MNBC болон ТВ-8 телевизийн хооронд үүсээд буй асуудал олон нийтийн анхаарлыг татаад байна. Тэгвэл энэ асуудалтай холбогдуулан MNBC компанийн Үйл ажиллагаа хариуцсан захирал Ж.Золбат, Техникийн албаны дарга Д.Оюунгэрэл, хуульч Ч.Отгонжаргал нар “Монгол ньюс мэдээллийн төв”-д мэдээлэл хийлээ.
АСУУДАЛ ИНГЭЖ ЭХЭЛЖЭЭ
2019.04.26-ны өдрийн 15 цагийн орчим “MNBC” телевизийн “толгой” станц дээр гэмтэл гарсан байна. Энэхүү гэмтлийн улмаас “ТВ-8” болон олон улсын “Аль-Жазира” сувгуудын нэвтрүүлэг цацагдах боломжгүй болжээ. Тиймээс гэмтлийг яаралтай засварлах бүхий л боломжийг эрэлхийлж ажилласан байна. Улмаар гэмтсэн төхөөрөмжийг дахин засварлах боломжгүй болсон учир үйлдвэрлэгч компанид захиалга өгсөн бөгөөд “Одоогоор энэ төхөөрөмжийн нөөц бэлэн байхгүй байна. Тиймээс 90 хоногийн дотор үйлдвэрлэж өгөх боломжтой” гэсэн тайлбарыг өгчээ.
Харин 2019.04.30-ны өдөр “ТВ8” болон Монголын Телевизүүдийн холбооноос “MNBC” ХХК-д “ТВ8” телевизийн суваг тасарсан талаарх асуулга бүхий бичиг илгээсэн байна. Компанийн зүгээс техникийн эвдрэл гэдгийг тайлбарлаж, талууд харилцан ойлголцол хүрээд байж.
ГЭВЧ АСУУДАЛ ЯАГААД ХУРЦДАВ
“MNBC” компанийн Үйл ажиллагаа хариуцсан захирал Ж.Золбат руу МСНЭ-ийн Ерөнхийлөгч Х.Мандахбаяр утас цохиж “Би өнгөрсөн долоо хоногт ТВ-8 телевизийг худалдан авсан. Тиймээс яаралтай манай сувгийг нээ” гэсэн шаардлагыг тавьжээ. Харин Ж.Золбат “Ингэх боломжгүй. Техникийн асуудал байгаа” гэсэн тайлбарыг өгсөн ч утасны яриа хурц хэлбэрт шилжсэн байна.
Энэ талаар “MNBC” компанийн Үйл ажиллагаа хариуцсан захирал Ж.Золбат “Олон сувгийн дамжуулагч үйлчилгээ эрхлэгч Эм Би Си компани нь Монголын хэвлэл, мэдээллийн салбар тэр дундаа өргөний болон сувгийн телевизийн үйлчилгээ эрхлэгчдийн үйл ажиллагааг анхнаас нь дэмжиж, хамтран ажиллаж, олон түмний эрх ашгийг дээдэлж, үйл ажиллагаа бүртээ одоогийн хүчин төгөлдөр мөрдөгдөж буй хууль дүрэм, тогтоол шийдвэрүүдийг чандлан сахиж хамтран ажиллаж ирсэн. Гэвч сүүлийн үед ТВ-8 телевизийн зүгээс олон нийтэд тараасан мэдээлэл шиг тухайн телевизийн эфирийг үндэслэлгүйгээр хааж боогдуулсан, хэвлэлийн эрх чөлөөнд нь халдсан, үйл ажиллагаанд нөлөөлөхүйц дарамт шахалт үзүүлсэн зүйл огт байхгүй гэдгийг хариуцлагатайгаар хэлж байна. Бидэнд үе үе техник тоног төхөөрөмжийн гэмтэл саад гардаг байсан ба энэ нь албан байгууллагуудад үүсдэг асуудал юм. Бидэнд учирсан гэмтэл саатлыг тодорхойлсон акт, тоног төхөөрөмжийг оношилсон шинжилгээ, төхөөрөмжийн захиалгын хуудас, хэрэглэгч нартаа мэдэгдсэн мэдээлэл, холбогдох төрийн болон олон нийтийн байгууллагуудад хүргүүлсэн албан тоот зэрэг бодитой нотлох баримтууд хангалттай бий. Гэтэл ТВ-8 телевизийн зүгээс үндэслэлгүй зүйлээр манай компани руу дайрч байна. Ямар учраас ийм дайралтууд хийгээд байгааг ойлгохгүй байна” гэв.
ТВ-8 ТЕЛЕВИЗИЙН ОДООГИЙН УДИРДЛАГУУД 110 САЯ ТӨГРӨГИЙН ТҮРЭЭСИЙН ТӨЛБӨРӨӨ ТӨЛӨӨГҮЙ АСУУДАЛ БАЙНА
MNBC компанийн хуульч Ч.Отгонжаргал “MNBC нь тусгай зөвшөөрлийн дагуу үйл ажиллагаа явуулдаг компани. Хамтын ажиллагааны гэрээнд тусгагдсны дагуу талуудаас үл шалтгаалах техникийн нөхцөл байдаг үүссэн. Үүнийг ТВ-8 ойлгож байгаа. Гэхдээ тэд төрийн байгууллагад гомдол гаргасан. Манай зүгээс ч тайлбар мэдээлэл хийсэн. Хэн дуртай нь эрх бүхий төрийн байгууллагад нөлөөлдөггүй юм. Мөн төрийн байгууллага, албан тушаалтанд хэн нэгний нөлөөнд автахгүй гэдэгт итгэж байна. Харин ТВ-8 телевизийн шинэ захирал ийм зүйл ярьсан нь утасны бичлэгт үлдсэн байна.
Мөн ТВ-8 телевизийн эфир гурав хоног хаагдсанаас үүсч 95 сая төгрөгийн хохирол учирсан тул төл гэж нэхэмжилсэн. Хэрвээ Монголын телевизүүд ТВ –8 шиг орлого олдог бол тэр хэмжээгээрээ улсад татвараа төлдөг байх гэж ойлгож байна.
ТВ-8 телевизийн одоогийн удирдлага манайд төлөх ёстой 110 сая төгрөгийн түрээсээ төлөлгүйгээр, өөр газар руу нүүсэн асуудал байна. Үүнийг хуулийн дагуу шийдвэрлэнэ. Тиймээс олон нийт аливаа мэдээллийг нягталж, нэг талыг баримталсан, төөрөгдүүлсэн мэдээллийг ялгаж, үнэн зөвийг ялгаасай гэж хүсч байна” гэв.
Өөрөөр хэлбэл техникийн гэмтлээс шалтгаалж ТВ-8 телевизийн эфир хаагдсан асуудал үүсчээ. Гэмтлийг засуулахаар MNBC компанийн зүгээс ажиллаж байгаа бөгөөд төхөөрөмж нийлүүлдэг компани даа захиалга өгч, төхөөрөмжөө хүлээж байгаа юм байна. Үүнийг ТВ-8 телевизийнхэн ойлгож байгаа хэдий ч саяхан тус телевизийг худалдаж авсан МСНЭ-ийн Ерөнхийлөгч Х.Мандахбаярын хувийн характераар болоод асуудал ингэтлээ хурцаджээ.
