Энэ дууг хэдийгээр эрхэм анддаа зориулсан ч Монголын бүх эрчүүд сонсож , найзаа дурсан санагалзаж, андын нөхөрлөлийг эрхэмлэн дээдлэж яваасай хэмээсэн бөлгөө. “Алсарч одсон анд минь” дуу, “Харанга” хамтлагийн урын санд албан ёсоор орсон бөгөөд 30 жилийн ойн баярын тоглолтон дээр нь хүндэтгэлтэйгээр эгшиглэх болсонд талархаж байгаагаа илэрхийлье!
Дууг бүтээлцсэн:
Эрхэм анд МУГЖ Ц.Энхманлай
Эрхэм анд МУГЖ Х.Лхагвасүрэн
Эрхэм анд У.Баяраа
“Skin” entertainment –ын хамт олонд болон, эрхэм андын ижий болон гэргий, үр хүүхдүүдэд эрүүл энх, саруул сайхныг хүсэн ерөөе!
Малчин Зориг
Ая.Ц.Энхманлай Үг. Д.Чинзориг
Холын замд гарахад анд минь чи
Хошин үгээр дайлж мордуулдагсан
Хорвоогийн үнэн худлыг дэнслээд
Хошигнож байгаад үддэгсэн дэ чи
Тэртээд анивчих ододтой ханьсахаар
Тэнгэрийн заадас руу уусаж харвасан
Дэндүү дотно анд минь чи
Арай эрт л алсраад одов уу
Нүүдлийн шувууд буцаад ирдэг шиг
Найз минь,анд минь эргээд ирэхгүй ч
Нартад нөхөрлөж биесдээ дассан
Сэтгэлдээ л чамтай учирч явья даа
Өөрөөрөө л байдаг ганцхан зан чинь
Үгүйлэх сэтгэлийг огшоогоод байна
Өмнийн цэнхэр говь шиг сэтгэл чинь
Өр зүрхэнд минь үгүйлэгдээд байна
Шаргал говийн алтан сэрвээнээс
Үүлс наашаа нүүхгүй нь гэж үү
Сайхан андыгаа үгүйлсэн сэтгэлийг
Салхи нь очиж дуулгахгүй нь гэж үү
Нүүдлийн шувууд буцаад ирдэг шиг
Найз минь,анд минь эргээд ирэхгүй ч
Нартад нөхөрлөж биесдээ дассан
Сэтгэлдээ л чамтай учирч явья даа
Домог шиг амьдарсан анд чи
Долоон бурхадтай ханьсахаар одсон ч
Дуу болон сэтгэлд минь эгшиглээд
Дурьдатгал болон үлджээ анд минь чи
