Усны булганууд коронавирусээр халдварласан тохиолдлууд Даниас гадна өөр таван улсад бүртгэгдсэн тухай Дэлхийн эрүүл мэндийн байгууллагын мэдэгджээ.
“Одоогоор Дани, Нидерланд, Испани, Швед, Итали, АНУ гэсэн зургаан улс усны булга үржүүлгийн фермд нь SARS-CoV-2 вирус илэрснээ Дэлхийн мал амьтны эрүүл мэндийн байгууллагад мэдэгдсэн” хэмээн ДЭМБ-ын албан ёсны мэдээлэлд дурдсан байна.
“Коронавирус нь голдуу ойрын хавьтлын үеэр хүнээс хүнд дамждаг хэдий ч хүн болон амьтан хооронд халдвар дамжсан тохиолдлууд бий. Усны булга, нохой, гэрийн тэжээвэр муур, арслан, барнаас “SARS-CoV-2” илэрсэн тохиолдлууд бүртгэгдэж байсан. Усны булганууд коронавирусээр халдварласан хүмүүсээс халдвар авдаг. Усны булганууд өөр хоорондоо халдвар тараахаас гадна хүнд вирус тараах эрсдэлийг бий болгодог. Ийм замаар вирус хүнээс хүн амд тархан халдварладаг байж болзошгүй юм. Үүнээс гадна усны булганаас хүнд халдварладаг байх боломжтой юм” хэмээн ДЭМБ-ын мэдэгдэлд дурдсан байна.
Хүн болон амьтны хооронд халдвар тархах үед вирус генетикийн өөрчлөлтөд орох боломжтой гэж шинжээчид үзэж байгаа юм. Үүнийг генийн дарааллыг судлах замаар илрүүлдэг. Данид 2020 оны 6 дугаар сараас хойш коронавирусний халдвар авсан усны булганаас хүнд дамжин халдварласан 214 тохиолдол илэрчээ. Үүнээс 12 тохиолдол нь вирусний дахин давтагдашгүй төрөл байжээ. Эдгээр 12 тохиолдол бүгд Данийн Хойд Ютландад 7-79 насны хүмүүсээс илэрчээ. Халдвар авсан хүмүүсийн найм нь усны булга үржүүлгийн фермтэй холбоотой тохиолдлууд байсан бол дөрөв нь нутгийн оршин суугчид байжээ. Эдгээр өвчтөний эмнэлзүйн зураглал, өвчний хүндрэлийн явц, вирусний тархалт нь “SARS-CoV-2”-н шинж тэмдгүүдтэй төстэй байсныг хамгийн анхны судалгаанууд харуулж буйг шинжээчид тайлбарлажээ. Гэсэн ч “голомт 5” хэмээн нэрлэгдсэн энэхүү вирусний төрөл нь өмнө нь ажиглагдаж байгаагүй мутаци, өөрчлөлтүүдийн хослолыг агуулж байжээ.
Одоогоор эдгээр мутаци нь ямар үр дагаварт хүргэж болзошгүй нь тодорхойгүй байна. Үүний зэрэгцээ усны булгануудад төдийгүй хүмүүст илэрсэн энэхүү вирусний төрөл нь саармагжсан эсрэг биетийн мэдрэг байдлыг бага зэргээр бууруулж байгааг урьдчилсан судалгааны дүн харуулжээ. Эдгээр дүгнэлтийг нотлохын тулд цаашид шинжлэх ухаан, лабораторийн судалгаанууд хийгдэх шаардлагатай гэдэг нь үнэн юм. Өвчнийг оношлох, эмчилгээ хийх, вакцинжуулалтад хамруулахын тулд гарч болзошгүй аливаа үр дагаврыг ойлгох нь чухал юм.
Усны булга үржүүлгийн фермүүдэд хяналт шалгалт хийж байна
Усны булга үржүүлгийн фермүүдэд илэрсэн халдварын тохиолдлууд нь вирус дамжин халдварлахад усны булганы тоо толгой чухал үүрэг гүйцэтгэж буйг харуулж байгаагаас гадна нөхцөл байдлыг анхааралтай ажиглах шаардлагатайг харуулж байна.
Мутацид орсон коронавирусний тархалтыг зогсоохын тулд Данийн Засгийн газар бүх усны булгыг устгах шийдвэрийг лхагва гарагт гаргасан юм. Данийн усны булга үржүүлгийн 1139 фермд халдвар тархжээ. Ялангуяа хойд Ютландын фермүүдэд ийм тохиолдлууд илүү олон гарсан байна.
TASS
