2017 оноос эхэлж дизель түлшний үнэ нэмэгдсэн. Өнөөдрийн байдлаар нэг литр дизель түлшийг 2930 төгрөгөөр худалдаалж байна. Энэ нь нийтийн тээврийнхэнд үйл ажиллагаагаа цаашид хэвийн үргэлжлүүлэхэд хүндрэл учруулж байгаа талаар тэд мэдээллээ.
Том оврын автобусны үйлчилгээ эрхлэгчдийн холбооны гүйцэтгэх захирал Ж.Дамдинсүрэн “Нийслэлд орон нутгийн өмчийн хоёр, хувийн хэвшлийн 17 компани 950 гаруй автобус 89 чиглэлд 700 мянга гаруй зорчигчдод үйлчилгээ үзүүлж байна. 2015 оноос 2017 оны есдүгээр сар хүртэл ам.долларын ханш, дизель түлшний бөөний үнэ тогтвортой байсан. Гэвч 2017 оны есдүгээр сараас эхлэн хувийн хэвшлийн компанийн санхүүжилтээс цаг тутам 2261 төгрөгийг хасч, 30672 төгрөгөөр санхүүжүүлэх болсон. Үүн дээр энэ оны аравдугаар сараас дизель түлшний үнэ, ам.долларын ханш байнга нэмэгдсэн. Үүнээс шалтгаалан нэг автобусны цагийн зардал хүрэлцэхгүй болсон. Үүний дагуу машин цагийн зардлыг шинэчлэн тогтоох НИТХ-ын 6-22 тоот тогтоолын хавсралтаар баталж “Журамд өөрчлөлт оруулах ажлыг хэсэг”-үүд томилогдон ажиллаж, дүгнэлтээ өнгөрсөн тавдугаар сард бэлэн болгосон гэсэн. Энэ дүгнэлт өнөөдрийг хүртэл Нийслэлийн Засаг даргын зөвлөл болон Иргэдийн хурлын аль алинд нь танилцуулагдахгүй байна. Уг ажлын хэсэг дизель түлшний бөөний үнийг 1900 төгрөг, ам.долларын ханшийг 2450 төгрөгөөр тооцож, их багтаамжийн автобусны нэг машин цагийн зардлыг 36540 төгрөг болгож, ингэснээр энэ онд 17.4 тэрбум төгрөг нэмэлтээр шаардагдана гэсэн тооцоог гаргасан юм.
Нийслэлийн тээврийн газрын дарга компаниудын алдагдлыг энэ онд “Засаг дарга олгоно” гэсэн хариу өгсөн учраас тээвэрчид бид харилцагч байгууллагууд, банкуудад өр тавьж өнөөдрийг хүртэл нийтийн тээврийн үйлчилгээг хэвийн явуулж ирлээ. Арваннэгдүгээр сараас эхлэн дизель түлшний бөөний үнэ огцом өсч, 2390 төгрөг болсон нь түлш нийлүүлэгч компаниуд түлш зээлэх зэргээр олгох үнийн дүнгээ нэмэгдүүлэхгүй гэсэн мэдэгдэл ирүүлэх боллоо. Дизель түлшний үнэ 2390 төгрөг болсноор нэг машин цагийн зардал зөвхөн шатахууны үнийн өсөлтөөс шалтгаалж 32933 төгрөг гэж тооцоолсон зардал нь 39756 төгрөг болж байгаа бөгөөд 30672 төгрөгийн санхүүжилт аваад нийтийн тээврийн үйлчилгээг цаашид хэвийн явуулах ямар ч боломжгүй болоод байна.
2018 онд гарсан алдагдал зөвхөн шатахууны үнийг зөрүүг нэхэхэд л хувийн хэвшлийн компани дээр 5.1 тэрбум төгрөгийн алдагдал гарч байна. Иймд дизель түлшний үнийн зөрүү алдагдал болох 5.1 тэрбум төгрөгийн асуудлыг нэн даруй шийдвэрлэж өгөхийг шаардаж, 2019 оны төсвийг батлахад дизель түлшний үнийн өсөлтийг нэмж тооцохыг Нийслэлийн удирдлагад санал болгож байна. Хуульд зааснаар, нийслэлийн иргэдийн нийтийн тээврийн үйлчилгээгээр хангах асуудал Засаг даргын бүрэн эрхийн асуудал. Үүнд ямар нэгэн яамд ямар ч хамааралгүй. Дээр нь шатахуун нийлүүлэгч компаниуд шатахуун өгөхгүй гэсэн мэдэгдэл ирүүлсэн. Гэтэл нэг автобусанд өдөрт 54 мянган төгрөгийн шатахууны зардал нэмэгдэж байгаа. Өдөрт нэг автобусанд 54 мянган төгрөг гэхээр арван автобус гаргадаг хүнд 540 мянга, 100 автобус гаргадаг бол таван сая төгрөгийн шатахууныг өгөхгүй гэсэн үг. Тэгэхээр тээвэрчдээс шалтгаалахгүйгээр нийтийн тээврийн үйлчилгээ тасалдах доголдох асуудал гарч болзошгүй боллоо гэдгийг иргэддээ анхааруулж байна” гэж мэдэгдлээ.
