С.Эрдэнэ юуг хамгаална вэ

Улс төрийн энэ “алалцаан” дундаас эвтэйхэн ашиг хүртчихээд л сууж байгаа хүмүүсийг харахаар зэвүүцэл төрөх юм. Та бас тэднийг хараад зэвүүцэж, дургүйцэх байлгүй. Тэд бол Ардчилсан намынхан.
М.Энхболд нь дийлнэ үү, У.Хүрэлсүх ялна уу, тэдэнд огтхон ч хамаагүй. Харин ч алалцаж л байвал дараагийн сонгуульд нэг том өрсөлдөгчөө дарж авахад нь тустай, тэдний хувьд сайн үйл юм. Улсаа боддог, ард түмнээ энэрдэг улс төрчдөд ийм үйлийг тасдан зогсоож, яаралтай арга хэмжээ авах ухаан бий. Гэвч Ардчилсан намынханд тийм хүсэл огт алга. У.Хүрэлсүх сэлмээ эргүүлж л байвал, М.Энхболд улс төрийн ажлыг гацааж л байвал сайн гэх…
Уг нь нэгдэж нийлээд болохгүй байгаа зүйлсийг засч залруулах хүсэлтэй ганц нэг хүн Ардчилсан нам дотор харагдаж байна аа. Гэвч бүлгээрээ, бүгдээрээ тийм биш байгаа нь харамсалтай. Энэ бол намын даргын нөлөөлөл, эрх мэдлийн хүрээний асуудал юм л даа. Намын гишүүний үг, үйлдэл бүр цензуртай, хяналттай. Хэрвээ намын зааварчилгааг зөрчвөл улс төрийн карьераа өндөрлүүлэх ч аюултай учраас нам, намын дарга юу гэнэ түүнийг “за” гээд дагахаас аргагүй.
Гэтэл намын дарга нь нийт намын бүлгийн эрх ашиг гэхээсээ өөрийн эрх ашгийг нэгдүгээрт тавьж хагаралдсан эрх баригчдаас ашиг харж сууна. Уг нь У.Хүрэлсүхийн яриад байгаагаар бүгдээрээ нийлж байгаад МАНАН гэх нам дамнасан бүлэглэлээс салчихмаар.
Харин АН-д ч бас тухайн бүлэглэлийг хамгаалагчид бий гэдгийг С.Эрдэнийн үйлдэл харуулж байна. Тэрээр УИХ-ын дарга М.Энхболдтой тохиролцож, УИХ дахь АН-ын бүлэг Засгийн газрыг огцруулах асуудлыг дэмжих ёстой гэсэн зааварчилгааг гишүүдэд өгсөн юм. Энэ зааварчилгаа нийслэл дээр ч мөн адил явагдаж, НИТХ дахь АН-ын бүлэг хотын даргыг огцруулах асуудал дээр бойкот хийж, удаа дараа завсарлага аваад байна. Гэхдээ хотын дарга С.Батболд үүсээд буй асуудлыг яаралтай шийдвэрлэж, хотын төсвөө батлахын тулд өөрийн хүсэлтээр албан тушаалаасаа чөлөөлөгдөх өргөдлөө өглөө. АН завсарлаж, улс төрийн бойкот хийсэн хийгээгүй улс төрийн соёлтой хүн бол үүссэн асуудлыг шийдвэрлэх чадвартай байдаг гэдгийг С.Батболдын үйлдэл харууллаа гэж иргэд дүгнэж байна.
Одоо төрийн ордон дахь үймээн хэрхэн шийдэгдэх вэ гэдгийг олон нийт хүлээцтэй ажиглаж байна. Ер нь олон нийт Засгийн газрыг бус УИХ-ыг тарах, УИХ-ын дарга хариуцлага хүлээх ёстой гэдэг байр суурийг дэмжиж байгаагаа илэрхийлсэн.
Гэтэл Ардчилсан намд иргэд олон нийтийн үзэл бодол бус намын даргын явцуу эрх ашиг, нударган доторх тохиролцоо л чухал бололтой. Тиймээс Засгийн газрыг огцруулах санал өгч, улс төрийн хямралд хүргэх, цаашлаад 60 тэрбумын бүлэглэлийг хамгаалах арга замыг сонгожээ. Гэхдээ энэ үйлдлийг эсэргүүцэгч, өөрийн үзэл бодолтой гишүүд УИХ дахь АН-ын бүлэг цөөнгүй бий.