Монгол Улсын Ерөнхий сайд У.Хүрэлсүх төрийн ордон дахь өөрийн өрөөндөө сэтгүүлчдийг дуудан, мэдээлэл хийлээ. Түүний мэдээллээс онцлох өгүүлбэрүүдийг ишлэн хүргэж байна.
-Ард түмний хамгийн ихээр хүсч буй зүйл бол шударга ёсны тухай асуудал байна. Тэд надаас үүнийг л хүсч байна. Манай ард түмэн ахуйн амьдралаасаа илүүтэйгээр шударга ёсыг нэхэж, эрхэмлэж байгаа нь харагдлаа. Надад шударга ёсыг тогтоохын төлөө амь насаа үл хайрлан ажиллаж, эсвэл буулт хийж зарим хүмүүсийг сандал суудалтай нь үлдээх гэсэн хоёр л зам байна. Би бол эхнийхийг нь сонгож байгаа. Ерөнхий сайд болохдоо би хэлж байсан. Амь насаа алдахаас айхгүй байна. Ганц л зүйлээс айдаг. Энэ бол ард түмний минь итгэл найдвар гэж.
-Төр засагт итгэх ард түмний итгэл алдарсан. Тиймээс шударга ёс тогтоохын төлөө хөдлөх, ажиллах цаг болсон гэж би намын бүлэг болон чуулганы хуралдаан дээр байнга хэлдэг.
-МАНАН гэж байдаг юм байна аа. Би өнгөрсөн нэг жилийн хугацаанд яс биеэрээ мэдэрлээ. Нам нам дамжсан олигархууд нэгдсэн нийлсэн, идсэн, таргалсан, бүр сүүлдээ үр хүүхэд нь хүртэл Монголын төрд шургалсан ийм бүлэглэл байна. Үүнтэй Ерөнхий сайд миний бие тэмцэж байна. Одоо энэ МАНАН-г зайлуулах цаг болсон. Гэвч заримдаа миний хүч хүрэхгүй байна. Хуулийн болоод эрх мэдлийн хүч хүрэхгүй байна. Гэхдээ сэтгэл санааны хүч бол байна.
-Би УИХ-ын дарга М.Энхболдыг үүрэгт ажлаа өг, огцор гэж хэлсэн. Айгаад байх зүйл алга. “Та бол 60 тэрбумын хэрэгт холбогдсон хүн. Тиймээс огцрох ёстой” гэж хэлсэн.
-Би өнөөдөр нэг зүйлийг энд онцлон хэлмээр байна. Тэр 60 тэрбумын бичлэг гэдэг бол үнэн шүү. Үнэн. Тэр яриаг М.Энхболд хийсэн нь үнэн. Тэр эвлүүлэг биш. Монголын төрийн албан тушаалыг хууль бусаар зарж, хөрөнгөжих гэсэн энэ яриаг хийсэн үү, хийсэн, ярьсан уу, ярьсан. Хэрэгжүүлсэн эсэхийг нь би сайн мэдэхгүй байна.
-М.Энхболдыг газрын наймаачнаар нь дууддаг. Газрын наймаа хийж байсан уу гэвэл хийж байсан. Энэ бас л үнэн. Тиймээс л огцор гэж хэлсэн.
-УИХ дахь МАН-ын бүлгийн дарга Д.Хаянхярвааг үүрэгт ажлаа өг гэж шаардсан. Санал хураалтаар тэр хүн огцорсон. УИХ дахь намын бүлгээ удирдаж чадаагүй. Шударга ёсны төлөө ажиллаж чадаагүй хүн огцрох ёстой.
-Улаанбаатар хот дээр сэтгэл гаргаж ажиллаж чадаагүй. Утаатай тэмцэж, замын түгжрэлийг арилгаж чадаагүй. Ард түмний өмнө тулгамдсан олон чухал асуудлыг сэтгэл гаргаж хийж чадаагүй хотын даргыг огцор гэж хэлсэн. Энэ ч бас үнэн.
-Шударга ёс нэхэж, гурван л шаардлага тавьсны төлөө Засгийн газрыг огцруулах дээрээ тулчихлаа.
-М.Энхболд бид хоёр багийн найзууд. Гэхдээ би найзыгаа бус улсаа бодож байна.
-Үндсээр нь өөрчлөлт хийх шаардлага бий болсон. Тэрний илэрхийлэл бол Засгийн газар шаардлагаа тавьж байна.
-Тос дотроосоо өтвөл буруу. Тиймээ төрөө цэвэрлэх цаг болсон. Мөн намаа ч цэвэрлэх цаг болжээ гэж ойлгож байна.
-Монгол Улсын Засгийн газрыг эсэргүүцэж 27 гишүүн гарын үсэг зурсан. Тэр 27 гишүүний зургийг сайн хараарай. Хэн бэ гэдгийг нь сайн хар. Хэн хэнийг эсэргүүцээд байна вэ гэдгийг. Бидний ярьдаг 30 гэр бүл, тэдний хамсаатан, хамаарал бүхий этгээдүүд тэнд бий.
-30 гэр бүлийнхэн Монгол төрд үр хүүхэд, төрөл саднаараа шургалсан байна.
-Миний тэмцэл улам хатуурах болно.
-Улс орны эдийн засгийн уналт зогссон.
-Бид өөрсдийн бий болгосон ардчиллыг хамгаалах цаг болсон. Үүнээс цааш цаг байхгүй.
-Үндсэн хуульд өөрчлөлт хийх цаг болсон байна. 27 жил энэ хуулиар амьдарлаа. Сайн зүйл бий. Гэхдээ алдаа нь ч их байна. Өөрчлөх цаг болсон.
-ЖДҮ-д холбогдсон хүмүүст хариуцлага тооцож байгаа. Үлдсэн хүмүүст ч хариуцлага тооцно.
-ЖДҮ-гээс зээл авсан хүмүүсийг авсан зээлээ эргүүлж төл гэж хэлсэн. Эхнээсээ төлөөд явж байна. Төлсөн мөнгийг нь буцаагаа хэрэгтэй шаардлагатай жижиг дунд үйлдвэрлэгчдэд өгөх болно.
-Засгийн газрын дэргэдэх 27 сангаас зээл авсан асуудлуудыг шалгаж байна. Маш ноцтой асуудлууд, их хэмжээний мөнгө төгрөг идсэн, уусан асуудал гарч ирж байна. Үүнийг шалгана, хариуцлага тооцно. Мөн сангуудыг шилэн болгоно.
-Надад улс төржих хүсэл алга. Гэвч улс төржихөөс өөр арга алга.
-Намууд нэгдэх ёстой. Нэгдэж энэ шударга бусын эсрэг тэмцье гэж уриалмаар байна.
-Н.Алтанхуягийн ярьсан шударга бусын хонгил гэж байдаг юм байна. Би энэ хонгилоор алхаж байна.
-Ард түмэн бухимдалтай, гудамж талбайд гарахад ч бэлэн байгааг харж байна. Гэхдээ би битгий тэгээсэй гэж хүсч байна. Түүний оронд ард түмний төлөө сонгогдсон гишүүд парламентын танхимдаа ярилцаж асуудлаа шийдвэрлээсэй гэж хүсч байна.
-Би ажлаа хийгээд явж байх ёстой гэтэл ийм зүйл яриад сууж байна.
-2023 он гэхэд Монгол Улс нефть боловсруулах үйлдвэртэй болж Монгол төгрөгөөр шатахуунаа худалдаж авдаг болно.
-Хоёр жилийн дотор Дархан Улаанбаатарыг холбосон дөрвөн эгнээ замтай болно.
-10 аймаг дулааны цахилгаан станцтай болно.
-Засгийн газар ажлаа хийж байгаа. Гэвч үүний хажуугаар шударга ёсыг сахиулахад анхаарч ажиллах шаардлага тулгарч байна.
-УИХ-ын дарга том эрх мэдэлтэй хүн. Чуулганаар юуг хэлэлцэх, юуг хэлэлцэхгүй вэ гэдгийг шийддэг том эрх мэдэлтэй албан тушаал.
-Би энэ хүнийг эрх мэдлээс нь салгамаар байна.
-УИХ-ын дарга эрх мэдлээ ашиглаж сүүлийн хоёр жилд юу хийж байгааг бид харж байна. Бүх ажил гацаж, хууль хүчнийхэн ажлаа ч хийж чадахгүйд хүрлээ.
-Цэргийнхнийг зохион байгуулж хувьсгалт тэмцэх хийх гэсэн зүйл огт байхгүй.
-УИХ-ын дэд дарга Л.Энх-Амгалан маш хариуцлагагүй зүйл ярьж байна лээ.
-Би ард түмнийхээ өмнөөс буу, зэвсэг барьж босдог хүн биш ээ.
-Шаардлагатай бол манай ард түмэн тайван замаар хувьсгал хийж чадна.
-Ард түмнийг тайван байлгая гэвэл сандал суудлаасаа салж чадахгүй байгаа хүмүүс ухамсраараа ажлаа өгөх хэрэгтэй.
-27 хүнийг намаас хөөх тухай яриа гараагүй.
-Гэхдээ хариуцлага алдсан хүмүүстэй тун удахгүй хариуцлага тооцно.
-Я.Содбаатарыг хууль хяналтын байгууллага шалгаж байгаа. Буруутай бол түүнийг ажлаас халах шиг амархан зүйл надад алга.
-Ерөнхийлөгчийн Засаглалыг би дэмждэггүй.
-Би хувь хүнийнээ үүднээс дээд, доод парламенттай байгаасай гэж хүсдэг. Өөрөөр хэлбэл парламентын засаглалыг дэмждэг.
