Харгислал, хүн ёсонд баймгүй хэрцгий үйлдлүүд өглөө бүр цаг агаарын мэдээ шиг л цацагдаж байна. Яачихсан нийгэм гэхээрээ ийм хэрцгийллийг хүлээн зөвшөөрч, айдас, хүйдэстэйгээр жим даган алхана вэ. Охин үртэй хүний дотор элдвийн муу бодол эргэлдэж, тэднийгээ араатнуудаас хэрхэн хамгаалах вэ гэж цаг хором бүрт бодлогоширч байна.
Араатныг байгалийн хуулийн дагуу шийтгэх ёстой гэсэн араатанлаг үгс олон нийтээс гарч байгаа энэ үед парламент дахь эмэгтэй гишүүд яагаад амаа үдүүлсэн мэт анир чимээгүй явна вэ. Монголд гэлтгүй дэлхийд баймгүй олон эмэгтэй энэ парламентад суудал авсан. Эх хүний уян зөөлөн бодлого, хайр энэрлийг тэднээс хүссэн эхчүүд олон байна. Гэвч тэд эрчүүдээсээ ч илүү хатуу авир гаргах юм.
Охин хүүхэд хүчирхийлэлд өртөж, уулын мухарт булагддаг хатуу нийгмийг эхчүүд, эмэгтэйчүүд, бодлого тодорхойлж буй бүсгүйчүүд л зөөллөх учиртай. Гэтэл бидний хүссэн нийгмийн эрх зүйн зохицуулалт эмэгтэй гишүүдийн оюунд бүрэлдэж чадахгүй л байна. Тэд эсвэл огт хүсэхгүй байна уу.
Уг нь энд улс төржих ямар ч шаардлага алга. Араатан авирыг зөөллөж, охидоо, бага балчир хүүхдүүдээ, ахмад настнуудаа хайрлах энэрэх ухаанд суралцахын тулд бидэнд юу хэрэгтэй вэ. Яавал хүн ёсоор аж төрөх вэ. Ийм л сэтгэл, ийм л эрэлхийлэл эмэгтэй түшээдийн амнаас гарах болов уу гэж гурван жил харлаа. Хүлээлээ. Даанч тэд ийм үг, үйлдэлд хармын сэтгэлээр хандаж байна.
Олон нийт шаардаж, нэхэж байж л тэд хөдлөх юм. Хөдлөхөөрөө хоосон улс төр ярьж, хувийн амбиц хөөцөлдөж байна. Үнэндээ эмэгтэй гишүүд олонхийн санал өгөх кноп төдий байсаар л хугацаагаа дуусгаж байх шиг байна. Гэр бүлийн хүчирхийллийн эсрэг, бага насны охид хөвгүүдийг араатнуудаас хамгаалахын тулд хийсэн хэрэгжүүлсэн ажил байна уу, үгүй юу?
Өнөөдөр Ч.Ганжавхлан гэх залуу л хүүхдийг хүчирхийллээс хамгаалахын төлөө идэвхтэй, сэтгэлтэй ажиллаж байна. Түүний үйлдэл бүхний нүд дээр төв нь тоосго тоосгоор өргөжин тэлж байна. Эрх мэдэл, албан тушаалгүй, жирийн л нэг залуугийн үйлдлийг хараад эмэгтэй гишүүдийн өмнөөс ичиж, нүүр хийх газар олдохгүй юм.
Тэдэнд эрх мэдэл байна. Тэдэнд албан тушаал, эрх зүйн орчинд өөрчлөлт хийх боломж, цаг хугацаа ч байна. Гэтэл яагаад … Тэд яагаад хүүхдээ, эмэгтэйчүүдээ хамгаалахын үл хүснэ вэ.
УИХ дахь 13 гишүүний санал гэдэг маш хүчтэй, эсэргүүцэх боломжгүй лобби юм. Энэ хүчийг ашиглавал хүүхэд хамгааллын талд дутагдаж, зөрчигдөж байгаа асуудлыг төвөггүй шийдвэрлэж болмоор. Хөрөнгө мөнгө, газар, байшин гэхээсээ илүү эмэгтэй хүний сэтгэл л дутагдаад байгаа. Гэвч манай 13 эмэгтэй гишүүд эмэгтэйчүүдийн, эхчүүдийн, бага балчир хүүхдийн асуудал гэхээсээ улс төрийн агуулгатай, албан тушаалын шинж чанартай, хөрөнгө мөнгө ихээр төвлөрсөн олон нийтийн анхаарал ихээр өртдөг асуудал л хамааралтай байгаад байна.
Туул гол дээр очиж шоуддаг, ЖДҮ-ээс зээл авч бизнесээ дэмждэг, боорцог идэж, бохь зажилж хурал үймүүлдэг, ахыгаа дагаж, улс төрийн бойкот хийдэг, бусдын кнопыг дарж, хууль баталдаг гээд болохгүй бүхэнд л холбогдчихоод байх юм.
Гишүүд минь дээ, хүч эрх мэдэл бүгд байхад хамаг зүйл дууссаны дараа гарч ирээд мэдэгдэл хийж зогсохыг нь чинь харахаар ичээд байх юм аа, ичээд байна.
-Аяа бас, аавыгаа өргөхгүй, эрийг өргөгч охид ичиг
-Аяа бас, төрийг цуугиулагч түшмэд ичиг
-Аяа бас, номыг үл суран элдвийг сурагч банди нар ичиг
-Аяа бас, бясалгалыг пад хэмээн бархирагч Егөзөри нар ичиг гэдэг шиг нүднийх нь өмнө болж буй үйл явдлыг олж харахгүй яваа эмэгтэй гишүүд ичиг ичиг…
