УИХ-д “Оюутолгой”-н гэрээг шалгах ажлын хэсэг гэж бий. Тус ажлын хэсгийг анх УИХ-ын гишүүн Д.Дамба-Очир ахалж Д.Тэрбишдагва Н.Амарзаяа, О.Баасанхүү, Б.Бат-Эрдэнэ, Б.Жавхлан, З.Нарантуяа, Я.Содбаатар, А.Ундраа нар бүрэлдэхүүнд нь багтсан байдаг. Харин сүүлд Д.Дамба-Очир бууж, Д.Тэрбишдагва удирдахаар болсон юм.
Тэдний зорилго “Оюутолгойн гэрээ”-г шалгаж, цаашид үргэлжлүүлэх үү, эсвэл үнэхээр олон нийтэд цацагдаад байгаа шиг энэ гэрээ Монголд ашиггүй учраас цуцлах уу гэдгийг шалгах байв.
Ажлын хэсэг өчигдөр анхны дүгнэлтээ УИХ-д тайлаглах байлаа. Гэвч УИХ-д танилцуулахаас өмнө эсрэг талдаа тайлагначихсан нь асуудал үүслээ.
Сэтгүүлчид ажлын хэсгээс тайлбар авахаар олон удаа асууж, шалгаасан ч “улсын нууц” гээд халгаагаагүй хэрнээ Оюутолгойхонд бушуухан аваачаад өгчихсөн байхыг харвал энэ ажлын хэсэг нэг биш гэж харагдаад байгаа юм.
Уг нь УИХ-аас томилогдсон ажлын хэсэг юм. Гэвч УИХ-д биш Оюутолгойд ажлаад, тэдэнд дүн мэдээгээ танилцуулаад гүйгээд байна. Гишүүд нууц гээд тухайн материалтай танилцаж амжаагүй гэтэл Оюутолгой аль эрт мэдчихсэн байгаа талаар ажлын хэсгийн ахлагч Д.Тэрбишдагва “нууцлаад байх юм байхгүй. Д.Дамба-Очир Оюутолгойнхонд дүгнэлтээ аваачиж өгсөн байна лээ” гээд хэнэг ч үгүй тайлбар хийж зогсохыг харахад энэ ажлын хэсэг ашиг сонирхлын хувьд дэндүү зөрчилтэй юм байна гэх ойлголтыг авлаа.
УИХ-аас аливаа асуудлыг шалгахаар ажлын хэсэг байгуулахад яаран очиж албан тушаалд томилогддог хөгшчүүд УИХ-д олон байдаг. Тэдний төлөөлөл бол Д.Тэрбишдагва, Д.Дамба-Очир нар юм. Тэд ч сандран байж ажлын хэсэгт орсон зорилгоо ч амжилттай биелүүллээ гэж харагдаж байна.
Мэдээж зорилго нь Оюутолгойн гэрээг шалгах явцад бидний нүдэнд илхэн харагдлаа.
Мөн Д.Дамба-Очирын замын компани Оюутолгойд зам тавих төсөл авсан тухай эх сурвалж мэдээлсэн. Тэгвэл Д.Дамба-Очир төсөл авсныхаа хариуд ажлын хэсгийн дүгнэлтээ УИХ-д танилцуулахаас өмнө аваачиж өгсөн болж таарч байна. Ёстой л үүргээ амжилттай биелүүлж, Оюутолгойг, түүний хөрөнгө оруулагч Рио Тинтогийн эрх ашгийг хамгаалж чаджээ.
Одоо үүргээ сайн биелүүлж Монголын эсрэг талд шийдвэр гаргахад нөлөөлж чадсан эдгээр эрхмүүдийг ажлын хэсгээс чөлөөлөх хэрэгтэй. Эс бөгөөс тэд УИХ-д яригдсан нууц асуудал бүрийг цааш нь барьж гүйгээд дийлэхгүй нь.
