УИХ-ын гишүүн асан Л.Гансүх цаг үеийн асуудлаар мэдээлэл хийлээ.
Тэрээр “Цензургүй яриа нэвтрүүлэгт оролцсны дараа олон хүн над руу холбогдож уулзлаа. Тэд Ц.Элбэгдорж, Б.Хурц нарын гэгдэх “Шударга бусын хонгил”-оос болж хохирсон хүмүүс байсан. Миний бие ч энэ хууль бус зүйлийн золиос болсон учраас эдгээр хүмүүс надаас тусламж хүсч ирсэн гэж ойлгосон. Тиймээс энэхүү хонгилыг нураах, цаашид ийм хонгил бий болгохгүй байх тал дээр анхаарч ажиллах, хууль эрх зүйн өөрчлөлтөд санал оруулах зорилгоор хэсэг хүмүүстэй нэгдэж “Шударга бусын хонгилд хэлмэгдэгсдийн холбоо” ТББ байгууллагыг байгуулж байгаагаа зарлаж байна.
Манай байгууллагын зүгээс энэ хонгилд хэлмэгдсэн бүх хүнийг хамтран ажиллахыг урьж байна. “Шударга бусын хонгилд хэлмэгдэгсдийн холбоо” ТББ байгууллагын зорилго бол хонгилд хохирогч болсон бизнес, лиценз, үндсэн хөрөнгөө дээрэмдүүлсэн, хилсээр шийтгүүлж шоронд орсон болон хорихоос бусад төрлийн ял шийтгүүлсэн хүмүүсийн эрх ашгийг хамгаалж, шүүхээр цагаатгуулах, хохирлоо нөхөн төлүүлэх тал дээр хамтран ажиллана. Мөн шүүх, цагдаа, прокурор, АТГ-т шургалсан хонгилын гишүүд, тэдэнд олзлогдсон хүмүүсийг илчлэх, холбогдох хариуцлагыг оногдуулах тал дээр төр засгийг шахаж ажиллана. Түүнээс гадна дахин хонгил бий болгохгүй байх тал дээр онцгой анхаарч, хууль санаачлагч тодорхой хэсгүүдтэй тул ажиллана гэсэн үндсэн зорилготой.
Бидний зүгээс хонгил гээч зүйлийг туулж байгаа, туулж гарсан бүхий л баримт нотолгоог ил болгож, танилцуулж, таслан зогсоох тал дээр төр засаг, хувийн хэвшилтэй хамтран ажиллахад бэлэн байна.
“Шударга бусын хонгил” бол албан ёсны олон улсын хэлээр мафи юм. Энэ мафид хуулийн байгууллагын удирдлагууд бүрэн хамрагдсан том сүлжээ юм.
Хүний шударга ёс, эрх чөлөө гээд эрхэмлэн дээдлэх ёстой болгоныг энэ мафийнхан алдагдуулж байна. Өнөөдөр тэд хамгийн сүүлийн боломжоороо өөрсдийн сүлжээг хамгаалж байна. Өчигдөр Ерөнхийлөгчийн санаачилсан хуулийг УИХ-ын гишүүд хэрхэн эсэргүүцэж байгааг, худлаа баг зүүсэн үйл ажиллагааг нь хараад үнэхээр харамсаж суулаа. Хууль хүчний байгууллагуудын удирдлагын түвшинд бий болсон мафийн бүтцийг нэг хоногийн өмнө ч болтугай задлах хэрэгтэй. Гурван хүнийг буулгахын тулд гурван том хуульд өөрчлөлт оруулах нь буруу гэж хэлж байгаа зарим хүний байр суурийг дэмжиж байна. Гэхдээ энэ мафижсан тогтолцоог задлахын тулд нэг цаг, нэг минут ч хүлээх хэрэггүй. Биднийг сайхан ирээдүйг хүлээн суух тусам тэд хууль бус үйл ажиллагаагаа улам л нуун далдалсаар байх болно.
Ц.Элбэгдорж Ерөнхий шүүгч, Ерөнхий прокурор хоёрыг хугацаанаас нь өмнө дарамталсаар байгаад огцруулахад хэн шүүхийн шударга ёсны төлөө хашгирч байсан бэ? Тэр томилсон прокурор, шүүгч нь АТГ-ын хоёр даргыг шоронд явуулж байхад хэн шударга ёсыг нэхэн шаардаж байсан юм бэ.
Одоо шинэчлэлт хийх гэхээр системийг бүхэлд нь нураах гээд байна гэж яриад байх юм.
Энэ зорилготойгоор томилогдсон хүмүүсийг зайлуулах, шударга системийг хамгаалах хоёр чинь шал өөр ойлголт шүү. Би хувьдаа Төрийн гурван өндөрлөг хийх ёстой зүйлээ ухамсарлаж байгаад нь баярлалаа гэж хэлмээр байна. Аргагүй нөхцөл байдал үүсчихээд байна” гэв.
