд орж гүнзгий амьсгаа авахад хүргэдэг. Бие дулаанаа алдахгүйн тулд илүү их хүчилтөрөгч хэрэгтэй болж байгаа хэрэг.
Зүрх судасны болон цочмог хууч өвчтэй хүмүүс эдгээр аргыг эмчийн хяналтын дор болгоомжтой туршиж үзэхийг зөвлөж байна.
