Өнөөдөр Нийслэлийн Засаг дарга бөгөөд Улаанбаатар хотын Захирагч С.Амарсайхан мэдээлэл хийлээ. Үүнтэй холбогдуулан хотын захирагчийн анхаарал татсан мэдээллүүдийг хүргэе.
- Миний бие Улаанбаатар хотын захирагчийн ажлыг хоёрдугаар сарын 27-ны өдөр хүлээн авснаас хойш өнөөдрийг хүртэл хугацаанд хийж хэрэгжүүлсэн ажил, хийж хэрэгжүүлэх үйл ажиллагаа, төсөл, хөтөлбөр, нийслэлийн төр захиргааны байгууллагуудын үйл ажиллагааны уялдаа холбооны талаар мэдээлэл хийж байна. Ер нь цаашдаа авч хэрэгжүүлж байгаа аливаа шийдвэр, үйл ажиллагааны талаар миний бие болон бусад албаны хүмүүс долоо хоног бүр танилцуулах болно.
- Иргэд, аж ахуйн нэгж, төр захиргааны байгууллагуудтайгаа хамтран ажиллаж үр дүнтэй ажиллах нь чухал байна. Ингэж ажиллахдаа хоёр гурван тодорхой чиглэлд ажиллана. Харамсалтай нь өнгөрсөн 20 гаруй жилд бодлого шийдвэр уялдаагүй, иргэдийн оролцоо хангалтгүй явж ирсэн нь үнэн. Өнөөдөр нийслэл зах замбараагүй тэлсэн нь үнэн, агаар, хөрсний бохирдол их байгаа нь үнэн. Газар зохион байгуулалт буруу явагдаж ирсэн нь үнэн. Шийдвэрлэх асуудлууд олон байна.
- НИТХ-ын төлөөлөгч С.Мөнхчулуун Нийслэлийн өмчид бүртгэлтэй байрыг өөрийн хадам эхэд өмчлөх санаачлагыг НИТХ-д 3-4 удаа оруулсан ч би гарын үсэг зуралгүй буцаасан. Үүний хариуд надтай холбоотой гүтгэлэг тарааж байгаа юм. Цаана нь өөрийнх нь ажил амьдралтай холбоотой олон асуудал байгаа юм билээ. Үүнтэй холбогдуулан удаа дараа намайг гүтгэсэн байх.
- Шүд, эрүү, нүүрний төв 4,8 тэрбум төгрөгөөр 1000 м.кв газар газар худалдан авсан байна. Төлбөрийн нь 70 хувийг оруулжээ. Үлдсэн төлбөрийг би өгөхгүй. Яагаад гэвэл тэр барилга нь гаднаа зогсоолгүй, шаардлага хангахгүй байгаа. Энэ мэт ажил хийж байгаа хүмүүс үүнийгээ хамгаалж элдэв гүтгэлэг тарааж байна. Энэ мөнгөөр 3000 м.кв машины зогсоол хийх боломжтой гэж би хэлсэн. Үлдэгдэл мөнгийг нь ч олгохгүй гэдгээ хотын дарга болоод мэдэгдсэн.
- БНХАУ-ын төрийн өмчит Тяньжинь фүүдс компанид 50 га газарт хүлэмжийн аж, ахуй эрхлэх зөвшөөрлийг олгосон гэх мэдээлэл гараад байна. Тийм зүйл байхгүй гэдгийг мэдэгдэж байна. Би тийм шийдвэр гаргаагүй ээ, гаргахгүй ээ.
- Нийслэлийн Засаг дарга миний бие ЗГХЭГ-ын дарга Л.Оюун-Эрдэнэд судалгааны талаар албан бичиг илгээсэн. Энд ямар нэг газар олгоогүй, харин тариаланчдад хэрхэн хүлэмж байгуулах талаар судалгааг хийх талаар байсан. Гэвч үүнийг зориудаар гуйвуулж байна. Ийм мэдээлэл гарах болсон нь Х.Мөнхчулууны ашиг сонирхолтой холбоотой. Түүний хувьд төрийн өмчийн компанийг хувьчилж авах хүсэлтийг хэд хэдэн удаа гаргасан ч би зөвшөөрөөгүй учраас ийнхүү гүтгэлэг тарааж байна. Үүнийг нь мэдэх хүмүүс бий.
- Төв цэвэрлэх байгууламж дээр гарсан ослын талаар өнөөдрийн байдлаар холбогдох байгууллагуудын дүгнэлт эцэслэгдэн гараагүй байна. Гарахаар мэдээлэл хийнэ.
- Би “Оюуны Ундраа” компанийн үйл ажиллагаанд оролцохоо болиод хоёр жил болж байгаа. Янз янзын гүтгэлэг тарааж байгаа хүмүүсийг цагдаагийн байгууллагад өгч шалгуулж байгаа. Хуулийн хариуцлага хүлээлгэнэ.
- Баянзүрх дүүрэгт хоёр удаа төрийн аудитын хязгаарлалттай дүгнэлт авсан. Энэ дүүрэгт ажил хийж байгаа хүн байхгүй. 360 гаруй мянган иргэд, оршин суугчдын хувь заяагаар сүүлийн гурван жил тоглож байна. Санхүүжилтээ ил болго гэхээр энд тэнд жагсаал цуглаан хийж, гурван долоо хоног төрийн байранд хооллож ундалж, унтаж, зодолдож байна. Хуульгүй юм шиг аашилж байна.
- Хүнд хамаагүй асуудлыг хамаатуулах, хамаатуулахын тулд ах дүү, амраг садан, аав ээжийг нь элдэв янзын үндэслэлгүй гүтгэлэгээр доромжилж, удам угсаагаар нь хүртэл дорожилж байна. Улс төр хийж болно. Улс төр ажил хэргийн журмаар хэнийг ч үгүйсгэж доромжилж болно. Харин хүний гарал үүсэл, удам угсаа, аав ээж, ах дүү гэдэг бол ямар ч амьдралтай, ямар хүний хувьд бол хамгийн үнэ цэнэтэй зүйл байдаг. Мини аав Увс аймгийн Бөхмөрөн сумын харъяат. Налайхын уурхайд насаараа ажилласан Сайнбуян гэж хүн байсан. Улс төр хийхдээ жаахан жудагтай, бас хэм хэмжээтэй, дээр нь жаахан бодолтой хийх ёстой байх гэж бодож байна. Тэр хүмүүсийг их өрөвлөж байгаа. Би энд удам угсаагаа нууж, хаах ямар ч шаардлага байхгүй.
- Тэр АНУ-д амьдардаг гэх мэдээлэл хийсэн байсан. Би хуулийн байгууллагад хандаж С.Амарсайхан гэдэг хүний аав нь хүүр ухаж, хүний яс өндийлгөдөг хүн байсан юм уу, нүүрс ухаж ард түмний гал голомтыг бадраалцаж явсан монгол хүн байсан юм уу гэдгийг нь тогтоолгоно. АНУ-д байгаа учраас монголын хууль хэрэгжихгүй гэж эндүүрээдл байх шиг байна. Тэр амьдарч байгаа мужийнх нь хуулийн байгуулагад нь хандаж тэр мэдээлэл хийгээд байгаа хүнд нь хуулийн хариуцлагыг нь хүлээлгэнэ.
- Монгол улсад улс төр хийж байгаа олон хүн бий. Нэг бол өөрсдийнх нь захиалгатай дарга байх ёстой. Эсвэл өөрсдийнх нь хүслээр хөдөлдөг, барьцаанд орсон, дохиураар хөдөлдөг хүүхэлдэй байх ёстой. Тэрэнд нь орохгүй бол өөртэйгөө ижил хүн болгох гэж төлбөртэй оролдлого хийдэг буруу жишиг тогтсон байна. Үүнтэй нэлээн тууштай явж, асуудлыг нэлээн ил тод нээлттэй гаргана.
