ОХУ-ын Красноярск хотноо Дэлхийн оюутны спортын өвлийн XXIX универсиад наадам гуравдугаар сарын 02-12-ны өдрүүдэд зохион байгуулагдах гэж байгаа билээ. Дэлхийн 60 орны 3500 тамирчин 11 төрөлд өрсөлдөх энэхүү универсиадад монгол улс орролцохоор бэлтгэлээ базаагаад байна. Монгол улсын тамирчид цана, цанын орон зай баримжаалах, шорт трейк, уран гулгалт, фристайл гэсэн таван төрөлд 16 тамирчин, 6 дасгалжуулагч, албаны 4 хүн гэсэн бүрэлдэхүүнтэйгээр оролцохоор бэлтгэлээ хангажээ.
Баг тамирчдыг үдэн гаргах ёслолд БСШУСЯ-ны Төрийн нарийн бичгийн дарга Б.Баярсайхан, ОХУ-аас Монгол улсад суугаа ЭСЯ-ны 1 дүгээр нарийн бичгийн дарга М.В.Джеваков, БТСГ-ын дарга Ц.Шаравжамц, МОСХ-ны Ерөнхий нарийн бичгийн дарга Д.Жаргалсайхан нарын албаныхан үг хэлж, амжилт хүслээ.
Ёслолын үеэр баг тамирчид тангараг өргөж, БТСГ, МОСХ-ноос бэлтгэсэн Испаний “КЕЛМЕ” брендийн 8-н иж бүрдэл хувцасыг захиалан хийлгэснээ гардуулан өглөө. Тамирчдад Монгол улсын төрийн далбааг БСШУСЯ-ны Төрийн нарийн бичгийн дарга Б.Баярсайхан багийн тугч цанын тамирчин, ОУХМ Б.Ачбадрахад гардуулан өгч амжилт хүссэн байна.
Өвлийн Универсиад наадамд Монголын баг тамирчид анх 1991 оны Японы Саппоро хотноо болсон арга хэмжээнээс эхлэн оролцож байсан түүхтэй. Түүнээс хойш Монголын оюутан тамирчид 14 дэх удаагаа өвлийн Универсиад наадамд хүчээ сорьж байна. Монголын тамирчид Универсиадаас медаль авч чадаагүй ч гэсэн дэлхийн орнуудтай адил энэхүү том наадамдаа тамирчдаа бэлтгэн оролцуулах, тамирчид хувийн амжилтаа ахиулах, олимпийн оноого нэмэх зорилготой оролцож байна.
Энэ удаагийн наадмаас эхлэн Монголчууд уран гулгалт, цанын орон зай баримжаалах спорт, фристайлын төрлүүдэд анх удаагаа оролцож байгаа юм.
