Л.Оюун-Эрдэнэ: Ш.Батхүүгийн нэр дээр 85-87 тэрбум төгрөгийн үл хөдлөх хөрөнгө байсан

ЗГХЭГ-ын дарга Л.Оюун-Эрдэнэ өнөөдөр Засгийн газрын ээлжит хуралдаанаар хэлэлцсэн асуудлын талаар сэтгүүлчдэд мэдээлэл өгсөн юм. Энэ үеэр “Жаст”-ын Ш.Батхүүгийн “Эрдэнэт үйлдвэр”-ийг барьцаалж “Стандарт” банкнаас авсан 40 сая ам.долларын өрийн талаар мэдээлэл өглөө. Цаг тулсантай холбогдуулан түүний төлөх өрийг “Эрдэнэт үйлдвэр” өөрийн эрсдлийн сангаас мөнгө гаргаж өрийг хаасан. Иймээс “Эрдэнэт үйлдвэр”-ийг хохиролгүй болгохын тулд Ш.Батхүүгийн өмч, хөрөнгийг битүүмжлээд байгаа билээ.
Тэрбээр “Өнгөрсөн дөрөвдүгээр сарын 29-ний өдөр “Стандарт” банкнаас өр төлбөртэй холбоотой ямар нэгэн асуудал байхгүй, бүх зүйл хаагдсан гэсэн утгатай баримт, бичгүүдийг ирүүлсэн байна. Тэгэхээр одоо гадаад талд өр, төлбөрийн асуудал шийдэгдсэн гэж ойлгож болно. Харин дотооддоо шийдэх асуудал байгаа. Яаж “Эрдэнэт” үйлдвэрт 40 сая ам.долларыг буруутай этгээдээр буцааж төлүүлэх вэ. Өчигдөр ЗГХЭГ-аас АТГ-ын даргад хандаж албан бичиг явуулсан.
Одоо Ш.Батхүүгийн эзэмшил бүхий, түүнд холбоотой өмч, хөрөнгүүдийг битүүмжилсэн байгаа. Нийт 52 орчим тэрбум төгрөгийн үнэлгээтэй үл хөдлөх хөрөнгө байна. Нэмэгдвэл 85-87 орчим тэрбум төгрөгийн үл хөдлөх хөрөнгө тухайн үед Ш.Батхүүгийн нэр дээр байсан. Дахиж лавлагаа авах шаардлага байгаа гэсэн. Үүнд 2-3 хоногийн хугацаа орох байх. Үүний дараа хөрөнгийн жагсаалтыг нь гаргаад дуудлага худалдаанд оруулах юм уу, шүүхийн шийдвэрийн дагуу зарж борлуулаад орлогыг нь буцаагаад “Эрдэнэт үйлдвэр”-т өгч хохиролгүй болгох эсэхийг шийднэ. АТГ-аас хариу албан бичиг ирсний дараа бидний зүгээс УДШ, Захиргааны шүүхэд хандана. Дараа нь улсыг хохиролгүй болгох тал дээр, шаардлагатай гэвэл тухайн ААН-үүд ямар хэлцэл хийх замаар тэр үед гэрээнүүдийг авсан бэ, тэр дунд авлига байсан эсэх бүх материалыг Засгийн газраас ил болгоно” хэмээн мэдэгдлээ.