Эдийн засгийн өсөлттэй жил УИХ-ын сонгуульд нэр дэвшсэн намуудын мөрийн хөтөлбөрт “мөнгө олгоно” гэсэн амлалт суусан байдаг. Одоо ч энэ амлалтаа биелүүлж, түмэн олны зовлонг нүдээрээ харж, цуг амьдарч байгаа мэтээр дүрслэн, сар бүр эхчүүд, хүүхдүүдийн халаас руу цөөн хэдэн төгрөг хийсээр байгаа.
Гэхдээ энэ нь оновчтой тусламж мөн үү гэвэл үгүй юм. Төсөвт ихээхэн дарамт ачаалал үүсгэх хэрнээ иргэдийн гар дээр очихоор нэг талхнаас хэтрэхгүй багахан тусламж болчихоод байгаад учир бий. Уг нь биднээсээ арай л дөнгүүр, ухаантай, боловсролтой гэж эдгээр түшээдийг сонгодог ч биднээсээ ялгагдахгүй шийдвэр гаргаж, ухантаж явсаар олон дөрвөн жилийг барлаа. Тэдний хамгийн ихээр сайрхаж ярьдаг зүйл бол иргэн бүрт 1.5 сая төгрөг олгосон гэх. Сонгуулийн амлалт учраас амлалтаа биелүүлэх л учиртай. Гэхдээ амласан шигээ иргэн бүрийн гар дээр энэ мөнгийг тавьсан уу гэвэл үгүй. Тэтгэвэр, эрүүл мэндийн даатгалын шимтгэл, боловсрол гэх зэргээр нүдэнд үзэгдэж гарт баригдахгүй байдлаар 1.5 сая төгрөгийг иргэдийн халаас руу шургуулчихсан хэрэг.
Танд Монгол Улсын Засгийн газар 1.5 сая төгрөг өгсөн үү гээд асуувал “тийм” гээд зоригтой хэлчих иргэн олдохгүй биз. Хэсэг иргэдийн гар дээр 21 мянган төгрөг тарааж, гурилдсан. Өнөөх нь архидалтыг дэмжих маш сайхан шалтгаан болж өгсөн л дөө. Одоо хүүхэд бүрт 20 мянган төгрөг өгч байна. Хэрэгтэй хүндээ хэрэгтэй л байх. Гэвч бас л хаана, юунд зарцуулагдаад байгаа нь мэдэгдэхгүйгээр л алга болж байгаа. За тэгээд мөрийн хөтөлбөр, сонгуулийн амлалтын биелэлтүүд ходоод руу орж, өтгөн болон гадагшилснаар дуусч байна гэж ойлгож болохоор.
Тэгвэл ирэх сонгуулиар мөн л мөнгө амлах шинжтэй. Эхнээсээ намууд, намын дарга нар мөнгө өгнө гээд мэдэгдээд эхэллээ. Тухайлбал, Бүгд Найрамдах намын дарга Б.Жаргалсайхан нэгэн нэвтрүүлэгт оролцох үеэрээ “манай намыг сонговол иргэн бүрт 1000 ам.доллар өгнө” гэж мэдэгдээд сууж байна. Ямар нэгэн амлалт өгөхийг хориглосон хуулийн заалт, хугацаа биш учраас хэн ч юу ч гэж хэлсэн болохоор цаг үе л дээ. Тэгсэн хамгийн гол нь “1000 доллар өгөх юм бол Б.Жаргалсайханг дэмжинэ” гэсэн иргэд цөөнгүй байгааг хараад гайхшрал төрлөө. Олон жил төр түшигч эрхмүүдэд хууртчихаад одоо ч мөнгө өгнө гэдэгт итгэсээр байгаа иргэн бидний дунд алхаж явна гэж үү.
“1000 доллар” гэх нэршил нь сайхан боловч, олгогдох дээрээ тулвал нохойн баас шиг цувна гэдгийг хүн бүр л мэдэж байгаа байлгүй дээ. Тэгээд ч манай төсөв иргэн бүртээ 1000 доллар өгөх чадамжгүй гэдгийг бид яг одоо яс махаараа мэдэрч сууна. Татвар нэмэгдэж, бараа бүтээгдэхүүний үнэ өслөө. Алхам бүртээ торгуулж, төсөв бүрдүүлэхэд өндөр ач холбогдолтойгоор оролцож байна. Өөрөөр хэлбэл төсөв бүрдүүлэхийн тулд биднээс хэд хэдэн удаагийн татаас авч байгааг анхааралтай ажигласаар сууна.
Энэ олон жил бидэнд өгч байгаа нэртэй үйл ажиллагаа явсны сөрөг илрэл нь төсвийн хүндрэл юм. Гэвч дахиад л бидэнд өгөх тухай ярьж байна. Үнэхээр үр өгөөжөө өгөхөөр амлалт бол дэмжинэ, хоёр гараа өргөж дэмжинэ.
Гэвч аманд ч үгүй, хацар ч үгүй зүйлээр нүд хуурсаар өнөөдрийг хүрчихлээ шүү дээ. Одоо мөнгө тараана гэсэн амлалтаасаа намууд татгалзах хэрэгтэй. Иргэдийн амьдрал хүнд байгаа учраас өгсөн мөнгийг тань хэд байсан ч хамаагүй гололгүй авна. Гэвч ирээдүйгээ, улс орноо, хөгжлөө хойш татаж суугаагаа тэр бүр анзаарахгүй. Хоногийн хоол, дулаан унтах тухай бодож яваа дийлэнх олонд 1000 доллар л сайхан сонсогдоно уу гэхээс маргааш аль нэг улсын хараат болох, тавьсан өрөндөө газар нутгаа тавиад өгөх эсэх нь огт хамаагүй юм.
Үүнийг бодох чадал ч алга. Харин бодох сөхөөтэй юм даа гэж та нөхдөд итгэл үзүүлдэг юм шүү дээ. Гэтэл биднээсээ ялгагдахгүй дорой нэгэн түшээ сэтэр зүүж Төрийн ордонд манарч сууна гэж бодохоор л …
