Гадны аль нэг улс оронд амьдардаг, магадгүй тэндээс орогнол, цагаачлал хүсэмжилж буй, эх орноо муулж, хараан зүхдэг нөхдүүд бусдаас төлбөр авч захиалгатайгаар хүн гүтгэж, доромжилдог ажил хийж амь зогооно. Тэдний сошиал хуудас ашиглан тарааж буй мэдээлэл үнэнд үл нийцэх хэдий ч гүрдсээр байгаа нь харамсалтай.
Хамгийн гол нь монголын хилийн гадна байгаа гэдэг шалтгаанаар хуулийг уландаа гишгэж, хүнийг дур зоргоороо доромжилж, түүнийгээ олон нийтэд түүгээн цацаж байна. Хэлж ярьж буй зүйлээс нь харвал тэдгээр хүмүүсийг сэтгэц хувьд өөрчлөлттэй, эрүүл биш гэж оношломоор. Магадгүй нэгэн цагт ад үзэгдэж, шоовдорлогдож явсан этгээдүүд тэрхүү сэтгэлд үлдсэн гомдлоо тайлахаар сошиал хуудсыг дамжуулан хүсэл тачаал, ам хувийн ашиг сонирхолд нийцүүлэн ашиглаж байгаа байж болох юм.
Мөн тэднээс үнэнч зан төлөвийн тухай өө сэв хайгаад хэрэггүй. Өмнө нь нөхөрлөж байсан хүнээ маргааш нь хэнэгч үгүй муулна. Өчигдөр муулж байсан хүнтэйгээ маргааш нийлчихээд өөр бусдыг гүтгээд явах нь тэдний хувьд байдаг л хэвийн нэг зүйл мэт. Хүний үнэр, шударга ёсны тухай тэднээс асуугаад ч хэрэггүй байгаа биз.
Ийм хүмүүс худлаа эх оронч, шударга нэгний дүр эсгэчхээд цаанаа улс орны, шударга ёсны эсрэг үйлдэл хийж, хуйвалдаж, тохиролцож ашиг хүртэж байна. Тэд ашиг хүртэж болно л доо. Гэвч тэдний энэхүү үйлдлийн золиос нь мэдээлэл дутмаг иргэд л болж хувирдаг. Ер нь сошиалд сэтгэцийн өвчтэй хүн олшрох нь аюултай.
Тэд бол жинхэнэ пополист, урагшлах замын садаа юм. Өөрсдөө хийж бүтээсэн, гийгүүлсэн зүйл байхгүй. Тэгсэн атлаа дутуу дулимаг мэдээлэлдээ тулгуурлан хүнийг хүүр болгосон ч чадахаар цайчихсан хүн дүрстнүүд. Тэдний бэлтгэн хүргэж буй мэдээллийг үнэ цэнэгүй, худал хуурмаг гэдгийг мэдээд үл тоох хэсэг байдаг. Үүний хажуугаар салхинд туугдсан хамхуул шиг мэдээллийг нягтлахгүйгээр шууд хүлээн авч, итгэх хүмүүс ч сошиалд олон байна. Энэ бол нийгэмд, олон нийтэд сөргөөр нөлөө үзүүлж болох аюул юм. Тэгвэл хүмүүст буруу мэдээлэл өгч, бухимдуулж, түүнээсээ дур таашаал авдаг хүмүүсийг сэтгэцийн хувьд өөрчлөлттэй гэхээс өөр юу гэх вэ дээ. Тэдгээр хүмүүс үнэнд гүйцэгдэж, худал мэдээлэл тараасан нь нотлогдсон ч ичихгүй. Бүр цайчихсан гэж хэлж болно.
Харин ийм хүмүүсийг олшруулахгүй байх, олон нийтийн эрх ашгийг хамгаалахын тулд нийтээрээ мэдээлэлд цензуртай ханддаг л болчихмоор байна. Аливаа мэдээлэл бүр хоёр талтай. Өөрөө хэлбэл нэг талд нь амин хувийн эрх ашгаа бодож, гэмгүй нэгнийг араатан, алуурчин, хүчирхийлэгч болгохоор гүтгэж, доромжилж байх нь элбэг. Тиймээс л мэдээллийг салхинд хийсэх хамхуул шиг бус харин оюунт хүмүүн шиг хүлээн авдаг байх нь чухал юм. Энэ тохиолдол хүнийг хүссэнээрээ доромжилж, бах таваа хангадаг ёс зүйн хомсдлууд энэ нийгмээс арчигдах нь цаг хугацааны л асуудал билээ.
Та байнга хар бараан өнгө давамгайлсан мэдээлэл уншихаас залхахгүй байна гэж үү…
