Өнөөдөр Монголын сэтгүүлчид худалдагдсан ба худалдагдаагүй гэх хоёр ангилалд хуваагдаад бие биесээ хардан сэрдэж, учраа олж ядан зүдэрч байна. Манай салбарынхан дотоод асуудлаа хэлсэн хэлээгүй мэддэг л дээ.
Тиймээс зохицуулалт, хариуцлагатай байдлыг ч хүсэмжилж эхлээд удаж байна. Үүнийг оройлж, чиглүүлэгч нь манай салбарын Ерөнхийлөгч байх учиртай. Гэтэл хоосон лоозонтой нэгэн л худлаа синсаци дэлгэж явсан болж таарлаа. Олон нийтийн өмнө нулимс дуслуулан жүжиг тавьсан түүний үйлдэл ёс зүйн доголдлоо нуухыг оролдсон башир арга төдийхөн байв.
Эндээс үүсээд буй асуудлуудын эзэн Х.Мандахбаяр хэлж ярьж байгаа шигээ зарчимч эр биш юм гэх ойлголтыг өгч байна. Сэтгүүл зүйн салбарын нэр хүнд шороотой хутгалдчихлаа. Гэтэл ийм үед салбарынхаа унасан нэр хүндийг аврах оролдлого хийхийн оронд гадаад аялж яваа Ерөнхийлөгчийн үйлдлийг юу гэж дүгнэх вэ.
Нохдын дунд яс хаяж уралцуулдаг шиг сэтгүүл зүйн салбараа олон нийтийн шүүмжлэл дунд яс шиг хаячихаад өөрөө асуудлаас зугтаж одох нь ёс зүй мөн гэж үү?
Өмнөговьд сэтгүүлчид дагуулан очиж, үймээн дэгдээчихсэн, салбараа бохирдсон, худалдагдсан гэж уйлан байж зарлачихсан, өөрийн гараар найруулж, хутгасан энэхүү жүжгийнхээ гол дүр нь атлаа олон нийт шударга ёсыг нэхэмжлэх үед хилийн цаанаас худлаа сүгсэлдэх нь ариун явдал гэж боддог хэрэг үү?
Театрийн танхим дүүрэн үзэгчид цуглачихаад, асуудал хэрхэн бол хэмээн чих тавин чагнаж байхад сүржин сурталчилгааны эзэн, жүжгийн гол дүр арын хаалгаар гараад зугтаж оддогтой агаар нэг үйл явдал өрнөж байна шүү дээ. Одоо хэн найруулсан жүжгийг тань үргэлжлүүлж, хэн хутгасан бантанг тань цэвэрлэх вэ? Тушаал авсан өмчлөгдсөн сэтгүүлчид нь үү?
Ер нь анхнаасаа л шударга ёс гарчигтай хоосон цаас барьчихсан, хэзээ мөдгүй асуудлаас зугтаж мэдэх нэгэн байсныг салбарынхан нь гадарлаад л байсан л даа. Өөрийн нэр хүндийг хамгаалахын тулд итгэж ярьсан найзынхаа утасны бичлэгийг нийтэд дэлгэж, олон жил нөхөрлөсөн андаа хэнэг ч үгүй муу хүн болгон зарладаг түүнд салбарын нэр хүнд, ороо бусгай асуудал ямар хамаа байх вэ дээ.
Өөрт нь л үйлчлэхгүй бол тэр хэнийг ч худалдагдсан, хууль зөрчсөн гэж зарлахад бэлэн нэгэн бөгөөд үүнийхээ төлөө тэрээр өөрийн хувийн хэвлэлүүдээр өдөр шөнөгүй юу ч гэж сараачуулж чадна. Гэвч асуудал үүсэх бүрийд нэг бол эмнэлэгт хэвтэж бусдаар өрөвдүүлээд, нэг бол хил давж зугтаад барьцгүй л нөхөр юм даа. САЛБАРАА, САЛБАРЫНХАА БОХИРДСОН НЭР ХҮНДИЙГ Л ЦЭВЭРЛЭХ ЮМСАН.
