АТГ-ын дарга, дэд дарга нарыг томилохыг дэмжлээ

Дөнгөж сая УИХ-ын чуулганы хуралдаанаар Авлигатай тэмцэх газрын дарга, дэд даргыг чөлөөлөх, томилох тухай асуудлыг хэлэлцэж дууслаа. Хэлэлцэж буй асуудалтай холбогдуулан гишүүд асуулт асууж дууссаны дараа санал хураалтыг явууллаа.
АТГ-ын даргаар Зандраагийн Дашдавааг томилуулах Монгол Улсын Ерөнхийлөгчийн саналыг хуралдаанд оролцсон гишүүдийн 94.6 хувь, Авлигатай тэмцэх газрын дэд даргаар Жанжаагийн Батсайханыг томилуулах Монгол Улсын Ерөнхийлөгчийн саналыг гишүүдийн 87.5 хувь нь дэмжсэн санал өгчээ.
Ийнхүү Авлигатай тэмцэх газрын дарга, дэд даргыг томилох санал дэмжигдсэн тул Авлигатай тэмцэх газрын дарга Х.Энхжаргал, дэд дарга Ц.Нямдоржийг тус тус үүрэгт ажлаас нь чөлөөлөх эсэх санал дээр санал хураалт явуулахад гишүүдийн олонх дэмжсэн юм. АТГ-ын дарга нарыг томилох, чөлөөлөх асуудал хэлэлцэж дууссан тул энэ талаарх УИХ-ын чуулганы санал, дүгнэлтийг Ерөнхийлөгч Х.Баттулгад бичгээр хүргүүлэхээр тогтсон байна.
АТГ-ын даргад З.Дашдаваа нь:
Мэргэжил: Эрх зүйч, хууль зүйн ухааны магистр
Боловсрол: 1992-1996 онд Цагдаагийн дээд сургууль
МҮДС Хууль зүйн ухааны магистр
Ажлын туршлага:
1995-1996 онд Хэнтий аймгийн Цагдаагийн газарт Эрүүгийн төлөөлөгч;
1996-2001 онд Баянгол дүүргийн цагдаагийн хэлтэст хэрэг бүртгэгч, эрүүгийн төлөөлөгч,
2002-2003 онд Эрүүгийн цагдаагийн газарт эрүүгийн төлөөлөгч;
2003-2006 онд Говь-Алтай аймгийн Засаг даргын дэргэдэх цагдаагийн хэлтэст Эрүүгийн тасгийн дарга;
2006-2008 онд Сонгинохайрхан дүүргийн Засаг даргын дэргэдэх Цагдаагийн хэлтэст Эрүүгийн тасгийн дарга;
2008-2014 онд Цагдаагийн ерөнхий газрын Дотоод хяналт, шалгалт, аюулгүй байдлын хэлтэст тасгийн дарга, хэлтсийн дарга;
2014-2017 онд Хууль сахиулахын их сургуулийн Цагдаагийн сургуулийн захирал;
2017 оны 03 дугаар сарын 16-ны өдрөөс Сүхбаатар дүүрэг дэх Цагдаагийн хоёрдугаар хэлтсийн даргаар тус тус томилогдон ажилласан.
Одоо Цагдаагийн ерөнхий газрын Дэд даргаар ажиллаж байна.
АТГ-ын дэд даргаар сонгогдсон Ж.Батсайхан нь:
Боловсрол: Төв аймгийн Жаргалант сумын дунд сургуулт
Цагдаагийн дээд сургуулийг Хуульч, эрх зүйч мэргэжлээр төгссөн
Мөн ОХУ-ын Дотоод явдлын яамны Удирдлагын академид Хууль зүйн ухааны доктор зэрэг хамгаалсан.
Ажилласан байдал:
2007-2016 оны хооронд АТГ-т хэлтсийн дарга
2016-2017 оны хооронд Шүүхийн шийдвэр гүйцэтгэх ерөнхий газрын дэд даргаар ажиллаж байсан туршлагатай юм.