“Эзэнт гүрний соёлын дурсгалууд” баримтат цувралынхаа Ил хаадын түүхэн дурсгалуудын судалгаа, зураг авалтаар Иракт ажиллаж байлаа. Хөдөөгүүр явж явж нэг суурингийн бараа хараад бас ч гэж гайгүй хоолны газар олоод жолооч маань хоол сураглахаар оров.
Удалгүй хоол гарсан бололтой дуудахаар нь ортол халгасаар ирээд “-Жаахан хэцүү газар таарчлаа, эмэгтэй хүмүүс нийтийн газар эрэгтэйчүүдтэй зэрэгцэж суугаад цайлж болохгүй, жорлонд ороод хоолоо идчих!” гэж билээ. Замд таарсан нутгийнхан хэлсэнчлэн ойр хавьд өөр гуанз, мухлаг байхгүй болохоор усыг нь ууж, ёсыг нь дагаад энүүгээрээ цайлж, дараагийн суурин хүртэл гамбираа базаагаад явья даа гэсээр ортол цайны газар байсан гадны улсууд ч гарч, эзэн нь ирээд монголчууд гэдгийг сонсоод жорлонгийнхоо наана жижигхэн өрөөнд ширээ сандал болж тэр хугацаанд бараг л хаалгаа барьж бид цайлаад гарч билээ.
Эмэгтэй хүн үзэл бодлоо илэрхийлэх эрхгүй, боловсрол эзэмшиж хөдөлмөрлөх эрхгүй, эрэгтэй хүн рүү эгцлэн харах эрхгүй, гудамжаар зэрэгцэн алхах эрхгүй, бүжиг бүжиж дуу дуулж болохгүй гэх мэт зан заншил, хууль дүрэмтэй бүс нутагт ажиллах бүрийдээ өрх гэр болоод төр улсын хэмжээнд эмэгтэйчүүдийн эрх ба байр сууриар төр ёсны арвин өв соёлтой, ардчилсан, эрх чөлөөт, тусгаар Монголоороо бахархдаг. 3 дугаар сарын 8-ны өдөр “Эрх нь хязгаарлагдаж, ялгаварлан гадуурхагдаж, хүчирхийлэлд өртсөн эмэгтэйчүүдийн төлөө өргөн дэлхий нэгддэг өдөр!”
***
Өргөн дэлхийд сая сая эмэгтэйчүүд “үндэс угсаа”, “арьсны үзэл”, “нийгмийн гарал”, “итгэл бишрэл”, харгис суртал гэх мэт олон хүчин зүйлийн улмаас эрх нь хязгаарлагдаж, гадуурхагддаг. Бүсгүй заяанд төрсөн хэн ч үзэл бодлоо илэрхийлэх эрхгүй, боловсрол эзэмшиж хөдөлмөрлөх эрхгүй, эрэгтэй хүн рүү эгцлэн харах эрхгүй, гудамжаар зэрэгцэн алхах эрхгүй гэх мэт зан заншил, хууль дүрэмтэй улс оронд ажиллах бүрийдээ өрх гэр болоод төр улсын хэмжээнд эмэгтэйчүүдийн эрх ба байр сууриар төр ёсны арвин өв соёлтой, ардчилсан, эрх чөлөөт, тусгаар Монголоороо бахархдаг. 3 дугаар сарын 8-ны өдөр Эрх нь хязгаарлагдаж, ялгаварлан гадуурхагдаж, хүчирхийлэлд өртсөн эмэгтэйчүүдийн төлөө өргөн дэлхий нэгддэг өдөр. Даян дэлхий энхжин хөгжих болтугай!
Эх сурвалж: Sanchir Tasam
