Өчигдөр ЦЕГ-ын Эрүүгийн цагдаагийн албаны албан хаагчид Ц.Элбэгдоржийн оффист нэгжлэг хийж, 1000 гаруй зураг хурааж авсан гэх мэдээлэл нийтэд цацагдсан. Үүнийг Ц.Элбэгдорж няцаасан мэдэгдэл хийсэн.
Тэгвэл прокурорын байгууллагын эх сурвалж, “Ц.Элбэгдорж Ерөнхийлөгчөөр ажиллаж байх хугацаандаа Их тэнгэр цогцолборт амьдарч байсан. Энэ бол Ерөнхийлөгчид төрөөс үзүүлдэг хангамж. Их тэнгэр цогцолборт өлгөсөн уран зургуудын зарим нь алга болж байна гэсэн мэдээллүүд албаны шугамаар ирж байсан. Сүүлд гомдол ч ирсэн. Ингээд өчигдөр тодорхой ажиллагаа явуулж, Сүхбаатар дүүргийн 11 дүгээр хороололд байрлах Ц.Элбэгдоржийн эхнэр Х.Болормаагийн дүү Х.Болдбаатарын гэх оффист гэрч байлцуулж нэгжлэг хийсэн. Нэгжлэг хийгээд тэндээс есөн зураг хурааж авч явсан. Үүнээс урьдчилсан байдлаар нэгийг нь Их тэнгэр цогцолбороос алга болсон уран зураг мөн байна гэж үзэж байгаа. Холбогдох байгууллага ажлаа үргэлжлүүлж байгаа тул үүнээс дэлгэрэнгүй мэдээлэл өгөх зохисгүй. Зургуудыг хурааж авсан нь хулгайнх гэдгийг нотлохгүй. Тэр зургууд биш байвал эзэнд нь буцаагаад өгнө” гэж хэллээ.
Х.Болдбаатар нь Монголын такси үйлчилгээ эрхлэгчдийн холбооны тэргүүн бөгөөд Улаанбаатар такси, Гранд такси компаний захирлаар ажиллаж байсан. Тэрээр мөн UBT Garden хүлэмжийн аж ахуй эрхэлж, нийслэлийн ногоон байгууламжид хувь нэмрээ оруулсан нэгэн. Зарим эх сурвалж түүнийг 11 дүгээр хороолол дахь оффисоо нүүлгэж Дүнжингарав хорооллын тэндэх Чухаг-2 хороололд байгуулсан гэх мэдээллийг өгч байна. Харин 11 дүгээр хороололд Ц.Элбэгдоржийн гэх Элбэг арт галлерей байдаг байж болзошгүй байна.
