УИХ-ын 2018 оны 62 дугаар тогтоолоор Хэнтий аймагт УИХ-ын 42 дугаар тойргийн нөхөн сонгууль товлон зарлах, санал хураах өдрийг товлосон. Гэвч энэхүү тогтоол нь иргэний тэгш байдлын зарчмыг алдагдуулж, зарим иргэдийн сонгогдох эрхийг хязгаарлан, Үндсэн хуулийн хэд хэдэн заалтыг зөрчсөн байна гэж үзэж нэр бүхий иргэд Үндсэн хуулийн цэцэд хандан өргөдөл гаргасан билээ. Энэхүү өргөдлийг Үндсэн хуулийн цэц дунд суудлын хуралдаанаараа хянан хэлэлцэж УИХ-ын тогтоол нь Үндсэн хуулийн холбогдох заалтыг зөрчсөн байна гэж үзэж уг тогтоолыг хүчингүйд тооцсон. Гэвч энэхүү дүгнэлтийг УИХ хүлээн авч хэлэлцээд улмаар хүлээн зөвшөөрөх боломжгүй гэсэн тогтоол гаргасан байдаг. Иймээс Үндсэн хуулийн цэц өнөөдрийн Их суудлын хуралдаанаараа уг маргааныг хяналтын журмаар авч үзэж, эцсийн шийдвэрийг гаргав.
Уг хуралдаанаас “Монгол Улсын Их Хурлын сонгуулийн 42 дугаар тойрогт нөхөн сонгууль товлон зарлах, санал авах өдрийг тогтоох тухай” 62 дугаар тогтоол нь Монгол Улсын Үндсэн хуулийн Нэгдүгээр зүйлийн 2 дахь хэсэгт “… шударга ёс, … тэгш байдал, … хууль дээдлэх нь төрийн үйл ажиллагааны үндсэн зарчим мөн.”, Арван дөрөвдүгээр зүйлийн 2 дахь хэсэгт “Хүнийг … эрхэлсэн ажил, албан тушаал … -р нь ялгаварлан гадуурхаж үл болно. …”, Арван зургадугаар зүйлийн 9 дэх заалтад “… Төрийн байгууллагад … сонгогдох эрхтэй. …”, Арван есдүгээр зүйлийн 1 дэх хэсэгт “Төрөөс хүний эрх, эрх чөлөөг хангахуйц … хууль зүйн болон бусад баталгааг бүрдүүлэх … үүргийг иргэнийхээ өмнө хариуцна.”, Далдугаар зүйлийн 1 дэх хэсэгт “Үндсэн хуульд … төрийн байгууллагын бусад шийдвэр … бүрнээ нийцсэн байвал зохино.” гэж заасныг тус тус зөрчсөн тул энэхүү тогтоолыг хүчингүй болгохоор шийдвэрлэжээ.
Мөн Үндсэн хуулийн цэцийн 2018 оны 10 дугаар дүгнэлтийг хүлээн зөвшөөрөх боломжгүй гэж үзсэн УИХ-ын 2018 оны 76 дугаар тогтоолыг хүчингүй болгов.
Дугаар 62
Монгол Улсын Их Хурлын сонгуулийн 42 дугаар тойрогт нөхөн сонгууль товлон
зарлах, санал авах өдрийг тогтоох тухай
Монгол Улсын Үндсэн хуулийн Хорин тавдугаар зүйлийн 1 дэх хэсгийн 3 дахь заалт, Сонгуулийн тухай хуулийн 18 дугаар зүйлийн 18.1 дэх хэсэг, 20 дугаар зүйлийн 20.1 дэх хэсгийг үндэслэн Монгол Улсын Их Хурлаас ТОГТООХ нь:
1.Монгол Улсын Их Хурлын сонгуулийн 42 дугаар тойрогт явагдах Улсын Их Хурлын гишүүний нөхөн сонгуулийг 2018 оны 07 дугаар сарын 01-ний өдрөөс эхлэхээр товлон зарласугай.
2. Монгол Улсын Их Хурлын сонгуулийн 42 дугаар тойрогт явагдах Улсын Их Хурлын гишүүний нөхөн сонгуулийн санал авах ажиллагааг 2018 оны 10 дугаар сарын 07-ны өдөр явуулахаар тогтоосугай.
МОНГОЛ УЛСЫН ИХ ХУРЛЫН ДАРГА М.ЭНХБОЛД
