Эрүүл мэндийн сайд Д.Сарангэрэл “Элэг бүтэн Монгол” үндэсний хөтөлбөрийн талаар өчигдөр мэдээлэл өгсөн билээ. Тэрээр хөтөлбөртэй холбоотой үүссэн нөхцөл байдлын талаар мэдээлэл өгөх үеэрээ Эрүүл мэндийн дэд сайд асан С.Амарсанаагийн талаар нэгэн анхаарал татсан мэдээлэл хийлээ.
Эрүүл мэндийн сайд Д.Сарангэрэл “Ж.Амарсанаагийн үйл ажиллагааны цаана улс төрийн ашиг сонирхол нуугдаж байдгийг баримтаар хэлье. “Элэг бүтэн Монгол” хөтөлбөрийн хүрээнд “Хаппи Веритас” эмнэлэг хувь нэмрээ оруулж байгаа бөгөөд элэгний вирүсийн шинжилгээ сөрөг гарсан 1882 хүн, эмчилгээнд огт ороогүй 4442 хүн нийт 6324 хүнд тусламж үзүүлсэн гэх хуурамч баримтаар эрүүл мэндийн даатгалын сангаас 758 сая төгрөг авсан байх магадлалтай” гэсэн юм.
Энэ асуудлыг хянуулахаар хууль хяналтын байгууллагад хандсан бөгөөд иргэдийн эрүүл мэндийн эсрэг үйлдсэн гэмт үйлдэл гэж үзэх үндэслэлтэйг ЭМДЕГ-т мэдэгдсэн болохыг салбарын сайд мэдэгдлийнхээ үеэр дурдсан юм.
“Элэг бүтэн Монгол” үндэсний хөтөлбөрийн хүрээнд 2018 оны эцсийн байдлаар 786.250 хүн үзлэг, шинжилгээнд хамрагдсан байна. Хөтөлбөрийн хэрэгжилтэд 2017 онд Эрүүл мэндийн даатгалын сангаас нийтдээ 18,8 тэрбум төгрөг, 2018 онд 19,8 тэрбум төгрөг зарцуулжээ.
Харин 2019 онд нийт 1.053.960 хүнийг энэхүү шинжилгээнд хамруулахаар ажиллаж байгаа бөгөөд В, С вирусийн халдвар илрүүлэх,ачаалал тоолох шинжилгээ хийх, эмийн үнийн зардалд ЭМДСангаас 32,7 тэрбум төгрөг зарцуулахаар төлөвлөөд байгаа аж.
