АНУ есдүгээр сараас эхлэн БНХАУ-аас орж ирэх 300 тэрбум америк долларын өртөг бүхий бараанд 10 хувийн гаалийн татвар ногдуулахаар болжээ. Энэхүү шийдвэрээ АНУ-ын Ерөнхийлөгч Дональд Трамп өчигдөр өөрийн твиттер хуудсаар дамжуулан “Хятадтай хийх худалдааны хэлэлцээр үргэлжилж байна. Энэ хэлэлцээрийн дүнд АНУ есдүгээр сарын 1-нээс эхлэн Хятадаас манай улсад экспортлох 300 тэрбум америк долларын өртөг бүхий бараа, бүтээгдэхүүнд гаалийн 10 хувийн нэмэлт татвар ногдуулахаар боллоо” хэмээн мэдэгдлээ. Гэхдээ түүний энэхүү шийдвэр нь 250 тэрбум америк долларын өртөг бүхий бараа бүтээгдэхүүнд 25 хувийн татвар ногдуулах шийдвэртэй огт хамааралгүй хэмээн тодотгосон юм.
Бүгд Найрамдах Хятад Ард Улс, АНУ худалдааны маргаанаа зохицуулах хэлэлцээрийг хэдэн сарын турш явуулж байгаа хэдий ч одоог хүртэл амжилттай болгож чадаагүй байгаа юм. Хамгийн сүүлчийн буюу 11 дэх удаагийн хэлэлцээ өнгөрөгч тавдугаар сард Вашингтон хотноо зохион байгуулагдсан хэдий ч хоёр тал тодорхой шийдэлд хүрч чадалгүй өндөрлөсөн юм. Үүний хариу болгож Вашингтон тавдугаар сарын 10-нд Хятадын 200 тэрбум америк долларын өртөгтэй бүтээгдэхүүнд гаалийн нэмэлт татвар оруулж, хувийг нь 10 байсныг 25 болгон өсгөсөн билээ.
АНУ-аас авч буй энэхүү шийдвэрийн хариуд БНХАУ-ын зүгээс мөн хариу барьж АНУ-аас ирэх 60 тэрбум америк долларын өртөг бүхий 5000 гаруй нэр төрлийн бараа бүтээгдэхүүнд гаалийн татвар ногдуулсан билээ.
Өнгөрөгч зургадугаар сард Японы Осака хотноо болсон Их-20-ийн уулзалтын үеэр хоёр улсын төрийн тэргүүн уулзаж, яриа хэлэлцээрийг дахин үргэлжлүүлэхээр тохиролцсон. Энэ үеэр Дональд Трамп Хятадаас ирэх бараа бүтээгдэхүүнд шинэ татвар ногдуулахгүй, мөн “Хуавэй” компанид тавьсан хязгаарлалтаа зөөллөнө гэж амласан бол Ши Жинь Пин АНУ-аас авах хөдөө аж ахуйн бүтээгдэхүүний худалдан авалтаа нэмэгдүүлэхэд бэлэн гэдгээ мэдэгдсэн юм.
