Хавтгайрсан олон хоногийн амралтыг улам хавтгайруулж буй газраар Өмнөговь аймаг шалгарав.
Сар шинэ гээд хангалттай долоо хоног амарсан ч Өмнөговь аймгийн ЗДТГ-ынхан хаалга үүдээ түгжээд, хавийн дарга нараа хамаад гадаад руу аялалд гарсаар бараг хагас сарын нүүр үзэж байна.
Тодруулбал Өмнөговь аймгийн Засаг дарга Н.НАРАНБААТАР аймгийнхаа хууль хүчний байгууллагын удирдлагуудаа дагуулан АНУ-руу аялалд явжээ.
Сар шинээр хил давсан Засаг дарга Н.Наранбаатарын аялалын группт тус аймгийн ЗХ-ний 0167-р ангийн захирагч н.Сүхбаатар, ХЦ-ийн 0131-р ангийн захирагч Б.Батхүү, ХЦ-ийн 0166-р ангийн захирагч Б.Мөнхбат, Өмнөговийн мэргэжлийн хяналтын газрын дарга Д.Мөнхтулга, аймгийн Онцгой байдлын ерөнхий газрын дарга Л.Баярсайхан нар багтжээ.
Мөн аймгийн Тамгын газрын дарга Ө.БАЯНМӨНХ нь Засаг даргын орлогч Б.Батболд, Хууль зүйн хэлтсийн дарга н.Ганзориг, Санхүү төрийн хэлтэсийн дарга Б.Наранхүү, Төрийн захиргааны удирдлагын хэлтсийн дарга А.Ганзуузай, Худалдан авах ажиллагааны газрын Р.Бурмаа, хэлтэсийн дарга н.Ишээ, Нийгмийн бодлогын хэлтэсийн дарга Ү.Энхцацрал, Цэргийн хэлтэсийн дарга Ж.Амаржаргал нарын хамт энэ сарын 21-ны өдрийг хүртэл Франц, Италиар аялахаар явжээ.
Өмнөговь аймгийг стратегийн түшиц газар хэмээн тодорхойлж, төр засаг нь анхааралдаа авч, Монгол хүн бүр итгэл сэтгэлээ өгч ихийг хүлээж байхад аймгийн удирдлагууд нь ийм янзтай байж болох уу. Хэзээ дуусах амралт, хэзээ эхлэх ажил вэ. Дарга нарыг ийнхүү амарч зугаалж, ганц биеийн жаргалыг хөөж явах хугацаанд улс орон даяар хүйтний эрч чангарч, хаваржилт хүндэрч, хэд хэдэн удаагийн цасан шуурга болов. Бичиг цаас барьж, ганц гарын үсэг хүлээсэн жирийн иргэд энэ олон өдөр цоожтой хаалга мөргөж, хэзээ ирэх нь тодорхойгүй даргын үүдийг сахиж, яах учраа олохгүй тэвдсээр л…
Түүнчлэн өнгөрсөн 12 сард МАН-аас Иргэдийн төлөөлөгчдийн хуралд сонгогдсон төлөөлөгчид, ЗДТГ-ын бүх хэлтсийн дарга нарын хамт Япон руу аяласан бол, Тамгын газрын дарга Ө.Баянмөнх нь Польшид бас амараад ирсэн юм. Мөн өнөөдөр Засаг даргын нэг орлогч Хонг Конг руу аялалаар явсан сураг байна. Төсвийн мөнгөөр зугаалж, аймаг орон нутгийг хүнгүйдүүлж, ард иргэд, малчдад тулгамдсан олон асуудлыг шийдэж чадах мөнгийг ийнхүү үрэн таран хийж байгаа дарга нартай хэн хариуцлага тооцох ёстой вэ. Төр гэж байдаг бол төрийн албыг эзэнгүйдүүлж байгаа Өмнөговь аймгаа анхааралдаа авна уу.
Эх сурвалж: medeelne.mn
