Ерөнхийлөгчийн Тамгын газрын дарга Ө.Шижир Ерөнхийлөгч гурван хуулийн төсөлд хэсэгчилсэн хориг тавьж байгааг хэллээ.
Тодруулбал,
- Авлигын эсрэг хуульд өөрчлөлт оруулах тухай хуулийн төсөл
- Шүүхийн тухай багц хууль
- Засаг захиргаа нутаг дэвсгэрийн нэгжийн тухай хуулийн төслүүдэд хэсэгчилсэн хориг тавьж байгаа гэв.
Ерөнхийлөгчийн Тамгын газрын дарга Ө.Шижир “АТГ-ын даргыг Ерөнхий сайд томилдог болсон нь анх хуулийн төсөлд оруулсан өөрчлөлтийг үгүй хийж байгаа хэрэг болсон. Аль нам, улс төрийн хүчин өнөөдөр ЗГ, УИХ-ыг бүрдүүлж байгааг та бүхэн мэдэж байна. УИХ, ЗГ АТГ-ын дарга, дэд даргыг томилдог байх нь авлигатай тэмцэж чадахгүй гэж үзэж байна. Баталсан хуулиар АТГ нь Засгийн газрын агентлагийн бүтэц байхаар болж байна. Авлигын хэргийн 89 хувь орчим нь төсвийн хөрөнгөтэй харьцдаг байгууллагын албан тушаалтнууд байна.
Өнгөрсөн баасан гарагт Ерөнхийлөгч УИХ 2020 оны 12 дугаар сарын 31-ний өдөр баталсан Авлигын эсрэг хуульд өөрчлөлт оруулах тухай хуулийн 1 дүгээр зүйлд заасан “Авлигатай тэмцэх газрын даргыг Ерөнхий сайдын санал болгосноор Улсын Их Хурал томилгооны сонсгол хийж 6 жилийн хугацаагаар томилно” гэсэн хэсэгт хэсэгчилсэн хориг тавьсан.
Энэ нь хараат бус, бие даасан, төрийн тусгай байгууллага байхаар хуульчилсан, тийм ч байх ёстой Авлигатай тэмцэх газрын даргыг Ерөнхий сайд буюу улс төрийн намын даргын саналаар томилох тухай өөрчлөлтийг Авлигын эсрэг хуульд оруулсан нь Монголын ард түмнийг авлигачдын өмнө бөхийлгөж, Монгол төрийг авлигачдадаа бүрэн бууж өгөхөд хүргэж байна гэж Ерөнхийлөгч үзэж байгаа юм.
Тиймээс хэсэгчилсэн хоригийн талаарх Ерөнхийлөгчийн байр суурийг ЕТГ-аас олон нийтэд мэдээлэхээр болсон байна.
