Мах боловсруулах үйлдвэрүүдээс 31 зөрчил илэрчээ

НИТХ-ын тэргүүлэгчдийн 2018 оны 11-р сарын 14-ний өдрийн 171 дүгээр тогтоолоор нийслэлийн хүн амын хүнсний аюулгүй байдлыг хангах, хот орчмын мах, махан бүтээгдэхүүний үйлдвэрлэл, хадгалалт, эрүүл ахуйн байдлын талаар судлах, санал, дүгнэлт боловсруулах ажлын хэсгийг байгуулсан байдаг.
Энэхүү ажлын хэсгийн Ахлагч, НИТХ-ын Тэргүүлэгч Н.Батсүмбэрэлийн баталсан удирдамжийн дагуу хяналт шалгалтыг Баянзүрх, Сонгинохайрхан, Налайх дүүргүүдийн нутаг дэвсгэрт үйл ажиллагаа явуулж буй мал төхөөрөх, мах боловсруулах үйлдвэрүүдэд шалгалт хийжээ.
Шалгалтад 11 үйлдвэр хамрагдсан бөгөөд нийтдээ 31 зөрчил дутагдал илэрсэн байна. Тодруулбал урьдчилсан хяналтад хамрагдаагүй, дүгнэлт гаргуулаагүй, зөвшөөрөлгүй үйл ажиллагаа явуулж байсан Бугат-Эрхэс ХХК-д 500.0 мянган төгрөгийн шийтгэлийн арга хэмжээ авч, “Эрээн сити юнайтэд” ХХК, “Мөнх төгрөг” ХХК-ийн махны үйлдвэрүүдийн үйл ажиллагааг түр зогсоожээ.
Нийт гарсан зөрчлөөс 21-ийг буюу 68 хувийг нь арилгуулж, 15,5 сая төгрөгийн торгууль ногдуулж, бүрэн барагдуулсан бөгөөд бусад зөрчлүүдийг арилгуулахаар эрх бүхий албан тушаалтнуудад албан даалгавар болон шаардлагуудыг хүргүүлж ажилласан байна.
Үндсэндээ мах экспортлож байгаа нь сайшаалтай ч БНХАУ-д дулааны аргаар боловсруулсан мах экспортлох зөвшөөрөлтэй аж ахуй нэгжийн нэрийг ашиглан зөвшөөрөлгүй аж ахуй нэгжүүд дулааны аргаар мах боловсруулах үйл ажиллагаа явуулж байжээ. Мөн БНХАУ-ын иргэд олноор мах худалдан авах, боловсруулах үйл ажиллагаанд оролцсон нь тогтоогджээ.
Өнгөрсөн өвөл Хятадууд их хэмжээний мах нөөцөлж өндөр үнээр худалдан авч, худалдааны төвүүд махны хомсдолд орж, үнэ хөөрөгдөж эхэллээ гэсэн мэдээлэл түймэр шиг дэгдсэн. Үүний уршгаар махны үнэ ханш хөөрөгдөж, тодорхой хэмжээнд хомсдол ч бий болсон юм. Иймээс махны үнийг зохиомолоор өсгөх асуудалд хатуу анхаарч арга хэмжээ авч ажиллахыг мөн НИТХ-ын Тэргүүлэгч Н.Батсүмбэрэлийн ахалсан ажлыг хэсэг тайландаа тусгасан байна.