Эвтэй байхсан

Энэ дэлхийн хамгийн залуу улс Өмнөд Судан. Байгуулагдаад дөнгөж 8 жил болж буй энэ улс асар их зовлон, зүдгүүр туулжээ. Эртнээс араб, африк холилдсон гүрэн байсан боловч яс үндэс, цус энэ тэрээ ярьж байгаад иргэний дайн дэгдээж, улмаар африк ба арабаараа салж Өмнө Судан улсыг үүсгэн байгуулсан бололтой юм. Энэ улсын түүх 3 сая хүний амиар бүтжээ. 23 жил үргэлжилсэн иргэний дайнд Монгол Улсын хүн амтай тэнцэх хэмжээний иргэд амиа алдсан бөгөөд одоо ч гэсэн байгалийн баялгаасаа болоод тэрнээс дор нөхцөл байдалд орсон байна.
Иргэний дайны явцад бүлэглэлүүдийг АНУ, Хятад, Европ гээд том гүрнүүд далдуур санхүүжүүлж байсны дотор хамгийн том спонсор нь Америк байжээ. Шалтгаан нь газрын тос бололтой юм. Газрын тосны асар их баялагтай энэ улс өнөөдөр үүнийхээ хараалыг жинхэнэ утгаар нь хүртэж байна. Шинэ улсаа байгуулсны дараа удирдагчид нь хамгийн их тусалж байсан америкаас шууд нүүр бууруулан Хятадуудад газрын тосны худалдааны эрхээ шилжүүлжээ. Хажуугаар нь Оросууд бас орж ирсэн байна.Тэр чигээрээ том гүрнүүдийн тоглоом.
Шар айраг уунгаа танилцсан Өмнө Судан залуу манай улсын удирдагчид уг нь газрын тосоо Америк, Хятад, Оросуудад 1/3-р тус бүр хуваагаад өгчихөж болдоггүй юм байх даа. Тэгвэл манай улсын асуудал шууд цэгцэрнэ дээ гээд ярьж байна. Дайн, дотоод үймээний улмаас гэр бүлээсээ хол байдаг, эхнэр хүүхэдтэйгээ жилд 3-хан удаа л уулзаж чаддаг энэ залуу “Ээ дээ Ганзориг минь, дайн байлдаангүй улсад ажиллаж амьдарна гэдэг бол чамд бурхан өгч буй хамгийн том бэлэг шүү. Энх тайван, эв нэгдлээ үргэлж эрхэмлэж яваарай” гээд уйлж байна.
Газрын тос нь энэ улсын хөгжлийн идээ бээр нь болжээ. Хэдхэн хүн байгалийн баялгийн хамаг үр шимийг нь хүртдэгээс болоод ард иргэдийн дунд баян ядуугийн ялгаа даамжраад зогсохгүй, олигарх бүлэглэлүүдийн дунд эрх мэдэл, хүчний дайн нь улам хурцдаж байгаа юм байна. Үүнээс болоод ерөнхийлөгч нь фракцууддаа эрх мэдэл хуваарилж 5 дэд ерөнхийлөгчтэй болсон байсан. Энэ дэлхий дээр 5 дэд ерөнхийлөгчтэй улс байдгийг мэдэх үү гээд хөөрхий залуу толгойгоо сэгсэрч байна. Хурдан энэ газрын тосны нөөц нь дуусаасай билээ. Ер нь манай улсад энэ новшийн газрын тос хэзээ ч байгаагүй байсан ч болоосой гэж үнэн сэтгэлээсээ ярих энэ залуугаас өөрийн улсынхаа ирээдүйг тольдчих вий гэж сүүдрээсээ цочин цочин ярьж суулаа.
Сонирхолтой нь энэ залуу Суданы монго омгоос гаралтай юм байна. 10 гаруй жилийн өмнөөс эд нар өөрсдийгөө Mongolians гэж албан ёсоор дотроо нэрлээд эхэлжээ. Ийм нэртэй улс байдаг юм байна гэдгийг мэдсэн ч гэсэн энэ нэрийг хаяхгүй гэж байна. Эвтэйхэн та нараас Монгол гэдэг нэрийг чинь авна даа гээд инээж байна. Өмнөд Суданы дээд шүүхийн шүүгч, зарим нэг гол улстөрчид Монгол омгоос гаралтай аж. Үүгээрээ тэд маш их бахархдаг юм байна. Сонин шүү.
Хэдүүлээ хоорондоо талхилцаж муудалцахаа болиод нээх сайхан эвтэй найртай ажиллаж амьдрах юм сан даа.