Монгол Улсын Ерөнхий сайд У.Хүрэлсүх өнөөдөр нийслэлийн Багануур дүүрэгт ажиллаж байна. Тэрбээр эхлээд “Багануур” ХК-ийн удирдлагууд, ажилчидтай уулзлаа. Энэхүү уулзалтын үеэр тус компанийн захирал Э.Номинчулуун уурхайн талаар Ерөнхий сайдад мэдээлэл хийлээ.
Тэрбээр “Багануурын уурхай 1978 онд байгуулагдсан, 1121 ажилтантай. Төвийн бүсийн эрчим хүчний 70 хувийг нүүрсээр хангадаг. Сүүлийн гурван жил ашигтай ажиллаж байна. Тоног төхөөрөмжийн 57 хувь нь ашиглах хугацаа хэтэрсэн. Нийт олборлолтынхоо 85 хувийг цахилгаан станцуудад нийлүүлдэг. Газраа буюу ордынхоо лицензийг алдсан асуудлаар шүүхэд хандаж, төр ордоо эргүүлж авсан. Одоо лицензээ “Багануур” ХК-ийнхаа нэр дээр шилжүүлж авах хүсэлтэй байна” гэдгээ Ерөнхий сайдад уламжиллаа.
Монгол Улсын Ерөнхий сайд У.Хүрэлсүх
-“Багануурын уурхай бол улсын гал голомт болсон газар. Өвөлжилтийн бэлтгэлээ энэ сараас хангаж ажиллах ёстой. Лицензийн асуудлыг хэрхэхийг салбарын сайд шийдэж өгөөрэй” гэлээ. Мөн санхүүгийн сахилга бат дээр анхаарч ажиллах ёстойг анхаарууллаа.
Хуурамч бичиг баримт бүрдүүлж, хууль бусаар ажилд орсон асуудал яригдаж байна. Сахилга бат, дэг журам тогтоож, үрэлгэн зардлаа танаж ашигт ажиллагаагаа дээшлүүлэхийг мөн үүрэг болголоо.
Багануурын уурхай өнгөрсөн 40 жилд 116 сая тн нүүрс олборлосон бөгөөд энэ онд 4,1 сая тн нүүрс олборлож борлуулах төлөвлөгөөтэй ажиллаж байгаа аж. Мөн 2018 онд улсад 24 тэрбум төгрөгийн татвар төлсөн аж.
Ерөнхий сайд одоо тус уурхайн үйл ажиллагаатай танилцаж байна гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.
